Batu Ba Taha kwa Gilead Ka ku Itatela

SIKOLO sa Gilead sa Bibele sa Watchtower si lukiselizwe ku luta banna ni basali ba ba ineezi kuli ba y’o eza sebelezo ya bulumiwa mwa linaha li sili. Ki bomañi ba ba tahanga kwa Gilead? Ki ba ba na ni moya wa buitateli. (Samu 110:3) Moya w’o kaniti n’o iponezwi la 8 September, 2001, ba sitopa sa bu-111 ha ne ba filwe mañolo a bupaki a ku feza sikolo seo.

Ba bañwi kwa baituti ba mwa sitopa seo ne se ba itatezi kale ku siya mabasi, balikani, ni naha ya habo kuli ba y’o sebeleza ko ku na ni butokwi bo butuna. Ka ku eza cwalo, ne ba itikile ka ili bona ku bona haiba ne ba ka kona ku eza licinceho kuli ba pile mwa miinelo i sili. Ka mutala, bo Richer ni Nathalie ne ba ezize litukiso za kuli ba ye kwa Bolivia, bo Todd ni Michelle kwa Dominican Republic, mi bo David ni Monique kwa naha ya kwa Asia kuli ba y’o hasanya taba ye nde ya za Mubuso wa Mulimu. Baituti ba bañwi bona ne se ba sebelelize kale mwa Nicaragua, Ecuador, ni Albania.

Christy n’a susuelizwe ku ituta puo ya Spanish kwa sikolo sa sekondari, mi kacwalo a kona ku tanda lilimo ze peli mwa Ecuador a si ka nyalwa kale. Ba bañwi ne ba kalile ku swalisana ni liputeho ze itusisa puo i sili ze mwa linaha za bona. Bo Saul ni Priscilla ne ba bile ni mungendenge u sili; ne ba bonisize moya wa buitateli ka ku ikataza hahulu ku bolosola Sikuwa sa bona ba si ka taha kale kwa sikolo.

Liviki ze 20 za ku luta balumiwa za fufa. Lizazi la mukiti wa ku feza sikolo la fita, mi baituti ba ba hamoho ni balikani ni mabasi a bona, inze ba teeleza kwa likelezo ze butali ni manzwi a susuezo a ku laeza.

Muina-situlo wa tukiso ne li Theodore Jaracz, ya n’a keni sitopa sa busupa sa Sikolo sa Gilead, ili y’o cwale s’a li silama sa Sitopa Se Si Etelela sa Lipaki za Jehova. Za makalelo za n’a kalile ku bulela ne li kanatezi fa taba ya kuli kopano ya li ku ba i libale mulelo wa yona wa ku luta baituti kwa Gilead, ona wa ku kutaza taba ye nde ya za Mubuso mwa lifasi kaufela ko ku fumaneha batu. (Mareka 13:10) Sikolo sa Gilead si tusa baituti ba ba lutilwe, kuli ba pete hahulu musebezi w’o wa ku kutaza ku fita mo ne ba u petela kwamulaho ili mwa libaka za lifasi m’o balumiwa ba ba lutilwe ba tokwahala hahulu. Muzwale Jaracz n’a elelize baituti ku itusisa hahulu lituto ze ba lutilwe kwa Gilead ha ba ya cwale ku y’o swalisana ni balumiwa be se ba sweli kale ku sebeleza mwa linaha ze 19 ko ne ba lumezwi baituti ba ba kwazize bao.

Likelezo za ka Bunako ku Ba Ba Kwaza

Ku tuha f’o, kwa taha lingambolo ze tatamana. William Van De Wall, silama sa Katengo ka Mutai wa United States, n’a bulezi fa taba ye li “Tukufalelo ya Bulumiwa—Sisupo sa Bakreste ba Niti.” N’a kanatezi hahulu fa musebezi wa ku ‘luta macaba,’ o ñozwi kwa Mateu 28:19, 20, mi n’a elelize baituti kuli: “Mu likanyise Jesu. Yena n’a petile musebezi wa hae wa bulumiwa ka tukufalelo ni ka mafulofulo.” Kuli a tuse be ne ba ka ba balumiwa bao ku zwelapili ku  tukufalelwa mwa musebezi wa bulumiwa, n’a ba susuelize kuli: “Mu latelele tomahanyo ye sebeza; mu tundamene ku ba ni mikwa ye minde ya ku ituta ka butu, mu sa siyaleli mwa litaba za teokratiki; mi mu hupule kamita mabaka ha mu li balumiwa.”

