Lipuzo Ze Zwa kwa Babali

Noha ya mwa simu ya Edeni ne i fitisize cwañi ku Eva muhupulo wa ku loba mulao wa Mulimu ka za kota ya ku ziba bunde ni bumaswe?

Genese 3:1 i li: “Noha n’e fita lifolofolo kaufela za mwa naheñi kwa butali, z’a n’a ezize [Muñ’a] Bupilo. Ya li ku musali: Kana ki niti kuli Mulimu u ize: Mu si ke mwa ca likota kaufela ze mwa simu?” Ku bulezwi ze shutana-shutana ka za m’o noha mwendi ne i ambolezi ni Eva. Mubonelo o muñwi ki wa kuli ne i bulezi ka ku zamaisa mubili kamba ku eza liponiso. Ka mutala, Joseph Benson yo muhulu wa bulapeli wa kwa England, n’a ize: “Ku bonahala hahulu kuli ne li ka liponiso za mufuta o muñwi cwalo. Mane, ba bañwi ba nga kuli ku nahana ni ku bulela ne li mikwa ya linoha ye n’e zibahala, . . . kono bupaki bwa zeo ha bu yo.”

Kono, noha ne i kona cwañi ku itusisa fela lilama za mubili ku fitisa muhupulo ku Eva wa kuli, ka ku ca muselo o ne u hanisizwe, n’a ka ba sina Mulimu, a kone ku ikezeza likatulo za ze nde ni ze maswe? Hape, Eva n’a abani mwa ku ambolisana k’o, n’a alabile puzo ye ne buzizwe ki noha. (Genese 3:2-5) Muhupulo wa kuli noha ne i bulezi ka liponiso fela kamba ka ku zamaisa mubili ne u ka bonisa kuli Eva n’a alabile ka liponiso za ka mazoho. Kono Bibele yona i li n’a bulezi.

Muapositola Paulusi n’a lemusize Bakreste ba bañwi ha n’a amile kwa kezahalo yeo kuli: “Na saba kuli, sina noha ha i n’e pumile Eva ka mano a maswe a yona, mwendi maikuto a mina ni ona a ka sinyeha.” Lubeta lwa n’a bulezi Paulusi ne lu zwa kwa ‘baapositola ba buhata, be ne ba sebeza ka mano a maswe.’ Ze maswe ze ne ba bulela ba ba twi ki “baapositola ba batuna ku fita” bao ne li si ka bulelwa ka ku itusisa fela lilama za mubili kamba liponiso za ka mazoho. Ne li kopanyelelize ni ku bulela manzwi a bona a mano a maswe, a n’a bulelwa ka ku puma ba bañwi.—2 Makorinte 11:3-5, 13.

Nihaike kuli manzwi n’a itusisizwe mwa ku puma Eva mwa simu ya Edeni, ha ku na se si bonisa kuli noha yeo luli ne i na ni ngwangwali. Mane ne i sa i tokwi. Lingeloi la Mulimu ha ne li bulezi ku Balaami ka mbongolo, folofolo yeo ne i sa tokwi ku ba ni ngwangwali ye tuna inge ya mutu. (Numere 22:26-31) Kaniti ‘kambongolo ka ka sa buleli ha ne ka bulezi ka linzwi inge mutu,’ m’ata a ku eza cwalo n’a zwa kwa liluko la moya.—2 Pitrosi 2:16.

Sibupiwa sa moya se ne si konisize noha ku bulela ku Eva si zibahalizwe mwa Bibele sina “noha ya kale, ye bizwa Diabulosi ni Satani.” (Sinulo 12:9) Manzwi a n’a utwile Eva ni ku alaba n’a tile ka Satani, ya “ifetula sibupeho sa lingeloi la liseli.”—2 Makorinte 11:14.

[Siswaniso se si fa likepe 27]

“Mu ka ba sina milimu, mu zibe bunde ni bumaswe”