Maeluda—Mu Twaeze Ba Bañwi ku Shimba Mushimbo

MWA liputeho za Lipaki za Jehova mwa lifasi kaufela, ku tokwahala hahulu-hulu banna ba ba kona ku okamela. Ku bile ni butokwi b’o ka mabaka a malalu a matuna.

Libaka la pili kikuli, Jehova u taleleza sepiso ya hae ya ku tahisa kuli “ya nyazeha a be sicaba se si mata.” (Isaya 60:22) Ka sishemo sa hae se si si ka libelelwa, balutiwa ba banca ba ba bat’o eza lule ba kolobelizwe sina Lipaki za Jehova mwa lilimo ze talu ze felile. Banna ba ba yeziseli ba tokwahala kuli ba tuse ba ba sa z’o kolobezwa bao ku fita fa buhulu bwa Sikreste.—Maheberu 6:1.

La bubeli kikuli, ba ba bile maeluda ka lilimo-limo se ba fukulize kwa musebezi o ba eza mwa puteho kabakala busupali kamba makulanu.

La bulalu kikuli, maeluda ba Sikreste ba bañata ba ba tukufalezwi cwale se ba li lilama za Tutengo twa Kutwano ni ba Lipatela, Tutengo twa Miyaho ya mwa Silalanda sa naha, kamba Tutengo twa Mandu a Mikopano. Fokuñwi ba tokwile ku fukuza ku ze ba eza ka ku tuhela bo buñwi bwa buikalabelo bwa bona mwa liputeho za habo.

Butokwi bo butuna bwa banna ba bañwi ba ba swanela bu kona ku talelezwa cwañi? Ku tokwahala hahulu ku twaeza. Bibele i susueza baokameli ba Sikreste ku twaeza ‘batu ba ba sepahala, ba ba ka kona ku luta ba bañwi hape.’ (2 Timotea 2:2) Pulelo ya “ku twaeza” i talusa ku luta mutu ilikuli a be ya kona, ya swanela, kamba ya cuukile. Ha lu boneñi m’o maeluda ba kona ku twaeleza banna ba bañwi ba ba swanela.

Mu Likanyise Mutala wa Jehova

Kaniti, Jesu Kreste n’a li mutu ya kona, ya swanela, ili ya cuukile mwa musebezi wa hae—mi ha ku komokisi! N’a twaelizwe ki yena Jehova Mulimu ka sibili. Ki lika mañi ze n’e tahisize kuli tukiso yeo ya tuto i be ye sebeza cwalo? Jesu n’a bulezi lika z’e talu, ka mo ku ñolezwi kwa Joani 5:20, kuli: ‘Ndate [1] u lata Mwana, mi [2] u mu bonisa z’a eza kaufela; mi u ka mu bonisa [3] misebezi ye mituna ku zeo.’ Ku tatubisisa ye ñwi ni ye ñwi ya likalulo zeo ku ka monyehela fa taba yeo ya ku twaeza batu.

Mu lemuhe kuli Jesu pili n’a ize: ‘Ndate u lata Mwana.’ Ku kalela kwa makalelo a pupo, Jehova ni Mwan’a hae ba bile ba ba latana hahulu. Liproverbia 8:30 i fa liseli fa silikani seo, kuli: ‘Ka linako zani, [na Jesu] ne ni se ni inzi ku Yena [Jehova Mulimu], ni nze ni mu sebeleza, ne li na y’a n’a tabela ka zazi ni zazi, ni nze ni tabile fapil’a hae kamita.’ Jesu n’a sa kakanyi kuli Jehova wa mu “tabela.” Mi Jesu n’a si ka pata tabo ya n’a na ni yona ha n’a nz’a sebeza ni Ndat’ahe. Ki ko kunde hakalo maeluda ba Sikreste ni batu be ba tusa ha ba li balikani ba ba latana, ili ba ba buniti!

Nto ya bubeli ya n’a bulezi Jesu kikuli Ndate ‘u mu bonisa z’a eza kaufela.’ Manzwi ao a tiisa ze bulezwi kwa Liproverbia 8:30, kuli Jesu n’a “inzi ku” Jehova lihalimu ni lifasi ha ne li nze li bupiwa. (Genese 1:26) Maeluda ba kona ku latelela mutala o munde hahulu w’o ka ku sebelisana hahulu ni batanga ba bukombwa, ili ku ba bonisa mwa ku ezeza hande misebezi ya bona. Kono haki ba ba sa z’o ketiwa ku ba  batanga ba bukombwa fela ba ba tokwa ku n’o twaezwanga. Ku cwañi ka za mizwale ba ba sepahala bao ka lilimo ze ñata ba itiisize mwa ku bata ku ba mwa buokameli kono ili bao ba sa li ku ba ba ketiwe? (1 Timotea 3:1) Maeluda ba swanela ku fa banna bao likelezo ze nongile ilikuli ba zibe mo ba lukela ku eza hande.