Hasamulaho kwa taha Guy Pierce, yo muñwi wa Sitopa Se Si Etelela. N’a tolongoshize taba ye li “Mu Tundamene ku Hulisa ‘M’ata a Mina a ku Nahana.’” (Maroma 12:1, NW) N’a file sitopa se si kwaza seo kelezo ye sebeza, ili ku ba susueza ku itusisa m’ata a’ ba file Mulimu a ku nahana ni ku alakanya litaba. N’a ize: “Mu tundamene ku nahanisisa ka butungi z’a mi bulelela Jehova ka Linzwi la hae. Ku eza cwalo ku ka mi sileleza.” (Liproverbia 2:11) Muzwale Pierce hape n’a elelize sitopa kuli ba si ke ba ñañelelanga mihupulo ya bona ilikuli ba si ke ba tibela ‘m’ata a bona a ku nahana.’ Kaniti, likupuliso za ka bunako zeo li ka tusa hahulu baituti bao ha ba ka y’o eza musebezi wa bulumiwa.

Ku tuha f’o, muina-situlo a tahisa yo muñwi wa baluti ba kwa Gilead, Lawrence Bowen. Muzwale y’o n’a bulezi fa taba ye li “Mu Ikatulele ku Sa Ziba Se Siñwi.” N’a talusize kuli, mwa musebezi wa bulumiwa wa n’a ezize mwa Korinte, muapositola Paulusi n’a bile ni ‘mulelo o tiile kuli h’a na ku ziba se siñwi konji Jesu Kreste, mi ili ya kokotezwi.’ (1 Makorinte 2:2) Paulusi n’a ziba kuli m’ata a matuna ka ku fitisisa  mwa pupo kamukana, ona moya o kenile, a yemela taba ye bonisizwe mwa Bibele mukatumbi, yona ya kuli ka Peu ye sepisizwe, Jehova u ka boniswa ku ba ya lukile. (Genese 3:15) Baituti ba 48 be ne ba kwaza bao ne ba elelizwe ku ba sina Paulusi ni Timotea ni ku peta hande musebezi wa bulumiwa, ili ku kumalela kwa “mutala wa litaba ze pilisa.”—2 Timotea 1:13.

Ngambolo ya mafelelezo ku ze n’e ungekile tukiso yeo n’e ize “Mu Itebuhe Tohonolo ya Mina, ili Mpo ya Mulimu.” Wallace Liverance, muñoli wa kwa Sikolo sa Gilead, n’a tusize baituti ba ba kwaza bao ku utwisisa kuli matohonolo a sebelezo ki poniso ya sishemo se situna hahulu sa Mulimu, isi nto y’e ba konka kamba ye ba ipumanezi. Ka ku itusisa mutala wa muapositola Paulusi, Muzwale Liverance a li: “Jehova n’a si ka keta Paulusi ku ba muapositola wa bamacaba kabakala misebezi ya hae, ilikuli ku bonahale inge kuli Paulusi n’a fumani tukelo ya ku fiwa musebezi w’o kamba kuli n’o mu konka. Ne ku si ka itinga fa nako ye tandilwe mwa musebezi kamba yeloseli. Ka mubonelo wa butu, ne ku kana ku bonahezi kuli Barnabasi ki yena ya n’a swanela ku ketiwa. Ne ku si ka itinga fa buikoneli bwa butu; Apolosi ka mo ku bonahalela n’a li mubuleli yo munde hahulu ku fita Paulusi. Keto yeo ne li poniso ya sishemo se situna-tuna sa Mulimu.” (Maefese 3:7, 8) Muzwale Liverance n’a susuelize baituti ba ba kwaza bao ku itusisa mpo, kamba tohonolo ya bona ya sebelezo, kwa ku tusa ba bañwi ku ba balikani ba Mulimu ni ku fumana “mpo ya sishemo sa Mulimu . . . [ili] bupilo bo bu sa feli ka Jesu Kreste Mulen’a luna.”—Maroma 6:23.

