Baluti ba Linzwi la Mulimu Ba Susuezwa ku Peta Musebezi wa Bona

MWA likweli ze sa z’o fela, baluti b’a likiti ze mianda-nda ne ba putehani inze ba amuhela litaelo. Mwa lifasi kaufela, ku kala ka kweli ya May, ne ba putehani kwa Mikopano ye mianda-nda ya Lipaki za Jehova ya “Baluti ba Linzwi la Mulimu.” Baputehi ne ba susuelizwe ku ituta, ku fita fa ku kona hande, ni ku peta musebezi wa bona wa ku ba baluti.

Kana ne mu bile teñi ku o muñwi wa yona mikopano yeo? Haiba ku cwalo, kaniti ne mu itebuhile lico ze nde za kwa moya ze n’e filwe ku yona mikopano ya bulapeli yeo ya Mulimu wa niti, yena Jehova. Cwale, ha lu lundululeñi hamoho tukiso yeo ye luta ya mukopano.

Lizazi la Pili—Mañolo A Buyelezwi A Na Ni Tuso kwa ku Luta

Muina-situlo wa mukopano n’a amuhezi baputehi h’a mufutumala ka ngambolo ye li “Mu Lutiwe, Mina Baluti ba Linzwi la Mulimu.” Ka ku ba ya n’a lutilwe ki Jehova, yena “Muluti ya Pahami,” Jesu Kreste n’a bile Muluti yo Mutuna. (Isaya 30:20, NW; Mateu 19:16) Kuli lu eze zwelopili mwa ku ba baluti ba Linzwi la Mulimu, ni luna lu lukela ku lutiwa ki Jehova.

Ku tuha f’o, kwa taha ngambolo ye li “Ku Luta za Mubuso ku Tahisa Miselo Ye Minde.” Tabo ni limbuyoti ze tahiswa ki ku tahisa balutiwa ne li koñomekilwe ka lipuhisano ze n’e ezizwe ni baluti ba Linzwi la Mulimu ba ba yeziseli.

Kwa latelela ngambolo ye nyangumuna ya toho ya taba ye li “Ku Nyangumunwa ki ‘Ze Tuna za Mulimu.’” Mwa lilimo za mwanda wa pili, “ze tuna” ze n’e ama Mubuso wa Mulimu ne li ezisize batu ku eza musebezi. (Likezo 2:11) Ni luna lwa kona ku susueza batu ku kala ku sebeza ka ku shaela lika “ze tuna” ze cwale ka lituto  ze mwa Mañolo ka za tiululo, zuho, ni bulikani bo bunca.

Ngambolo ye tatama ne i susuelize bote kuli ba “Tabele ku Luka kwa Jehova.” (Samu 35:27) Lu tusiwa ku bata ku luka ka ku ituta ku lata ze lukile ni ku toya ze maswe, ka ku ituta Bibele, ka ku hana ka ku tiya lika ze sinya kwa moya, ni ka ku hulisa buikokobezo. Ku eza cwalo ku ka lu sileleza kwa liango ze maswe, kwa mibonelo ya silifasi ka za bufumu, ni ku za ku itabisa ka zona za buhule ni mifilifili.

Ngambolo ye tuna ya toho ya taba ye li “Ku Ba Baluti Ba Ba Kona Luli Ba Linzwi la Mulimu,” ne i lu hupulisize kuli Jehova u lu bisa likombwa za hae ze kona ka Linzwi la hae, moya wa hae, ni kopano ya hae ya fa lifasi-mubu. Ka za ku itusisa Linzwi la Mulimu, mubuleli n’a lu susuelize kuli: “Ka mubulelelo wa swanisezo, mulelo wa luna ki ku zwisa lushango lwa Bibele fa makepe fo lu ñozwi, ni ku lu kenya mwa lipilu za bateelezi ba luna.”