Ka mutala, mutang’a bukombwa mwendi u eza misebezi ya hae ka ku sepahala, ka bunako, ili ka tokomelo. Mwendi hape ki muluti yo munde. Mwendi mwa lika ze ñata u eza hande hahulu mwa puteho. Kono mwendi h’a lemuhi kuli u hanelelanga ku ezanga Bakreste ba bañwi ka bubamba. Maeluda ba tokwa ku eza “ka musa o lukela mutu ya butali.” (Jakobo 3:13) Esi neikaba hande eluda ha n’a ka ambola ni mutang’a bukombwa y’o, ili ku talusa hande-nde butata, ku fa mitala ye nongile, ni ku fa liakalezo ze ka mu tusa ku eza zwelopili? Haiba eluda a ‘fa kelezo ye lungilwe lizwai,’ z’a bulela li kana za amuhelwa hande. (Makolose 4:6) Kaniti, mutang’a bukombwa u ka nolofaza hahulu musebezi wa eluda h’a amuhela kelezo ifi ni ifi y’a fiwa.—Samu 141:5.

Mwa liputeho ze ñwi, maeluda ba swalelezi ku fa batanga ba bukombwa lituto ze sebeza. Ka mutala, ba yanga hamoho ni batanga ba bukombwa ba ba swanela ha ba potelanga bakuli kamba basupali. Ka nzila yeo, batanga ba bukombwa ba ba ni yeloseli mwa musebezi wa bulisana. Kono ku na ni ze ñata z’a kona ku eza mutang’a bukombwa kuli a ikezeze zwelopili kwa moya.—Mu bone sikwenda se si kwatasi se si na ni taba ye li “Ze Ba Kona ku Eza Batanga ba Bukombwa.”

Nto ya bulalu ye ne tahisize kuli lituto za n’a filwe Jesu li sebeze hahulu kikuli Jehova n’a nahana za kwapili ha n’a mu luta. Jesu n’a ize Ndat’ahe n’a ka bonisa Mwana ‘misebezi ye mituna ku zeo.’ Yeloseli ya n’a fumani Jesu ha n’a li fa lifasi-mubu ne i mu konisize ku ba ni mikwa ya n’a ka tokwa kuli a pete misebezi ya hae ya kwapili. (Maheberu 4:15; 5:8, 9) Ka mutala, Jesu u ka tuha a fiwa musebezi o buima luli—ili wa ku zusa ni ku atula bolule-lule ba batu bao cwale se ba shwile!—Joani 5:21, 22.

Maeluda kacenu ba swanela ku nahana za kwapili ha ba twaeza batanga ba bukombwa. Hailif’o ku kana kwa bonahala kuli maeluda ni batanga ba bukombwa ba ba talima za butokwi bwa cwale ba likani, kana ku ka ba cwalo haiba ku tomiwa puteho ye nca? Ku cwañi haiba ku tomiwa liputeho li sikai? Mwa lilimo ze talu ze felile, ne ku bile ni liputeho ze fitelela 6,000 mwa lifasi kaufela. Ki palo kwa butuna ya maeluda ni batanga ba bukombwa ba ba tokwahala kuli ba tokomele liputeho ze nca zeo!

Maeluda, kana mwa latelela mutala wa Jehova ka ku ba ni silikani se situna ni banna be mu twaeza? Kana mwa ba bonisa mwa ku petela misebezi ya bona? Kana mwa nahana za butokwi bwa kwapili? Ku latelela mutala wa  Jehova wa ku twaeza Jesu ku ka tahiseza ba bañata mipuzo.

Mu Si Sabi ku Fa Ba Bañwi Misebezi

Maeluda ba ba cuukile ba ba twaezi ku shakatela misebezi ye miñata ye buima ba kana ba zina-zina ku fa ba bañwi misebezi. Mwendi ne ba likile ku eza cwalo kwamulaho kono ne ku palile. Kacwalo ba kana ba ba ni moya wa kuli bona ka sibili ba na ni ku eza musebezi kuli u ezwe hande. Kono kana moya w’o wa lumelelana ni tato ya Jehova, ka mo i boniselizwe mwa Mañolo, ya kuli ba ba yeziseli hahulu ba twaeze ba ba si na yeloseli ye likana ni ya bona?—2 Timotea 2:2.

