Mwa ku Fumanela Lifasi la Tabo

MAGAZINI ye bizwa Time ne ize: “Mutu ya m’ata ka ku fitisisa—isi fela mwa lilimo za likiti ze peli ze felile kono ku zwa haisali—ki Jesu wa Nazareta.” Jesu ha n’a li fa lifasi-mubu, likiti-kiti za batu ba ba sepahala ne ba lemuhile butuna bwa hae ni ku iyakatwa kwa hae za ba bañwi. Kacwalo, ha ku komokisi kuli ne ba batile ku mu eza mulena. (Joani 6:10, 14, 15) Niteñi, sina mo ku bulelezwi mwa taba ye felile, Jesu n’a hanile ku ikenya mwa litaba za bupolitiki.

KALABO ya Jesu ne i tomile fa mabaka a malalu: mubonelo wa Ndat’ahe ka za tukuluho ya batu ya ku ikezeza mo ba latela, ili ye kopanyeleza ni puso ya batu; temuho ya Jesu ya kuli ku na ni m’ata a matuna a sa bonahali a’ lwanisa nihaiba buikatazo bwa mubusi yo munde ka ku fitisisa; ni mulelo wa Mulimu wa ku toma mulonga wa lihalimu kuli u buse lifasi kaufela. Ha lu nze lu nyakisisa lisupo ze talu zeo ka tokomelo, lu ka bona libaka buikatazo bwa batu bwa ku bata ku eza lifasi ku ba sibaka se sinde ha bu palile. Lu ka nyakisisa hape mo ku ka konwa ku kondisezwa lika.

Kana Batu B’a Kona ku Ipusa?

Mulimu ha n’a bupile batu, n’a ba file m’ata fahalimw’a lifolofolo. (Genese 1:26) Kono batu ne ba busiwa ki Mulimu. Bo munna ni musali ba pili ne ba na ni ku bonisa buipeyo ku Mulimu ka ku sa ca muselo wa kota i liñwi, ili “kota ya ku ziba bunde ni bumaswe.” (Genese 2:17) Ka bumai, Adama ni Eva ba sinya tukuluho ya bona ya ku iketela mi ba palelwa ku utwa Mulimu. Ku ca muselo o ne u hanisizwe w’o ne si fela busholi. Ne ku bonisa petuhelo kwa bubusi bwa Mulimu. Litaba za kwatasi za kwa Genese 2:17 mwa Bibele ye bizwa The New Jerusalem  Bible li talusa kuli bo Adama ni Eva ne ba bata “tukuluho ye tezi ya muzamao ili ye tahiseza mutu ku hana mayemo a hae a ku ba sibupiwa . . . Sibi sa pili seo ne li ku lwanisa bubusi bwa Mulimu.”

Bakeñisa litaba ze tuna za muzamao ze n’e amiwa teñi, Mulimu n’a tuhelezi bo Adama ni Eva ni ba ba simuluhile ku bona kuli ba iketele mo ba ka pilela, mi ba itomela lipimo za ze nde ni ze maswe. (Samu 147:19, 20; Maroma 2:14) Kacwalo, batu cwale ba na ni tukuluho yeo ya ku ikezeza mo ba latela. Kana i kondisize lika? Ha lu nahana likiti-kiti za lilimo ze fitile ze lu iponezi ze ezahezi, lu kona ku bulela kuli kutokwa! Muekelesia 8:9 i li: “Mutu u na ni mata fahalimu a yo muñwi, ku mu eza maswe.” Litaba ze maswe zeo ka za ku ipusa kwa batu li koñomeka buniti bwa Jeremia 10:23, ye li: “Wena [Mun’a] Bupilo, na ziba kuli nzila ya mutu ha i yo mwa mata a hae; mi mutu nih’a zamaya, h’a koni ku izamaisa ili yena.” Litaba ze ezahezi li bonisize kuli batu ha ba koni ku ipusa hande ku si na Mubupi wa bona.