Ngambolo ya pili ya ka ku tatamana fa mukopano w’o ne i na ni toho ya taba ye li “Ku Ituta Inze Lu Luta Ba Bañwi.” Kalulo ya makalelo ne i koñomekile kuli lu lukela ku latelela lipimo ze pahami za muzamao wa Sikreste ze lu luta ba bañwi. Kalulo ye tatama ne i lu susuelize ku “aba Linzwi la niti ka mukwa o lukile.” (2 Timotea 2:15) Kuli lu itute, lu tokwa ku ituta Bibele kamita ili ka tukufalelo, ku si na taba ni kuli lu sebelelize Mulimu ka nako ye kuma kai. Kalulo ya mafelelezo ya ngambolo ya ka ku tatamana ne i bonisize kuli Diabulosi u lu talimezi, ili ku bata ku luna mioya ye cwale ka buikuhumuso, moya wa ku bata tukuluho, ku ikutwa ku ba ba butokwa, muna, bunyemi, ndimbelela, ni ku batisisa milatu. Kono haiba lu hanela Diabulosi ka ku tiya, u ka saba ku luna. Kuli lu mu hanele, lu tokwa ku sutelela ku Mulimu.—Jakobo 4:7, 8.

Ngambolo ya ka nako ye lukela ye li “Mu Toye Ncwa ya ku Buha Maswaniso a za Mapunu” ne i lu bonisize mwa ku picukela kozi yeo ye kona ku sinya mayemo a luna a kwa moya. Mupolofita Habakuki n’a bulezi ka za Jehova kuli: “Wena wa meto a kenile a’ sa koni ku bona sibi, Wena ya sa koni ku talima bumaswe.” (Habakuki 1:13) Lu lukela ku ‘toya  bumaswe.’ (Maroma 12:9) Bashemi ne ba susuelizwe ku zamaisa m’o bana ba bona ba itusiseza Intaneti ni mo ba buhela TV. Mubuleli n’a ize ba ba tengamezi kwa ku buha maswaniso a za mapunu ba kupe tuso ku mulikani ya hulile kwa moya. Hape ne ku ka tusa ku yeya ni ku beya mwa munahano mañolo a cwale ka Samu 97:10; Mateu 5:28; 1 Makorinte 9:27; Maefese 5:3, 12; Makolose 3:5; ni 1 Matesalonika 4:4, 5.

Ngambolo ye n’e latelezi, ye li “Kozo ya Mulimu I Mi Sileleze,” ne i lu omba-ombile ka ku lu kolwisa kuli ha lu imezwa ki lipilaelo, lwa kona ku lwalisa Jehova milwalo ya luna. (Samu 55:22) Haiba lu fitisa maikuto a luna kaufela ku Jehova ka tapelo, u ka lu fa “kozo ya Mulimu,” ili ku cinala ni ku ombala kwa mwa pilu ko ku tahiswa ki swalisano ye nde ni yena.—Mafilipi 4:6, 7.

Lizazi la pili ne li felezi fo kunde luli ka ngambolo ye li “Jehova U Kabisa Batu Ba Hae Ka Liseli,” ye n’e talusize talelezo ya Isaya Kauhanyo 60. Ka ku ba mwahal’a lififi leo cwale li kwahezi lifasi, “bana ba macaba”—bona buñata bo butuna bwa batu ba ba sweli ku taha ba ba swana sina lingu—ba ikola liseli la Jehova hamoho ni Bakreste ba ba tozizwe. Ka ku ama kwa litimana 19 ni 20, mubuleli n’a talusize kuli: “Jehova h’a na ku ‘likela’ sina lizazi kamba ‘ku ya kwa lififi’ sina kweli. U ka zwelapili ku kabisa batu ba hae ka ku ba benyiseza liseli. Yeo luli ki sepiso ye nde ku luna ha lu nze lu pila mwa mazazi a mafelelezo a lifasi le, le li lififi.” Kwa mafelelezo a ngambolo, mubuleli a zibahaza ku zwisiwa kwa volyumu ya bubeli ya buka ya Bupolofita bwa Isaya—Liseli kwa Batu Kamukana. Kana se mu felize ku bala yona hatiso ye nca yeo?

