‘Mulyani wa ku Isela mwa Meto’

JESU KRESTE ki yena ya n’a file taelo yeo kwa puteho ya Sikreste ya mwa lilimo za mwanda wa pili ya Laodisea, mwa Asia Minor.

Jesu n’a ize: ‘U leke mulyani wa meto, mi u isele mwa meto kuli u bone.’ Kalafo ye ne tokwahala ne si ya butuku luli bwa meto, kono ya bubofu bwa kwa moya. Bakreste ba mwa Laodisea ne ba sinyiwa ki moya wa muleneñi wo o fumile mo ne ba pila, mi ne ba sa tokomeli luli za kwa moya.

Ka za ze ne tahisa bubofu bwa bona b’o, Jesu n’a ize: ‘U li: Ni fumile, bufumu bu ni atezi, ha ku na se ni tokwa; kanti ha u zibi kuli u mwelwa, u nyandile, u mubotana, u shwile meto, u inzi mapunu.’ Niha ne ba sa zibi cwalo, ba mwa puteho ne ba tokwa “mulyani wa meto” o n’o ka fumanwa fela ka ku latelela tuto ni kalimelo ya Jesu Kreste. Jesu n’a ize: ‘U leke ku na.’—Sinulo 3:17, 18.

Sina ba kwa Laodisea, Bakreste ba niti kacenu ba tokwa ku itibelela kwa moya, o ba kana mane ba sa lemuhi, wa batu ba ba lata sifumu ni munyaka be ba pila ni bona. Mulyani o konisa ku zwelapili ku ikangula hande kwa moya u bonisizwe mwa kelezo ye: “U leke ku [Jesu] . . . mulyani wa meto, mi u isele mwa meto, kuli u bone.”

Nto ye lemuseha kikuli “mulyani wa meto” wo u na ni ku lekwa. Haki wa mahala. Mutu u swanela ku fumana nako ya ku ituta ni ku yeya Linzwi la Mulimu. Walisamu u lu kolwisa kuli Linzwi leo li “kenile, [li] bonisa meto.”—Samu 19:8.