Muapositola Paulusi n’a swabile yo muñwi wa ba n’a tamanga ni bona misipili, yena Joani Mareka, ha n’a tuhelezi musebezi wa hae fahali mwa Pamfilia ni ku kutela habo. (Likezo 15:38, 39) Nihakulicwalo, Paulusi n’a si ka tuhelela butata b’o ku mu zwafisa ku twaeza ba bañwi. N’a ketile muzwale yo muñwi wa mucaha, ili Timotea, mi a mu twaeza musebezi wa bulumiwa. * (Likezo 16:1-3) Kwa Berea, balumiwa ne ba lwanisizwe hahulu kuli mane kwa pala kuli Paulusi a zwelepili ku ba teñi k’o. Kacwalo a siya puteho ye nca mwa pabalelo ya Silasi, muzwale yo muhulu ya yeziseli, ni Timotea. (Likezo 17:13-15) Ku si na kakanyo, Timotea n’a itutile ze ñata ku Silasi. Hasamulaho, Timotea ha n’a kona ku ba mwa buikalabelo bo buñwi, Paulusi a mu lumela kwa Tesalonika ku y’o susueza puteho teñi k’o.—1 Matesalonika 3:1-3.

Silikani sa bo Paulusi ni Timotea n’e si sa fahalimu fela, se si si na lilato, kamba se si si na maikuto. Ne ba latana. Paulusi ha n’a ñolela puteho ya kwa Korinte, n’a bulezi kuli Timotea, ya n’a lela ku lumela teñi k’o, n’a li ‘mwan’a hae ya latwa, ya sepahala ku Mulena.’ N’a ekelize kuli: ‘[Timotea] a mi hupulise mikwa ya ka ku Jesu Kreste.’ (1 Makorinte 4:17) Timotea n’a tusehile ka lituto za n’a mu file Paulusi, mi a ba ya kona ku peta misebezi ya hae. Mizwale ba bañata ba micaha ba bile batanga ba bukombwa, maeluda, kamba mane baokameli ba maeto kakuli ne ba tusehile ka tuto ye ne ba filwe ki banna-bahulu ba ba iyakatwa ili be ne ba ba isize hahulu pilu, sina mwa n’a ezelize Paulusi ku Timotea.

Maeluda, Mu Twaeze Ba Bañwi!

Ku si na kuli cwañi, bupolofita bo bu kwa Isaya 60:22 bu sweli bwa talelezwa kacenu. Jehova u sweli ku eza “ya nyazeha [ku ba] sicaba se si mata.” Kuli sicaba seo si zwelepili ku ba se si “mata,” si lukela ku okamelwa hande. Maeluda, mu nahane za mikwa ya mwa ku twaeleza banna ba ba ineezi ba ba swanela ku twaezwa. Mu bone teñi kuli mutang’a bukombwa yo muñwi ni yo muñwi wa ziba hande likalulo mw’a tokwa ku eza zwelopili. Mi mina mizwale ba ba kolobelizwe, mu tusehe hahulu ka pabalelo ye mu fiwa. Mu itusise kolo kaufela ya ku ekeza kwa bucaziba, zibo, ni yeloseli ya mina. Jehova kaniti u ka fuyola tukiso ye cwalo ya tuso ye lilato.—Isaya 61:5.

[Litaluso za kwatasi]

[Mbokisi fa likepe 30]

Ze Ba Kona ku Eza Batanga ba Bukombwa

Hailif’o maeluda ba swanela ku twaeza batanga ba bukombwa, ku na ni ze ñata ze ba kona ku eza batanga ba bukombwa kuli ba ikezeze zwelopili kwa moya.

—Batanga ba bukombwa ba swanela ku eza misebezi ya bona ka tukufalelo ni ka ku sepahala. Hape ba swanela ku ba ni mikwa ye minde ya ku ituta. Zwelopili i itingile hahulu fa ku ituta ni ku sebelisa lika ze itutiwa.

—Mutang’a bukombwa h’a itukiseza ku fa ngambolo kwa mukopano wa Sikreste, a si zina-zini ku kupa kuli eluda ya cuukile a fe liakalezo ka za mwa ku fela ngambolo yeo.

—Mutang’a bukombwa hape wa kona ku kupa eluda ku talimisisa mw’a fela ngambolo ya Bibele ni ku fa likelezo ka za likalulo mwa ku eza zwelopili.

Batanga ba bukombwa ba swanela ku kupa, ku amuhela, ni ku sebelisa kelezo ya maeluda. Kamukwaocwalo, zwelopili ya bona i ka ‘lemuhiwa ki batu kaufela.’—1 Timotea 4:15.