Lipuzo Ze Zwa kwa Babali

Jehova n’a itamezi bulikani ni Abrahama kwa Ure kamba kwa Karani?

Litaba za makalelo-kalelo ka za bulikani bwa Jehova ni Abrahama li kwa Genese 12:1-3, ye li: “[Muñ’a] Bupilo a li ku Abrame: U zwe mwa naha ya henu ni mwa mushobo wa henu ni mwa ndu ya ndat’aho, u ye mwa naha ye ni ka ku supeza. Ni ka ku eza sicaba se situna, . . . mi mishobo kamukana ya lifasi i ka fiwa mbuyoti ka wena.” * Jehova mwendi n’a itamile bulikani b’o ni Abrahama muta Abrahama n’a li mwa Ure ni ku bu tiisa hape Abrahama ha n’a li mwa Karani.

Mwa lilimo za mwanda wa pili, Setefani n’a bulezi za taelo ya Jehova ya kuli Abrahama a tutele kwa Kanana. N’a bulelezi Kuta Ye Tuna kuli: ‘Mulimu wa kanya n’a iponisize ku kuku wa luna Abrahama, a sa li kwa Mesopotamia, a si ka y’o ina kwa Karani kale; a li ku yena: Tuha mwa naha ya henu, ni ku ba mushobo wa henu, mi u ye mwa naha ye ni ka ku supeza.’ (Likezo 7:2, 3) Habo yena Abrahama pili ne li kwa Ure, mi sina mwa n’a boniselize Setefani, ki kona kwa n’a utwezi lwa pili taelo ya ku ya kwa Kanana. (Genese 15:7; Nehemia 9:7) Setefani n’a si ka bulela za bulikani bwa Mulimu ni Abrahama, kono kwa Genese 12:1-3, bulikani b’o bu zamaelela ni taelo ya ku ya kwa Kanana. Kacwalo kwa utwahala ku lumela kuli Jehova n’a itamezi bulikani b’o ni Abrahama mwa Ure.

Kono ku balisisa hande taba ya Genese ku bonisa kuli Jehova n’a kutezi ku itama bulikani b’o ni Abrahama mwa Karani, sina hape mwa Kanana ha n’a kutezi hañata ku bulela ni ku ekeza ku ze ñwi za n’a itamile. (Genese 15:5; 17:1-5; 18:18; 22:16-18) Ka ku ya ka Genese 11:31, 32, ndat’ahe Abrahama, yena Tera, n’a zwile mwa Ure ku ya kwa Kanana, mi n’a ile hamoho ni Abrahama, Sara, ni Lota. Ne ba ile kwa Karani mi ne ba yahile teñi ku fitela fa n’a shwezi Tera. Abrahama n’a inzi mwa Karani nako ye telele ye n’e mu konisize ku fumana liluwo le lituna hahulu. (Genese 12:5) Mi hasamulaho, Nakori, muhabo Abrahama, ni yena n’a tutezi teñi.

Bibele ha se i bulezi za lifu la Tera, i biha manzwi a Jehova ku Abrahama mi i zwelapili kuli: “Cwale Abrame a tuta sina mw’a n’a mu bulelezi [Muñ’a] Bupilo.” (Genese 12:4) Kacwalo, Genese 11:31–12:4 i fa muhupulo o tiile wa kuli Jehova n’a bulezi manzwi a’ ñozwi kwa Genese 12:1-3 Tera ha s’a shwile. Haiba ku cwalo, u zibe Abrahama n’a zwile mwa Karani ni ku tutela kwa naha ya n’a mu taluselize Jehova ka ku latelela taelo ya n’a sa zo utwa, ili ya n’a utwile lilimo-limo kwamulaho mwa Ure.

Ka ku ya ka Genese 12:1, Jehova n’a laezi Abrahama kuli: “U zwe mwa naha ya henu ni mwa mushobo wa henu ni mwa ndu ya ndat’aho.” Ka nako ye ñwi, “naha” ya Abrahama ne li Ure, mi ki mona mo ne i inzi “ndu” ya ndat’ahe. Kono ndat’ahe Abrahama n’a tutiselize lubasi lwa hae kwa Karani, mi Abrahama a t’o biza sibaka seo kuli ki naha ya hae. Ha s’a inzi lilimo-limo mwa Kanana, a luma mutang’a hae kwa ‘naha ya habo, ni ku bahabo’ ku y’o fumanela Isaka musali, mi mutanga y’o n’a ile kwa “munzi wa Nakori” (kwa Karani kamba ko kuñwi cwalo fakaufi ni Karani). (Genese 24:4, 10) Teñi k’o, mutanga y’o a fumana Rebeka ku bahabo Abrahama, ili lubasituna lwa Nakori.—Genese 22:20-24; 24:15, 24, 29; 27:42, 43.

Setefani ha n’a bulela mwa Kuta Ye Tuna, n’a bulezi za Abrahama kuli: “Ndat’ahe a man’o shwa, Mulimu a mu [zwisa] mwateñi, a mu tisa mwa naha mo mu yahile cwale.” (Likezo 7:4) Seo si bonisa kuli Jehova n’a bulezi ni Abrahama mwa Karani. Kwa utwahala ku lumela kuli ka nako yeo Jehova n’a kutezi ku itama bulikani bwa hae ni Abrahama ili bo bu bihilwe kwa Genese 12:1-3, kakuli bulikani b’o ne bu kalile Abrahama ha n’a tutezi kwa Kanana. Kacwalo, nyakisiso ya litaba kaufela i lu fitisa fa kutwisiso ya kuli Jehova n’a kana a itamezi bulikani ni Abrahama mwa Ure ni ku bu tiisa hape mwa Karani.

[Litaluso za kwatasi]