Lizazi la Bubeli—Ba Ba Fitile Hande ku Ze Konisa za ku Luta Ba Bañwi

Hamulaho wa ku tatuba liñolo la zazi fa lizazi la bubeli, ne lu teelelize ka cisehelo kwa ngambolo ya bubeli ya ka ku tatamana fa mukopano ye li, “Likombwa ili Zeo Ka Zona Ba Bañwi Ba Ba Balumeli.” Babuleli be ne ba bile ni kabelo mwa ngambolo yeo ya likalulo ze talu ne ba koñomekile kalulo ye ñwi ni ye ñwi ya likalulo ze talu ze amiwa mwa ku tusa batu ku ba balumeli, ili ku hasanya lushango lwa Mubuso, ku hulisa cisehelo ye fumanwi, ni ku luta ba ba tabela ku mamela za n’a laezi Kreste. Ka tuso ya lipuhisano ni liponiso, ne lu konile ku bona sihulu mo lu kona ku lutela ba bañwi ku ba balutiwa.

Kalulo ye tatama ne i na ni toho ya taba ye li “Kwa Buitiiso bwa Mina Mu Ekeze Bulapeli.” Mubuleli n’a bonisize kuli se si li sa butokwa luli kikuli lu ‘tundamene ku isa kwa mafelelezo.’ (Mateu 24:13) Lu lukela ku itusisa litukiso kaufela z’a fa Mulimu—ili tapelo, tuto ya ka butu, mikopano, ni bukombwa—kuli lu hulise bulapeli bwa luna. Lu tokwa ku tibela litakazo ni misebezi ya silifasi ku filikanya kamba ku sinya bulapeli bwa luna.

 Batu ba ba katezi, ba ba imezwi ba kona ku imululwa cwañi kacenu? Ngambolo ye li “Ku Fumana Kimululo Mwatas’a Coko ya Kreste” ne i alabile puzo yeo. Ka sishemo, Jesu n’a memile balateleli ba hae kuli ba itwese coko ya hae ni kuli ba itute ku yena. (Mateu 11:28-30) Lu kona ku itwesa coko ya Jesu ka ku latelela hahulu mutala wa hae wa ku pila bupilo bo bu bunolo, bo bu itikanelezi. Lisupo ze tuna za yona ngambolo yeo ne li koñomekilwe ka lipuhisano ze n’e ezizwe ni ba ba nolofalize bupilo bwa bona.

Ye ñwi ya likezahalo ze tuna fa mikopano ye mituna ya Lipaki za Jehova ki kolobezo ya batanga ba Mulimu ba ba sa zo ineela. Muzwale ya n’a fa ngambolo ye li “Kolobezo I Libisa kwa Matohonolo A Matuna a ku Luta” n’a amuhezi ha mufutumala linumwana za kolobezo ni ku ba mema kuli ba abane mwa matohonolo a matuna ni ku fita a sebelezo. Baluti ba Linzwi la Mulimu ba ba sa zo kolobezwa ba ba kwanisa ze tokwahala ka ku ya ka Mañolo ba kona ku sebeleza fa ku kona ku fiwa buikalabelo bo bu shutana-shutana mwa puteho.

“Mu Likanyise Muluti Yo Mutuna” ne li yona toho ya taba ya ngambolo ya pili musihali. Ka lilimo-limo mwa lihalimu, Jesu n’a boni ka tokomelo za n’a eza Ndat’ahe, mi n’a mu likanyisize, mi kacwalo a ba Muluti Yo Mutuna. Ha n’a li fa lifasi-mubu, a itusisa milutelo ye sebeza hande, ye cwale ka ku buza lipuzo ze ezisa batu ku nahana ni ku itusisa liswanisezo ze bunolo kono ili ze utwisiseha. Jesu a toma lituto za hae fa Linzwi la Mulimu mi a bulela ka mafulofulo, h’a mufutumala, ni ka m’ata. Kana ne lu si ka susuezwa ku likanyisa Muluti Yo Mutuna?

