Jesu Wa Pulusa—Ka Mukwa Ufi?

“Jesu wa pulusa!” “Jesu ki Mupulusi wa luna!” Mwa linaha ze ñata za mwa lifasi kaufela, lipulelo ze cwalo li ñozwi fa mamota a miyaho ni mwa libaka ze ñwi za nyangela. Buñata-ñata bwa batu ba lumela ka buniti kuli Jesu ki Mupulusi wa bona. Ha ne mu ka ba buza kuli, “Jesu u lu pulusa cwañi?” mwendi ne ba ka alaba kuli, “Jesu n’a lu shwezi” kamba, “Jesu n’a shwezi libi za luna.” Ee, lifu la Jesu li konahalisa kuli lu puluswe. Kono lifu la mutu a li muñwi li kona ku lifela cwañi libi za batu ba bañata-ñata? Ha ne mu ka buziwa kuli, “Lifu la Jesu li kona ku lu pulusa ka mukwa ufi?” ne mu ka liñi?

KALABO ya Bibele kwa puzo yeo i bunolo hahulu, ya utwahala mi ki ya butokwa hahulu. Kono kuli lu utwisise butokwa bwa yona, lu tokwa pili k’u nga bupilo ni lifu la Jesu ku ba tatululo kwa butata bo butuna. Ki ka ku eza fela cwalo lu kona ku utwisisa hande butokwatuna bwa lifu la Jesu.

Mulimu ha n’a lumezi kuli Jesu a fane bupilo bwa hae, n’a tatulula butata bo ne bu zuhile Adama ha n’a ezize sibi. Sibi seo ne si tahisize kozi ye tuna luli! Yena munna wa pili ni Eva musal’a hae ne ba petehile. Lihae la bona ne li simu ya Edeni ye nde-nde. Mulimu n’a ba file musebezi o kolwisa wa ku babalela simu y’e li lihae la bona. Ne ba na ni ku babalela ka lilato libupiwa ze ñwi ze pila fa lifasi. Mi batu ha ne ba ka ekezeha  ni ku taza lifasi ka batu ba bañwi ba ba eza bolule-lule, ne ba ka yandulula paradaisi fa lifasi kaufela. (Genese 1:28) Ne ba filwe musebezi o munde ili o tabisa hakalo! Hape, ne ba li balikani ba batuna hahulu. (Genese 2:18) Ne ba sa tokwi se siñwi. Ne ba ka pila bupilo bwa kamita ili bwa tabo.

Ku t’ata ku hupula kuli bo Adama ni Eva ne ba ka fosa cwañi. Kono bosinyalana ba pili ne ba fetuhezi Mubupi wa bona ka sibili—yena Jehova Mulimu. Sibupiwa sa moya, yena Satani Diabulosi, ne si itusisize noha ku kwasheka Eva kuli a si ke a ipeya ku utwa Jehova, mi Adama a swalisana ni Eva.—Genese 3:1-6.

Ne ku si na kakanyo ka za seo Mubupi n’a ka si eza ku bo Adama ni Eva. Na bulezi kale ze n’e ka zwa mwa ku sa ipeya ku utwa, ha n’a ize: “Haili likota kaufela za simu, u ka li ca; kono kota ya ku ziba bunde ni bumaswe, yona u si ke wa i ca; kakuli nako y’o i ca, u ka shwa luli.” (Genese 2:16, 17) Puzo ye tuna ni ku fita ne i tokwa ku tatululwa cwale.

Batu Ba Talimana ni Butata Bo Butuna

Sibi sa pili ne si tahiselize batu butata bo butuna. Adama n’a bupilwe a li mutu ya petehile. Kacwalo, bana ba hae ne ba ka ikola bupilo bwa kamita bo bu petehile. Kono Adama n’a ezize sibi a si ka ba kale ni bana. Mifuta kaufela ya batu ne i sa li mwa teka ya hae ha n’a atulezwi kuli: “U ka ca buhobe ka mifufuzo ya pata ya hao, mane u kutele mwa mubu wo u zwisizwe ku ona; kakuli u liluli, mi u ka kutela mwa liluli.” (Genese 3:19) Kacwalo, Adama ha n’a ezize sibi ni ku kalisa ku shwa ka mwa n’a bulelezi Mulimu, batu kaufela ne ba atulezwi lifu hamoho ni yena.