Jesu n’a lumelelani ka ku tala ni taba yeo. Ku yena ku itukulula ku Mulimu ne li sikuto. N’a ize: ‘Ha ni ezi se siñwi ka ili na, kamita ni eza ze tabisa Mulimu.’ (Joani 4:34; 8:28, 29) Kacwalo, Jesu n’a sa nahani za ku amuhela bubusi kwa batu ku si na tumelezo ya Mulimu. Kono seo hasi talusi kuli n’a kata-kata ku tusa batu. N’a ezize ka mwa n’a konela kaufela kuli a tuse batu ku fumana tabo ye tuna ka ku fitisisa cwale ni kwapili. Mane n’a file bupilo bwa hae kabakala batu. (Mateu 5:3-11; 7:24-27; Joani 3:16) Kono Jesu n’a ziba kuli “nto ni nto i na ni nako ya yona,” ku kopanyeleza ni nako ya Mulimu ya ku toma puso ya hae fahalimw’a batu. (Muekelesia 3:1; Mateu 24:14, 21, 22, 36-39) Kono mu hupule kuli mwa Edeni bashemi ba luna ba pili ne ba ipeile ku eza tato ya sibupiwa sa moya se si maswe se ne si bulezi ka ku itusisa noha ye bonahala. Seo si lu tisa kwa libaka la bubeli Jesu ha n’a ikambusize kwa litaba za bupolitiki.

Mubusi wa Lifasi Ya Sa Zibahali

Bibele i lu bulelela kuli Satani n’a file Jesu “mibuso kamukana ya lifasi, ni kanya ya yona,” kuli a mu kubamele. (Mateu 4:8-10) Ka bukuswani kikuli, Jesu n’a filwe bubusi bwa lifasi , kono pili n’a na ni ku eza kezo ya n’a bata Diabulosi. Jesu n’a si ka swasiwa mwa muliko w’o. Kono kana ne li muliko luli? Kana Satani n’a ka kona luli ku fa mpo ye tuna cwalo? Ee,  kakuli Jesu ka sibili n’a bizize Diabulosi kuli ki “mulena wa lifasi le” mi muapositola Paulusi n’a mu talusize ku ba “mulimu wa lifasi le.”—Joani 14:30; 2 Makorinte 4:4; Maefese 6:12.

Kono Jesu n’a zibile kuli Diabulosi h’a na taba ni ze ba bata batu. N’a talusize Satani ku ba “mubulai” ni “ndat’ahe lishano ni za buhata kaufela.” (Joani 8:44, The Amplified Bible) Ku si na kuli cwañi, lifasi le, le li “lapalezi mwatas’a” ya maswe ya cwalo ha li koni ku ba ni tabo luli. (1 Joani 5:19) Kono Diabulosi h’a na ku ba ni m’ata ao ku ya ku ile. Jesu, ili y’o cwale s’a li sibupiwa sa moya se si m’ata, a tuha a zwisa Satani ni ku feza kukuezo ya hae kaufela.—Maheberu 2:14; Sinulo 20:1-3.

Satani ka sibili wa ziba kuli mazazi a hae a ku busa lifasi a sweli ku fukuzeha ka bubebe-bebe. Kacwalo, ka ku felelwa ki sepo, u sweli ku mbindana ka mwa konela kaufela kuli a sinyeleze batu ka ku ba foufaza, sina mwa n’a ezelize pili Munda wa mwa lizazi la Nuwe u si ka taha kale. (Genese 6:1-5; Juda 6) Sinulo 12:12 i li: “Mu na ni bumai mina ba ba yahile mwa lifasi ni mwa liwate! kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.” Bupolofita bwa Bibele ni likezahalo za lifasi li bonisa kuli lu fakaufi ni mafelelezo a ‘nako ye nyinyani’ yeo. (2 Timotea 3:1-5) Kimululo i fakaufi.

Mulonga O Ka Tahisa Tabo

Libaka la bulalu Jesu ha n’a ikambusize kwa litaba za bupolitiki kikuli n’a zibile kuli ka nako ye tomilwe kwapili, Mulimu u ka toma mulonga wa kwa lihalimu kuli u buse fahalimw’a lifasi. Bibele i biza mulonga w’o kuli ki Mubuso wa Mulimu, mi tuto ya Jesu ne i kanatela hahulu ku ona. (Luka 4:43; Sinulo 11:15) Jesu n’a lutile balutiwa ba hae ku lapelela Mubuso w’o kuli u tahe, kakuli ki ka puso ya ona fela ku ka konahala kuli ‘se si latwa ki Mulimu si ezwe mwa lifasi, mo si ezezwa kwa lihalimu.’ (Mateu 6:9, 10) Mu kana mwa komoka kuli, ‘Haiba Mubuso w’o u ka busa fahalimw’a lifasi kaufela, kiñi se si ka ezahala kwa milonga ye tomilwe ki batu?’

