Misebezi Ye Minde I Lumbekisa Mulimu

KA MIZAMAO ni misebezi ya bona ye minde hahulu, Bakreste ba niti ba lumbekisa Mulimu. (1 Pitrosi 2:12) Seo si kona ku lemuhiwa ka ze ezahezi mwa Italy mwa lilimo za cwanoñu fa.

Mwa September ya 1997, zikinyeho ye m’ata ya lenga likalulo ze fitana-fitana za Marche ni Umbria, ku sinya mandu a bat’o eza 90,000. Likwata za Lipaki za Jehova kapili-pili za tusa balumeli sina bona ni ba bañwi. Ne ba filwe makundamo, likubo, litofu, mishini ye tahisa magesi, ni lika ze ñwi ze ne tokwahala. Bona buikatazo bwa ku tusa b’o ne bu lemuhilwe hande.

Mutende wa Il Centro ne u bihile kuli: “Ba pili ku fita ni lituso za kimululo mwa libaka ze ne amilwe n’e li Lipaki za Jehova ba kwa Roseto [mwa kalulo ya Teramo] . . . Kwand’a ku kopana ka linako ili ku lapela, bao ba ba sepahala ku Jehova ba sebeza ka nzila ye tusa, ku fa tuso ku ba ba nyanda, ku si na taba ni kuli ki ba bulapeli mañi.”

Muzamaisi wa tolopo ya Nocera Umbra, ye ñwi ya litolopo ze ne amilwe maswe, n’a ñolezi Lipaki kuli: “Na itumela ku mina ka butu ni ka pilu kaufela kwa tuso ye mu file kwa bayahi ba Nocera. Ni kolwa kuli bayahi ba yona kaufela ni bona ba ikutwa mo ni ikutwela.” Fahalimu a seo, ba Liluko Le Li Talima za mwa Naha ne ba file Congregazione Cristiana dei Testimoni di Geova (Puteho ya Sikreste ya Lipaki za Jehova) liñolo la bupaki ka za bunde bwa bona ni mendulu “ku paka musebezi o ba ezize ni mamelelo ye filwe mwa kozi ye ne ezahalile mwa lilalanda za Umbria ni Marche.”

Mwa October ya 2000, munda o sinya wa bayula mwa silalanda sa Piedmont kwa mutulo wa Italy. Lipaki hape kapili-pili b’a nga mihato ya ku tusa sicaba. Yona misebezi ye minde yeo hape ne i lemuhilwe. Silalanda sa Piedmont sa ba fa liñolo bakeñisa “musebezi wa butokwa wa buitomboli mwa ku tusa bayahi ba Piedmont be ne ba amilwe ki munda.”

Jesu Kreste n’a laezi balutiwa ba hae kuli: “Liseli la mina a li bonise batu cwalo, kuli ba bone misebezi ya mina ye minde, mi ba lumbe Ndat’a mina ya kwa lihalimu.” (Mateu 5:16) Lipaki za Jehova ka tabo ba lumbekisa Mulimu, isike bona, ka ku eza ‘misebezi ye minde’ ye tusa batu ba bañwi kwa moya ni mwa linzila ze ñwi.