“Batu Ba Li, Ki Na Mañi?”

SE LI nako ya Ngilisimusi hape. Batu mwa lifasi kaufela ba iketela ku eza mukiti wa lizazi la ku pepwa. Ku pepwa kwa mañi? Kana ki kwa Mwan’a Mulimu kamba kwa mulapeli wa Mujuda wa mwa lilimo za mwanda wa pili ili ya n’a bata ku cinca bulapeli bo ne bu li teñi mwa sibaka? Kana ki lizazi la ku pepwa kwa muyemeli wa babotana, kwa mufetuheli ya n’a sabisa hahulu Mubuso wa Roma ili y’o n’a bulailwe, kamba mwendi ki kwa mutu ya butali ya n’a ikutwa hahulu ku ziba lika ni ku ba ni ngana ye ñata? Mwa swanela ku komoka luli kuli, ‘Jesu Kreste ne li mañi luli?’

Jesu ka sibili n’a iyakatwile kalabo ya batu kwa puzo yeo. Muta o muñwi n’a buzize balutiwa ba hae kuli “Batu ba li, ki na mañi?” (Mareka 8:27) N’a buzelizeñi puzo yeo? Ba bañata ne se ba tuhezi kale ku mu latelela. Ba bañwi ku bonahala kuli ne ba filikani ni ku swaba ha s’a hanile buikatazo bwa bona bwa kuli ba mu eze mulena. Hape, Jesu ha n’a kananisizwe ki lila za hae, n’a si ka fa sisupo se si zwelela kwa lihalimu sa ku ba bonisa kuli n’a li mañi. Kacwalo, baapositola ba hae ne ba alabile cwañi puzo yeo ya kuli ne li mañi? Ne ba bulezi mibonelo ye miñwi

 ye n’e atile kwa batu: “Ba bañwi ba li: Ki wena Joani Mukolobezi; ba bañwi ba li: Ki wena Elia; ba bañwi: Ki wena Jeremia, kamba yo muñwi wa bapolofita.” (Mateu 16:13, 14) Ne ba si ka bulela ka za mashendo a n’a atile mwa Palestine ka za Jesu—a kuli munyefuli, muikankabeki, mupolofita wa buhata, kamba mane sipulumuki.

Mibonelo Ye Miñata ka za Jesu

Kambe Jesu n’a ka buza puzo ye swana kacenu, mwendi n’a ka i buza cwana: “Baituti ba li ki na mañi?” Kalabo hape i kona ku ba ya kuli: Ku na ni mihupulo ye miñata. David Tracy wa fa Yunivesiti ya kwa Chicago n’a ize: “Jesu u bile pizi ye zulamwi ki batu ba bañata ku liba mwa maneku a shutana-shutana.” Mwa lilimo za mwanda o felile, baituti ba itusisize lika ze ñata ze ama sayansi ya mupilisanelo wa batu, sayansi ya ku ituta batu, ni mikwa ya ka lituto ha ba nze ba lika ku ipangela likalabo kwa puzo ya y’o Jesu n’a li yena tota. Kwa mafelelezo, bali Jesu ki mañi?

Baituti ba bañwi ba zwelapili ku lumela kuli Jesu wa kwaikale n’a li mupolofita wa Mujuda ya n’a lumela mwa ku fela kwa lifasi ili ya n’a susueza batu ku baka. Kono, ba hana ku mu biza Mwan’a Mulimu, Mesiya, kamba Muliululi. Buñata ba honona litaba ze mwa Bibele za kuli u simuluha kwa lihalimu ni kuli u zuhile kwa bafu. Ku ba bañwi, Jesu n’a li mutu-tu fela ili y’o ka bupilo ni lituto za hae ze li mutala n’a tahisize bulapeli bo bu shutana-shutana ili bo ne bu kopanyizwe kwa Bukreste. Mi ka mo ku lemuhezwi ki hatiso ye bizwa Theology Today, ba bañwi ba s’a nga Jesu ku ba “mutu ya batisisa milatu, mutu ya italifisa, kamba mulumeli ya si ka ituta; muonga-ongi wa likwata, muloki ya nyaza litukiso, kamba ya ziba za ku batisisa ka za ba ba ipilela mwa makululu ili y’a lukuluhile ku bulela maikuto a hae ha nz’a fita mwahal’a minzi y’e cisa, ya mifilifili, mo ku na ni batu ba sikai ili y’e kwand’a Palestine.”

Hape ku na ni mibonelo ye miñwi ye sienyi. Sibupeho sa Jesu yo munsu si sweli ku ba teñi mwa lipina za ku mbombola, ku ze pangwa ni ku ñolwa mwa mileneñi, mane ni mwa ku bina. * Ba bañwi ba ikupulela kuli Jesu luli ne li musali. Mwa maliha a 1993, bapoti ba kwa Orange County Fair mwa California ne ba il’o bona siswaniso sa “Christie,” ili “Kreste” wa musali y’a li mapunu fa sifapahano. Ibat’o ba ka nako ye swana mwa New York ne ku bonisizwe “Christa,” ili “Jesu” wa musali y’a fa sifapahano. Bubeli bwa maswaniso ao n’a tahisize kañi ye tuna. Mi kwa makalelo a 1999, baleki ne ba fumani buka “ya za lilato leo Jesu wa Mushimani n’a fanana ni nja ya hae, ye bizwa Lingeloi.” Silikani sa bona si taluswa ku ba se si “zwelapili kwa moya mi si bonisa m’o mushimani ni nja ba iteekezi ku shwelana.”

Kana Ku Butokwa Luli?

Ki kabakalañi ha mu iyakatwa ku ziba kuli Jesu n’a li mañi mi ki mañi? Libaka la pili, kikuli, ka ku ya ka Napoleon, “Jesu Kreste u susuelize ni ku laela batu ba Hae ku si na ku ba teñi kwa Hae ka butu.” Ka lituto za hae ze tuna ni mupilelo wa hae, Jesu u amile ka m’ata bupilo bwa batu ba ba eza libilioni ka lilimo ze bat’o ba ze 2000. Muñoli yo muñwi n’a lemuhile hande kuli: “Masole kaufela ba ba kile ba caula, lisepe za ndwa kaufela ze kile za pangiwa, tutengo twa mulao kaufela to tu kile twa ezwa, malena kaufela ba ba kile ba busa, zeo kaufela ha li si ka ama batu fa lifasi ka m’ata a cwalo.”

Hape, mu tokwa ku ziba kuli Jesu ne li mañi mi ki mañi kakuli u ka ama ka ku nonga nako ya mina ya kwapili. Mu na ni kolo ya ku ba mubusiwa wa mulonga wa lihalimu o tomilwe—ili Mubuso wa Mulimu o mwatas’a Jesu. Lifasi la luna le li swenyizwe li ka kutisezwa ku ba le li itikanelezi ni ku ba ni libupiwa ze nde za mifuta-futa mwatas’a ketelelo ya Jesu. Bupolofita bwa Bibele bu lu kolwisa kuli Mubuso wa Jesu u ka fepa ba ba lapile, ku babalela babotana, ku folisa bakuli, ni ku zusa bafu.

Luli mu tabela ku ziba kuli ki mañi ya etelela mulonga o tokwiwa hahulu w’o. Taba ye tatama i ka mi tusa ku ziba Jesu tota.

[Litaluso za kwatasi]