Kalabo i kwa Daniele 2:44, ye li: ‘Mwa mazazi a malena ao [a busa kwa mafelelezo a muinelo wo wa linto], Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela [ye tomilwe ki batu]; kono ona u ka ba teñi kamita ni ku ya ku ile.’ Ki kabakalañi Mubuso wa Mulimu ha u ka “ketula” mibuso ya lifasi? Kakuli i pihelela ku hulisa moya o lwanisa Mulimu wa ku bata tukuluho ya ku iketela o n’o tahisizwe ki Satani mwa simu ya Edeni. Kwand’a ku eza ka ku fapana ni ze ba tokwa hahulu batu, ba ba satalala ku hulisa moya o cwalo ba lwanisana ni Mubupi. (Samu 2:6-12; Sinulo 16:14, 16) Kacwalo, lu lukela ku ipuza kuli, ‘Kana lwa yemela puso ya Mulimu kamba lwa i lwanisa?’

Ki Bubusi bwa Mañi Bo Mu Ka Keta?

Kuli batu ba tusiwe ku eza katulo ye nepahezi ka za bubusi, Jesu n’a laezi balutiwa ba hae ku kutaza ‘evangeli ya mubuso . . . mwa lifasi kaufela, ibe bupaki mwa macaba kamukana’ pili mafelelezo a muinelo wa cwale a si ka taha kale. (Mateu 24:14) Ki bomañi kacenu ba ba zibahala mwa lifasi kaufela ku ba bakutazi ba Mubuso wa Mulimu? Ki Lipaki za Jehova. Mane ka nako ye telele, fa likepe la pili la yona magazini ye, ku ñozwi manzwi a’ li: “Ye Hasanya Mubuso wa Jehova.” Kacenu, Lipaki ba ba bat’o ba 6,000,000 mwa linaha ze fitelela 230 ba sweli ku tusa batu ku ba ni zibo ye nepahezi ya Mubuso w’o. *

 Limbuyoti kwa Babusiwa ba Mubuso

Kamita Jesu n’a eza lika ka mw’a latela Mulimu. Kacwalo, ku fita ku iketela tukuluho ni ku lika ku tiisa kamba ku zwisezapili muinelo wa cwale wa linto ka bupolitiki, n’a sebelize ka t’ata kuli a zwisezepili za Mubuso wa Mulimu, ili yona tatululo i nosi kwa matata a mwa lifasi. Kabakala ku sepahala kwa hae n’a filwe lubona lo lu kanya mwa lihalimu ka ku ba yena Mulena tota wa Mubuso w’o. W’o luli ki mupuzo o makaza hakalo wa ku ipeya kwatas’a Mulimu!—Daniele 7:13, 14.

Kacenu bolule-lule ba ba likanyisa Jesu ka ku beya za Mubuso wa Mulimu mwa sibaka sa pili ni ka ku eza tato ya Mulimu ni bona hape ba ikola mpo ye makaza—ili tohonolo ya ku ba babusiwa ba fa lifasi ba Mubuso wa Mulimu. (Mateu 6:33) Mwatas’a puso ya ona ye lilato, ba ka biswa ba ba petehile, ba na ni sepo ya ku pila ku ya ku ile. (Sinulo 21:3, 4) Liñolo la 1 Joani 2:17 li li: “Lifasi la fela, ni takazo ya lona; kono ya eza tato ya Mulimu u ina ku ya ku ile.” Satani ni balateleli ba hae ha se ba yundisizwe ni lifasi-mubu ku fetulwa paradaisi ya mwa lifasi kaufela mo ku si na buitati bo bu kauhanya batu, lipisinisi za buputeleli, ni bulapeli bwa buhata, ikaba nyakalalo ye tuna luli ya ku pila ku ya ku ile fa lifasi!—Samu 37:29; 72:16.

Ee, Mubuso wa Mulimu ki yona nzila sakata ya ku fumana ka yona lifasi la tabo, mi lushango lo lu u zibahaza lu talusizwe hande kuli ki taba ye nde. Muta mu ka potelwa ki yo muñwi wa Lipaki za Jehova, mu amuhele taba ye nde yeo ye tiswa ku mina, haiba ha mu si ka i amuhela kale.

[Litaluso za kwatasi]

[Maswaniso a fa likepe 5]

Litaba ze ezahezi li bonisa kuli batu ha ba koni ku ipusa hande ku si na Mulimu

[Siswaniso se si fa likepe 5]

Bakeñisa kuli u busa “lifasi le”, Satani n’a ka kona ku fa Jesu “mibuso kamukana ya lifasi”

[Maswaniso a fa likepe 7]

Jesu n’a lutile kuli mwatas’a tukiso ya Mubuso wa Mulimu, lifasi li ka ba sibaka se si makaza