Ngambolo ye ñwi ye nyangumuna ye li, “Kana Mwa Tabela ku Sebeleza Ba Bañwi?,” ne i lu susuelize ku likanyisa mutala wa Jesu wa ku sebeleza ba bañwi. (Joani 13:12-15) Mubuleli n’a susuelize ka ku nonga banna ba ba fitile ku ze konisa kuli ba be sina Timotea mwa ku tusa ba bañwi ha ku tokwahala. (Mafilipi 2:20, 21) Bashemi ne ba susuelizwe ku likanyisa Elikana ni Anna mwa ku tusa bana ba bona ku eza bukombwa bwa ka nako ye tezi. Mi banana ne ba susuelizwe ku likanyisa mutala wa Jesu Kreste ni wa mutangana Timotea wa ku tabela ku ifana. (1 Pitrosi 2:21) Hape ne lu susuelizwe ki ze n’e bulezwi ki ba ba ngile mihato ya ku tusa ba bañwi ha ne ku bile ni kolo ya ku eza cwalo.

Toho ya taba ya ngambolo ya ka ku tatamana ya bulalu n’e li ye li “Mu Tusehe hahulu ka Tuto ya Mulimu.” Mubuleli wa pili n’a koñomekile butokwa bwa ku ekeza kwa nako ye lu kona ku teeleza. Kuli lu kone ku eza cwalo, lwa kona ku kala ku eza tuto ya ka butu mwa nako ye kuswani ni ku lika ku i ekeza. Hape n’a susuelize baputehi ku balanga mañolo ni ku ñola lisupo kwa mikopano. Mubuleli wa bubeli n’a lu lemusize kuli lu tokwa ku kumalela kwa “mutala wa litaba ze pilisa.” (2 Timotea 1:13, 14) Kuli lu isileleze kwa litaba za muzamao o maswe ze hasanyiwa ki mitai ya makande, lituto za batu, ku batisisa mafosisa mwa Bibele, ni lituto za bakwenuheli, lu lukela ku yolisa linako za kuli lu eze tuto ya ka butu ni ku fumaneha kwa mikopano. (Maefese 5:15, 16) Mubuleli wa mafelelezo mwa ngambolo yeo ya ka ku tatamana n’a koñomekile butokwa bwa ku sebelisa ze lu ituta ilikuli lu kone ku tusiwa ka ku tala ki tuto ya Mulimu.—Mafilipi 4:9.

Ne lu tabile hahulu ku utwa ngambolo ye li “Litukiso Ze Nca za ku Lu Tusa ku Zwelapili kwa Moya”! Ne lu tabezi ku ziba kuli ku ka tuha ku zwisiwa buka ye nca ye li Mu Fumane Tuso kwa Lituto za Sikolo sa Bukombwa sa Teokratiki. Mubuleli ha n’a nze a talusa ze ku yona, ne lu nyolelwa hahulu ku ipumanela yona. Ka  za kalulo ya yona buka yeo ye na ni lisupo li sikai za ku sebeleza teñi, n’a ize: “Buka ye nca yeo ya tuto ha i lateleli muezezo wa silifasi ha i tolongosha likalulo ze 53 zeo za ku bala, ku bulela, ni ku luta hande. Muezezo w’o u tomile fa likuka za mwa Mañolo.” Buka yeo i ka bonisa m’o bapolofita, Jesu, ni balutiwa ba hae ne ba boniselize bunangu mwa ku luta. Ee, buka yeo ni lika ze nca ze ka ba mwa Sikolo sa Bukombwa sa Teokratiki kaniti li ka lu tusa ku ba baluti ba bande ni ku fita ba Linzwi la Mulimu.