Hamulaho wa f’o, Mark Noumair, muluti yo muñwi wa kwa Sikolo sa Gilead, a zamaisa puhisano ye mafulofulo ni ba sikai kwa baituti fa taba ye li “Buitukiso Bu Tahisa Lika Ze Nde.” (Liproverbia 21:5) Litaba za bona ne li bonisize kuli sikombwa h’a itukiseza hande bukombwa, sihulu ka ku itukisa mwa pilu ya hae, u ka tabela batu ku zwelela kwa pilu. Ni kamuta h’a na ku palelwa za ku bulela. Kono u ka bulela ni ku eza lika kuli a ba tuse kwa moya. Muzwale Noumair n’a ize: “Yeo ki yona nto ye tusa hahulu mulumiwa ku kondisa musebezi.” N’a bulezi cwalo ka ku ya ka ze n’e ezahezi ku yena ha n’a li mulumiwa mwa Africa.

Bulumiwa Ki Musebezi O Munde

Bo Ralph Walls ni Charles Woody ne ba buhisani ni balumiwa ba bañwi ba ba yeziseli, ili bao hape ne ba iz’o ituta lituto ze ipitezi kwa Sibaka sa Tuto sa kwa Patterson. Lipuhisano zeo ne li koñomekile kuli ku lata batu ki kona ko ku tahisa tabo mwa bulumiwa. Baituti ni ba bañwi kwa lilama za lubasi ni balikani be ne ba til’o teeleza ne ba tiisizwe ku utwa balumiwa ba ba yeziseli bao ha ba talusa ka sibili libaka bulumiwa ha bu li bo bunde.

John E. Barr, y’a li wa Sitopa Se Si Etelela, n’a file ngambolo ye tuna ya lizazi leo, ye li “A Mu Opelele Jehova Pina Ye Nca.” (Isaya 42:10) Muzwale Barr n’a talusize kuli pulelo ye li “pina ye nca” i fumaneha ha 9 mwa Bibele. N’a buzize kuli, “Pina ye nca yeo i bulela zañi?” Kihona a alaba kuli: “Litaba mo i fumaneha pulelo yeo li bonisa kuli pina ye nca i opelwa kabakala likezahalo ze nca ze bonisa bubusi bwa Jehova.” N’a elelize baituti ku tundamena ku abana mwa ku opela milumbeko ya za Mubuso wa Mulimu o tuzi, o mwa mazoho a Mulena ya li Mesiya, yena Kreste Jesu. Muzwale Barr n’a bulezi kuli lituto ze ne ba itutile kwa Gilead ne li ba tusize ku utwisisa hahulu-hulu likalulo ze fitana-fitana za yona “pina ye nca” yeo. “Sikolo se, si koñomekile libaka ha ku li kwa butokwa kuli mu ‘opele’ milumbeko ya Jehova ka ku swalisana ni mizwale ni likaizeli ba mina ko mu ka ya kaufela; kamita mu pilisane ka kozo ni ba bañwi mwa misebezi ya mina.”

Baituti ha se ba filwe mañolo a bona a bupaki, muyemeli wa sitopa a bala liñolo la ku itumela h’a buniti lituto ze ne ba itutile kwa Gilead.

Kana mwa kona ku ekeza kwa sebelezo ya mina ku Mulimu ni ku i bisa ye tahisa hahulu siselo? Haiba mwa kona, mu itiise sina mo ba itiiselize baituti ba ba kwazize bao. Ku itiisa k’o ki kona ko ku ba tusize ku kwanisa ze tokwahala mwa bulumiwa. Mutu h’a ifana ka ku itatela mwa sebelezo ya Mulimu, ku ba ni nyakalalo ye tuna.—Isaya 6:8.

[Mbokisi fa likepe 25]

LITABA KA ZA SITOPA

Palo ya linaha ko ba zwa baituti: 10

Palo ya linaha ko ba lumezwi: 19

Palo hamoho ya baituti: 48

Avareji ya lilimo za buhulu: 33.2

Avareji ya lilimo za ku ba mwa niti: 16.8

Avareji ya lilimo za ku ba mwa bukombwa bwa ka nako ye tezi: 12.6

[Siswaniso se si fa likepe 26]

Sitopa Sa bu-111 Se Si Feza Sikolo sa Gilead sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.