Hasamulaho, muapositola Paulusi n’a ñozi ka ku nepahala kuli: “Sibi . . . si keni mwa lifasi ka mutu a li muñwi [Adama], mi ka sibi ku keni lifu, kamukwaocwalo lifu li tile kwa batu kaufela kakuli ba ezize sibi kaufela.” (Maroma 5:12) Ee, bakeñisa sibi sa pili, bana be ne ba swanela ku pepwa inze ba petehile ni ku pila bupilo bo bu sa feli ne ba pepezwi mwa makulanu, busupali, ni lifu ka ku ba tibelelo ya bona.

Yo muñwi a kana a li: “Ha ku yo hande cwalo. Ne si luna be ne ba iketezi ku sa utwa Mulimu—ki Adama ya n’a ezize cwalo. Lu yawelañi tibelelo ya bupilo bo bu sa feli ni tabo?” Lwa ziba kuli haiba kuta ya mulao ne i ka beya mwana mwa tolongo kabakala mulatu wa ndat’ahe wa ku uzwa mota, ka swanelo mwana u ka bilaela kuli: “Ha ku si ka luka! Ha ku na se ni fosize.”—Deuteronoma 24:16.

Ka ku kukueza munna ni musali ba pili ku fosa, Satani mwendi n’a ikutwile kuli u beile Mulimu mwa singanyenganye. Diabulosi n’a itahanezi ku taseza isali kwa makalelo a ku ba teñi kwa batu—pili bana ba si ka pepwa kale. Adama ha n’a fosize, kwa zuha puzo ye tuna ye li, Jehova u ka ezañi ka za bana ba ba ka pepwa ki bo Adama ni Eva?

Jehova Mulimu n’a ezize se si lukile. Munna ya lukile Elihu n’a ize: “Taba ya kuli Mulimu u ka eza bumaswe i kwahule, kamba Ya-Mata-Kaufela ku fosisa litaba.” (Jobo 34:10) Mi ka za Jehova, mupolofita Mushe n’a ñozi kuli: “Ki Yena Licwe; musebezi wa hae u lukile; kakuli linzila za hae kaufela li lukile; ki Mulimu ya sepahala, ya si na bumaswe, ya na ni niti, ya eza ka ku luka.” (Deuteronoma 32:4) Tatululo ya n’a file Mulimu wa niti kwa butata bo ne bu tahisizwe ki Adama ha i lu byanguli kolo ya bupilo bwa kamita mwa paradaisi fa lifasi-mubu.

 Mulimu U Fa Tatululo ye Petehile

Mu nyakisise tatululo ya n’a file Mulimu ha n’a atuzi Satani Diabulosi. Jehova n’a ize ku Satani: “Ni ka beya toyano mwahal’a mina, ni wena ni musali [kopano ya Mulimu ya kwa lihalimu], ni mwahal’a peu ya hao [lifasi le li mwatas’a m’ata a Satani] ni peu ya musali [Jesu Kreste]; peu yeo i ka ku pyata toho [Satani], wena u i lume fa lisito [lifu la Jesu].” (Genese 3:15) Mwa bupolofita bwa pili b’o bwa mwa Bibele, Jehova n’a ama kwa mulelo wa hae wa ku lumela kuli Mwan’a hae wa moya wa kwa lihalimu a tahe fa lifasi-mubu ku t’o pila sina mutu ya petehile, yena Jesu. Mi n’a ka shwa—ku lumiwa fa lisito—mwa muinelo w’o wa ku sa ba ni sibi.