Lizazi la Bulalu—Mu Be Baluti Kabakala Nako Ye Se Fitile

Hamulaho wa ku nyakisisa liñolo la zazi fa lizazi la mafelelezo, batu kaufela ne ba teelelize ka cisehelo kwa ngambolo ya mafelelezo ya ka ku tatamana fa mukopano, ye li, “Bupolofita bwa Malaki Bu Lu Bakanyeza Lizazi la Jehova.” Malaki n’a polofitile ibat’o ba lilimo ze mwanda ku zwa fo ne ba zwezi Majuda mwa Babilona. Hape ne se ba kutezi mwa bukwenuheli ni bumaswe, ili ku shwaula libizo la Jehova ka ku keshebisa milao ya hae ye lukile ni ka ku fa matabelo a lifolofolo ze shwile meto, ze toza, ni ze kula. Hape ne ba sweli ku leleka basali ba mwa bunca bwa bona, mwendi kuli ba nyale basali ba sihedeni.

Kauhanyo ya pili ya bupolofita bwa Malaki i lu kolwisa kuli Jehova wa lata batu ba hae. I koñomeka butokwa bwa ku ba ni sabo ye swanela ku Mulimu hamoho ni ku itebuha lika za kwa moya. Jehova u bata kuli lu mu fe ze nde ka ku fitisisa, ili ku mu lapela ka ku sa ba ni buitati. Sebelezo ya luna ku Mulimu ha i lukeli ku ba ya ku ezeza fela mulao, mi lu lukela ku ikalabela ku Mulimu.

Ka ku bonisa mo i sebeleza kauhanyo ya bubeli mwa linako za luna, mubuleli wa bubeli mwa ngambolo n’a buzize kuli: “Kana luna ka sibili lwa mamela kuli ‘ha ku na bumaswe bo bu fumanwa mwa milomo ya luna’?” (Malaki 2:6) Ba ba etelela mwa ku luta ba swanela ku bona teñi kuli ze ba bulela li tomile ka ku tiya fa Linzwi la Mulimu. Lu lukela ku toya bupumi bo bu cwale ka ku lelekana ko ku si ka luka.—Malaki 2:14-16.

Ha n’a bulela fa toho ya taba ye li “Ki Bomañi Ba Ba ka Punyuha Lizazi la Jehova?” mubuleli wa mafelelezo mwa ngambolo ya ka ku tatamana n’a lu tusize ku itukiseza lizazi la Jehova. Mubuleli y’o n’a ize: “Batanga ba Jehova ba omba-ombiwa hakalo ku ziba kuli Malaki kauhanyo 3, timana 17, i sweli ku ba ni talelezo ye tuna ku bona! I bulela kuli: “[Muñ’a] Bupilo  wa limpi a li: Ba ka ba ba ka mwa lizazi le ni tomile: e, ba be bufumu bwa ka tota; mi ni ka ba shwela makeke sina mutu h’a shwela mwan’a hae makeke ya mu sebeleza.”

Nto ye ñwi ye n’e zwile mubano fa mukopano ne li drama ya toho ya taba ye li “Mu Kuteke Tamaiso ya Jehova,” mo ne ku bonisizwe za bana ba Kora. Ndat’a bona niha n’a fetuhezi bo Mushe ni Aruni, bona ne ba zwezipili ku sepahala ku Jehova ni bayemeli ba hae. Kora ni balateleli ba hae ha ne ba bulailwe, bana ba Kora bona ne ba pilile. Ngambolo ye n’e latelezi ye li, “Mu Ipeye kwa Tamaiso ya Mulimu ka Busepahali,” ne i bonisize mo li sebeleza litaba za drama ku yo muñwi ni yo muñwi wa luna. Mubuleli n’a lemusize ka za likalulo ze silezi m’o Kora ni balateleli ba hae ne ba si ka eza hande: ku sa yemela tamaiso ya Jehova ka busepahali; ku ituhelela ku komiwa ki buikuhumuso, takazo ya libubo, ni muna; ku isa mamelelo kwa bufokoli bwa ba ba ketilwe ki Jehova; ku ba ni moya wa linonge; ku halala matohonolo a sebelezo e ne ba na ni ona; ni ku tuhelela bulikani kamba liswalisano za lubasi ku ba za butokwa ku fita busepahali ku Jehova.

