Piho ya Bashaeli ba Mubuso

“Mu Lizize Nombolo I Sili”

BO Leslie ni Caroline ba mwa Johannesburg, South Africa, ne ba yapananga ku kutaza ka luwaile kwa batu ba mwa munzi o’ notezwi mo ku pila batu ba ba tuhezi misebezi. Ne ba fumananga ba sikai fa mandu ili be ne ba sa tabeli hahulu lushango lwa bona lwa Sikreste, kacwalo Caroline n’a susuelizwe ha n’a alabilwe ki musali yo muñwi.

Caroline a buza kuli, “Kana bao ki bo Mrs. B—?”

Kwa alabiwa ka linzwi le li silikani kuli, “Batili, na ki na Mrs. G—. Mu lizize nombolo i sili.”

Ka ku utwa linzwi la hae le li silikani, Caroline a li: “Kanti he ni taluse ze ne ni bata ku bulelela bo Mrs. B—.” Kona a zwelapili ku ambola ka za limbuyoti za Mubuso wa Mulimu o taha. Ha se ku lukisizwe za ku isa broshuwa ya Ki Sifi Seo Mulimu A Tokwa ku Luna?, Bo Mrs. G— ba buza kuli: “Kana mu ba bulapeli mañi?”

Caroline a alaba kuli, “Lu Lipaki za Jehova.”

“Batili kanti, bulapeli bo nya! Ha ni sepi kuli na tabela ku mi bona.”

Caroline a ekeza kuli: “Kono bo Mrs. G—, ka mizuzu ye 20 ye felile, ni mi taluselize ka za sepo ye makaza ka ku fitisisa, ku mi bonisa ku zwelela mwa Bibele seo Mubuso wa Mulimu u ka tuha u si ezeza batu. Ne mu tabezi hahulu ku utwa litaba zeo—mane ni ku cisehela—mi mwa bata ku ituta ze ñata. Ki lifi luli ze mu ziba ka za Lipaki za Jehova? Kambe mu bakuli, kana ne mu ka ya ku makanika? Kiñi ha mu sa ni lumelezi ku mi taluseza ze ba lumela Lipaki za Jehova?”

Hamulaho wa ku kutumana nakonyana a alaba kuli: “Na sepa mu bulezi niti. Mwa swanela ku taha. Kono mu zibe kuli, ni kamuta ha mu na ku cinca bulapeli bwa ka!”

Caroline a alaba kuli, “Bo Mrs. G—, niha ne ni ka bata ku eza cwalo, ne ni si ke na kwanisa ku cinca bulapeli bwa mina ni kamuta. Ki Jehova fela ya kona ku eza cwalo.”

Musipili wa ku isa broshuwa ne u bile o munde, mi bo Mrs. G— (Betty) ba lumela ku potelwa hape. Caroline ha fita, Betty a talusa kuli n’a bulelezi basali ba n’a ca ni bona kuli n’a na ni ku buhisana ni Lipaki za Jehova. Ba ñala, ni ku buza kuli, “Ne u ka eza cwañi cwalo? Batu bao mane ha ba lumeli nihaiba ku lumela ku Jesu!”

Honaf’o Caroline a hupulisa Betty ka za sisupo se situna sa mwa puhisano ya bona ya kwamulaho ka za Mubuso wa Mulimu.

Caroline a buza kuli, “Ki mañi ya ka ba Mulena?”

Betty a alaba kuli, “Ku si na kuliñi, ki Jesu.”

Caroline a li, “Kaniti.” Kacwalo a zwelapili ku talusa kuli Lipaki za Jehova ba lumela kuli Jesu ki Mwan’a Mulimu, kono h’a likani ni Mulimu ka ku ba kalulo ya Silalu.—Mareka 13:32; Luka 22:42; Joani 14:28.

Hamulaho wa ku potelwa misipili i sikai, kwa iponelwa hande kuli Betty niha n’a li mutu y’a na ni buikolwiso, ni moya wa tabo, na si ka ikangula hande. Mane, n’a na ni kansa mi n’a ikalelwa ku shwa. A itumelela kuli, “Ni lakaza kuli kambe ne ni utwile litaba ze mwa lilimo za kwamulaho ni ku amuhela tumelo ya hao.” Caroline a mu omba-omba ka ku mu bonisa mañolo a’ talusa lifu ku ba buloko bo butuna ili bo mutu a kona ku zuha ku bona mwa nako ya zuho ya bafu. (Joani 11:11, 25) Taba yeo ne i susuelize hahulu Betty, ili yo cwale sa sweli ku ituta Bibele kamita. Fela kikuli makulanu a hae a mu paleliswa ku fumanehanga kwa mikopano kwa Ndu ya Mubuso.

Caroline u li: “Ni iponezi hande-nde kuli musebezi wo u etelelwa ki mangeloi. Betty ‘n’a lizelizwe ka ku sa lela,’ mi hape, u na ni lilimo za buhulu ze 89!”—Sinulo 14:6.