Za N’a Ezize Henry VIII ka za Bibele
Za N’a Ezize Henry VIII ka za Bibele
MWA buka ya hae ye li History of the English-Speaking Peoples (Volyumu 2), Winston Churchill n’a ñozi kuli: “Petuho ye n’e tahisize bulapeli bwa Protestanti ne i tahisize licinceho ze tuna ku za bulapeli. Ka nako yeo, Bibele ya kala ku kutekiwa hahulu kai ni kai. Baikale ne b’a nga kuli Buka ye Kenile yeo ne i na ni kozi ha ne i li mwa mazoho a ba ba si ka ituta mi kutwi ne i swanela ku baliwa fela ki baprisita.”
Taba yeo i zwelapili kuli: “Libibele mukatumbi ze hatisizwe, ili ze ne tolokilwe mwa Sikuwa ki bo Tyndal ni Coverdale, ne li bile teñi lwa pili kwa mafelelezo a mbumbi ya 1535, mi litoloko ze ñwi ne li sweli ku tahiswa. Mulonga n’o elelize baprisita ku susueza za ku bala Bibele.” Hamulaho wa lilimo ze mianda-nda za ku sa ziba Bibele, England ne i ka t’o ziba Bibele, kono f’o ne li kabakala tuso ya mulonga wa Henry VIII, isi keleke. *
“Bumai bo buñwi bo ne bu wezi ba mihupulo ya kale kikuli Mulonga n’o laezi kuli mwa Paris Libibele za mwa Sikuwa li hatiswe ka buñata. Neikaba Libibele za miputo ye buleta hande ku fita lifi kamba lifi za kwamulaho, mi ka September ya 1538, Mulonga wa laela kuli keleke ni keleke mwa naha i leke Bibele ye tuna ka ku fitisisa ya mwa Sikuwa, kuli i bulukwe mwa keleke ni keleke, k’o ba keleke ne ba kona ku itusisa yona ka bunolo ni ku i bala. Likopi ze silezi ne li bulukilwe mwa muyaho wa keleke wa St Paul’s, mwa muleneñi wa London, mi silundwamanje sa batu ne ba tutanela kwa sibaka seo ku y’o li bala. Kutwi sihulu ne ba ezanga cwalo ha ne ba kona ku fumana mutu ufi kamba ufi ya n’a na ni linzwi le li utwahala kuli a bale ka ku tumusa.”
Ka bumai, mwa linaha ze ñata, ba bañata ba sweli ku icawisa tohonolo ya bona ya ku bala Bibele kamita. Nto yeo ya bilaeza hahulu, kakuli ki Bibele fela ye “tahile ka Moya wa Mulimu, mi [i] na ni tuso kwa ku luta, ni ku kolisa, ni ku nyaza, ni ku hulisa ka ku luka.”—2 Timotea 3:16.
[Litaluso za kwatasi]
^ para. 3 Mulena Henry VIII n’a busize England ku kala ka 1509 ku isa ka
[Manzwi a bañi ba siswaniso fa likepe 32]
Henry VIII: Siswaniso se si mwa Royal Gallery kwa Kensington, se si zwa mwa buka ye bizwa The History of Protestantism (Vol. I)