Toho ya taba ya ngambolo ya nyangela ne i li “Ki Bomañi Ba Ba Luta Macaba Kaufela Niti?” Niti ye n’e talusizwe f’o ne si niti fela, kono n’e li niti ka za mulelo wa Jehova w’o Jesu Kreste n’a pakile ka za ona. Mubuleli n’a bulezi ka za niti ye ama litumelo, niti ye ama mulapelelo, ni niti ka za muzamao wa ka butu. Ka ku bapisa cwalo Bakreste ba mwa lilimo za mwanda wa pili ni Lipaki za Jehova kacenu, buikolwiso bwa kuli luli ‘Mulimu u mwateñi ku luna’ ne bu tiiselizwe.—1 Makorinte 14:25.

Hamulaho wa ngambolo ye kusufalizwe ya tuto ya Tora ya ku Libelela ya viki yeo, baluti ba Linzwi la Mulimu kaufela be ne ba li teñi ne ba susuelizwe ku eza se siñwi ka ngambolo ya mafelelezo ye li, “Ku Peta ka Putako Musebezi wa Luna wa ku Luta.” Ku nyakisisa ka bukuswani tukiso ya mukopano kamukana ne ku koñomekile butokwa bwa ku itusisa Mañolo mwa ku luta, mo lu kona ku bela baluti ba ba kona, ni butokwa bwa ku kolwa niti ye lu luta ba bañwi. Mubuleli n’a lu susuelize ku ‘ezisa zwelopili ya luna ku lemuhiwa ki batu kaufela’ ni ku ‘tokomela mizamao ya luna ni tuto ya luna.’—1 Timotea 4:15, 16.

Ne lu ikozi malyalya luli kwa Mukopano wa Sikiliti wa “Baluti ba Linzwi la Mulimu”! Haike lu likanyise Muluti wa luna ya Pahami, yena Jehova, ni Muluti wa luna yo Mutuna, yena Jesu Kreste, mwa ku luta ba bañwi linzwi la Mulimu.

[Mbokisi/Maswaniso a fa likepe 28]

Lihatiso Ze Nca Li Kwanisa Butokwi Bo Bu Ipitezi

Be ne ba bile kwa Mukopano wa Sikiliti wa “Baluti ba Linzwi la Mulimu” ne ba amuhezi ka cisehelo lihatiso ze peli ze swanela ku ba ze ka tusa hahulu kwa ku luta niti ya mwa Mañolo kwa batu ba mwa likalulo ze ñwi za lifasi. Trakiti ye li Kana Mu Na ni Moya O Sa Shwi? i ka tusa hahulu kwa ku kalisa lipuhisano ni ba ba pila mwa linaha m’o lipuo ze bulelwa teñi li sa bonisi shutano ye mwahal’a “moyo” ni “moya.” Trakiti ye nca yeo i bonisa hande-nde kuli moya wa shutana ni sibupiwa sa moya ni kuli batu ha ba shwa, ha ba fetuhangi libupiwa za moya.

Broshuwa ye li A Satisfying Life—How to Attain It, ne i tahisizwe kwa mafelelezo a lizazi la bubeli. Broshuwa yeo ne i lukiselizwe ku ba ya ku kalisisa ka yona lituto ni ba ba sa lumeli kuli ku na ni Mubupi ya na ni mikwa ya butu ni kuli ku na ni buka ye ñozwi ka moya wa Hae. Kana se mu konile ku itusisa lihatiso ze nca zeo mwa bukombwa bwa mina?

[Maswaniso a fa likepe 26]

Mwa muleneñi wa Milan, kwa Italy, ni kwa mikopano ye miñwi mwa lifasi kaufela, b’a mianda-nda ne ba kolobelizwe

[Siswaniso se si fa likepe 29]

Baputehi ne ba susuelizwe ki drama ye li “Mu Kuteke Tamaiso ya Jehova”