Ba Na ni Mo Ba Talifezi

NGULI ya mwa Nigeria i li: “Ba bahulu ba na ni butali, kono banana ni bona ba na ni mo ba talifezi.” Edwin, eluda wa Sikreste wa mwa Nigeria, n’a fumani seo ku ba sa niti.

Zazi le liñwi, Edwin n’a fumani mbokisi ya sipi mwatas’a tafule ya hae.

Edwin a buza bana ba hae ba balalu kuli: “Ki mbokisi ya mañi ye?”

Emmanuel wa lilimo za buhulu ze 8 a alaba kuli: “Ki ya ka.” A akufela ku bulela kuli mbokisi ya sipi ye na ni mafumi ili ye eza lisentimita ze 12 mwa maneku kaufela ye na ni lisuba fahalimu ne li ya linubu za musebezi wa mwa lifasi kaufela wa Lipaki za Jehova. A talusa kuli: “Bakeñisa kuli ha ni yangi kwa Ndu ya Mubuso zazi ni zazi, ne ni ikatulezi ku panga mbokisi ye kuli ha ni sa itusisi mali a ka kwa ku leka lico, ni a beyange mwateñi.”

Bondat’ahe Emmanuel ne ba na ni mbokisi kwa ndu mwa ku bulukanga mali a ku ya ni ona kwa mukopano wa sikiliti ka silimo. Kono kabakala lika ze si ka libelelwa za mwa lubasi, ne ba itusisize mali a n’a li mwateñi. Ka ku bona teñi kuli mali a hae a linubu ha itusiswi kwa lika ze ñwi, Emmanuel a isa likapa la kale ku mucisezi wa lisipi kuli a yo li tiba. Ha s’a zibile mulelo wa likapa leo, mucisezi wa lisipi y’o a pangela Emmanuel mbokisi fa lingengema za lisipi. Michael, munyan’a Emmanuel wa lilimo za buhulu ze ketalizoho ni yena a kupa mbokisi.

Ka ku komokiswa ki likezo za banana, Edwin a ba buza se ne ba pangiselize mambokisi ao. Michael a alaba kuli: “Ni bata ku fa linubu!”

Emmanuel, Michael, ni Uchei, kaizel’a bona wa lilimo ze 9 ne ba bulukanga a mañwi kwa mali a bona a tuco-co e ne ba sa tokwi mi ne ba a beya mwa mambokisi bashemi ba bona ba sa zibi. Ne ba fumani kai muhupulo w’o? Banana bao ha se ba hulile fela ni ku kona ku swala mali, bashemi ba bona ne ba ba lutile ku beyanga mali mwa mambokisi a linubu za kwa Ndu ya Mubuso. Ku si na kuliñi, bana ne ba sebelisize ze ne ba itutile.

Mambokisi ao ha ne a tezi, a kwahululwa. Mali a bona kaufela n’a fitile fa $3.13 ya mwa United States (K11,299.30)—mi ao haki mali a manyinyani mwa naha m’o lituwelo za ka silimo li li mali a manyinyani fela. Linubu za ka ku itatela ze cwalo li tusa kwa musebezi wa ku kutaza wa Lipaki za Jehova o s’o eziwa cwale mwa linaha ze 235 mwa lifasi kaufela.