Ki kabakalañi Mulimu ha n’a tokwa kuli ku shwe mutu ya petehile? Jehova Mulimu n’a ka fa Adama koto mañi ha n’a ka fosa? Kana ne si lifu? (Genese 2:16, 17) Muapositola Paulusi n’a ñozi kuli: “Mupuzo wa sibi ki lifu.” (Maroma 6:23) Adama n’a lifezi sibi sa hae ka lifu la hae. N’a filwe bupilo, a iketela sibi, mi a shwa kabakala koto ya sibi sa hae. (Genese 3:19) Ku cwañi cwale ka za nyazo ye ba ipumani ku yona batu kaufela ye n’e tile kabakala sibi seo? Ne ku tokwahala lifu kuli libi za bona li lifelwe. Kono ki lifu la mañi le ne li ka kona ku tahisa kuli batu kaufela ba swalelwe bufosi bwa bona?

Mulao wa Mulimu kwa sicaba sa Isilaele wa kwaikale n’o tokwa “bupilo ka bupilo.” (Exoda 21:23) Ka ku ya ka sikuka seo, lifu le li tahisa swalelo ya libi za batu li na ni ku ba ni butokwa bo bu swana ni bwa n’a latehezwi Adama. Ki lifu la mutu yo muñwi ya petehile fela le ne li ka kona ku lifela mupuzo wa sibi. Jesu n’a li mutu ya cwalo. Mane, Jesu n’a li “tiululo [ye likani, NW]” ili ya n’a konile ku pulusa batu kaufela ba ba kona ku liululwa ba ba simuluhile ku Adama.—1 Timotea 2:6; Maroma 5:16, 17.

Lifu la Jesu Ki la Butokwa Hahulu

Lifu la Adama ne li si na butokwa; n’a lukela ku shwela sibi sa hae. Kono lifu la Jesu ne li na ni butokwa bo butuna kakuli n’a shwile a si muezalibi. Jehova Mulimu n’a kona ku amuhela butokwa bwa bupilo bo bu petehile bwa Jesu bo bu li tiululo ya basepahali ba ba simuluhile ku Adama muezalibi. Mi butokwa bwa sitabelo sa Jesu ha bu feleli fela fa ku lifela libi za luna za kwamulaho. Kambe bu bile cwalo, ne lu si ke lwa ba ni tibelelo ya nako ya kwapili. Ka ku pepelwa mwa sibi, lwa kona ku fosa hape. (Samu 51:5) Lwa kona ku itumela hahulu luli kuli lifu la Jesu li lu konisa ku fita fa ku petahala kwa kwa makalelo k’o Jehova n’a lelezi bana ba bo Adama ni Eva!

Adama u kona ku swanisezwa ku ndate ya shwile ni ku lu siya mwa sikoloti se situna-tuna (sibi) kuli mane ha lu koni ku lifa sikoloti seo. Kwa neku le liñwi, Jesu u swana sina ndate yo munde ya n’a shwile ni ku lu siyela tifo y’e lu lukulula kwa sikolotituna sa n’a lu imelize ka sona Adama ni ku lu siyela ze likani ze lu kona ku pila ka zona kamita. Lifu la Jesu ha li felisi fela libi za kwamulaho; hape ki tukiso ye makaza ka za nako ya luna ya kwapili.

Jesu wa pulusa kakuli n’a lu shwezi. Mi lifu la hae ki la butokwa hahulu luli! Ha lu l’i nga ku ba kalulo ya tatululo ya Mulimu kwa butata bo butuna bwa sibi sa Adama, tumelo ya luna ku Jehova ni mw’a ezeza lika ya tiiswa. Ee, lifu la Jesu ki tukiso ya ku yangwela ka yona “mutu ufi kamba ufi ya lumela” ku yena—ili ku mu yangwela kwa sibi, matuku, busupali, ni lifu ka sibili. (Joani 3:16) Kana mwa itumela ku Mulimu ka ku eza tukiso yeo ye lilato kuli lu puluswe?

[Siswaniso se si fa likepe 5]

Adama n’a tahisize sibi ni lifu kwa batu kaufela

[Siswaniso se si fa likepe 6]

Jehova n’a file tatululo ye petehile