Lipuzo Ze Zwa kwa Babali

Kana taelo ya Mulimu ye ñozwi kwa Jeremia 7:16 i talusa kuli Bakreste ha ba koni ku lapelela mutu ya zwisizwe mwa puteho ya Sikreste kabakala kuli ki sifosi ya sa baki?

Hamulaho wa ku fa katulo ya hae kwa Juda ye n’e sa sepahali, Jehova a bulelela Jeremia kuli: “U si ke wa lapelela sicaba se, u si ke wa tumusa kwa linzwi ku ba kupela lituso, u si ke wa ba lapelela ku Na; kakuli Na, ha ni na ku ku utwa.”—Jeremia 7:16.

Ki kabakalañi Jehova ha n’a hanisize Jeremia ku lapelela Maisilaele? Kwa iponelwa hande kuli ne li kabakala kuli ne ba tulile Mulao ka butuna. Ka ku sa swaba mi ili fa ngandaleza, ne ba ‘uzwa, ku bulaya, ku eza buhule, ku tapanya ka buhata, ku ciseza Baale insense ni ku zamaela milimu i sili.’ Seo ne si tahisize kuli Jehova a bulelele Majuda bao be ne ba sa sepahali kuli: “Ni ka mi yumbela kwahule ni pata ya ka, sina mo ni yumbezi bahabo mina kaufela, bona ba lusika kamukana lwa Efraimi.” Kaniti, ne ku si ke kwa swanela kuli Jeremia, kamba yo muñwi, a lapelele kuli Jehova a felise katulo ya Hae.—Jeremia 7:9, 15.

Ka ku zamaelela ni seo, muapositola Joani n’a ñozi ka za tapelo ye nde ku Mulimu. Pili n’a kolwisize Bakreste kuli: “Ha lu kupa nto ka ku lata kwa hae, wa lu utwa.” (1 Joani 5:14) Ku tuha f’o, ka ku ama kwa ku lapelela ba bañwi, Joani n’a zwezipili kuli: “Mutu h’a bona mwanahabo a eza sibi se si sa isi kwa lifu, a lapele, mi Mulimu u ka mu fa bupilo; u ka bu fa ba ba eza sibi se si sa isi kwa lifu. Sibi si teñi se si isa kwa lifu; ha ni buleli kuli ku lapelwe bakeñisa sibi seo.”(1 Joani 5:16) Jesu hape n’a bulezi ka za sibi se si ‘sa konwi ku swalelwa,’ ili sibi sa ku nyefula moya o kenile.—Mateu 12:31, 32.

 Kana seo si talusa kuli kaufela ba ba zwisizwe mwa puteho ya Sikreste ka ku eza sibi sa ka ku sa baka ba ezize libi ze “isa kwa lifu” mi ha ba swaneli ku lapelelwa? Seo ha si koni ku ba cwalo luli, kakuli fokuñwi lifoso ze cwalo haki libi ze isa kwa lifu. Mane, ku t’ata ku ziba kuli ki zona. Mutala o swanela ki wa Mulena Manase wa Juda. N’a tomezi milimu ya buhata lialetare, ku fana bana ba hae sina litabelo, ku sebeleza balimu, ni ku beya maswaniso a betilwe mwa tempele ya Jehova. Mane, Bibele i li Manase ni sicaba ne ba ezize “bumaswe, mane ku fita macaba a n’a yundisize [Muñ a] Bupilo fapil’a bana ba Isilaele.” Ka zeo kaufela, Jehova a fa Manase koto ka ku mu isa kwa Babilona mwa mawenge sina muhapiwa.—2 Malena 21:1-9; 2 Makolonika 33:1-11.

Kana libi za Manase, niha ne li li ze tuna luli, ne li li mufuta wa libi ze isa kwa lifu? Ku bonahala kuli ne li si cwalo, kakuli taba yeo i zwelapili ku bulela ka za hae kuli: “H’a s’a li mwa ziyezi, a lapela [Muñ’a] Bupilo Mulimu wa hae: a ikokobeza hahulu fapil’a Mulimu wa bondat’ahe. A mu lapela; mi Mulimu a amuhela tapelo ya hae, a utwa kupo ya hae, mane a mu kutiseza mwa Jerusalema, mwa mubuso wa hae; mi cwale Manase a ziba kuli [Muñ’a] Bupilo ki Yena Mulimu.”—2 Makolonika 33:12, 13.

Kacwalo, lu si matukeli ku atula kuli mutu u ezize sibi se si isa kwa lifu ka libaka fela la kuli u zwisizwe mwa puteho. Ku kana kw’a nga nako kuli muinelo tota wa pilu ya mutu u bonahale. Mane, hañata ku bulelwanga kuli o muñwi wa milelo ya ku zwisa mutu mwa puteho ki ku tahiseza sifosi kuli a tone ni kuli mwendi a bake ni ku sikuluha.

Bakeñisa kuli mutu yo h’a sa li yo mwa puteho, cinceho ifi kamba ifi mwa pilu ni mwa mubonelo i ka lemuhiwa ki ba ba li fakaufi ni yena, ba ba cwale ka sinyalana ni yena kamba silama sa lubasi. Ba ba bona licinceho zeo ba kana ba atula kuli sifosi yo n’a si ka eza sibi se si isa kwa lifu. Ba kana ba mu lapelela kuli a fumane m’ata mwa Linzwi la Mulimu le li buyelezwi ni kuli Jehova u ka eza ku sifosi yo ka ku ya ka tato ya Hae.—Samu 44:21; Muekelesia 12:14.

Hailif’o ba bañwi ba kana ba ba mwa mayemo a ku bona bupaki bo bu likani bwa kuli sifosi yo u bakile, puteho kaufela i kana i sa lemuhi cwalo. Ba kana ba kakamala, ku ziyeleha, mane ni ku sitatala ha ne ba ka utwa mutu ya lapelela patalaza mutu ya zwisizwe mwa puteho. Kabakaleo, ba ba ikutwa ku bata ku lapelela sifosi ba swanela ku eza cwalo kwa mukunda, ili ku beya zwelopili ifi kamba ifi ya taba yeo mwa mazoho a maeluda ba ba na ni buikalabelo mwa puteho.

[Siswaniso se si fa likepe 31]

Libi ze tuna za Manase ne li swalezwi ha n’a ikokobelize ku Jehova

[Manzwi a bañi ba siswaniso fa likepe 30]

Si zwelela kwa Illustrirte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s