Lipuzo Ze Zwa kwa Babali

Lipimo ze n’e tomilwe mwa Mulao wa Mushe ka za linyalo mwahal’a mutu ni wahabo li sebeza cwañi kwa Bakreste kacenu?

Mulao wa n’a file Jehova kwa sicaba sa Isilaele ha u buleli ze ñata ka za mikiti ya linyalo ni mo i swanela ku ezezwa. Kono ya bonisa liswalisano za mwa linyalo ze ñwi ze ne hanisizwe. Ka mutala, kwa Livitike 18:6-20, lu fumana mukoloko wa liswalisano ze haniswa ze ama “muhabo yo mutuna, NW.” Taba yeo i bonisa ka butungi kuli ki mutu wa sihabo ya cwañi ya sa lukelwi ku eza ni yena tobali. Kiniti kuli Bakreste ha ba yo mwatas’a Mulao wa Mushe kamba ku ba mwa tamo ya litaelo za ona. (Maefese 2:15; Makolose 2:14) Niteñi, ha ku talusi kuli Bakreste b’a kona ku sa nahana taba yeo ha ba keta wa ku nyalana ni yena. Ku na ni mabaka a mañata a tahisa kuli ku be cwalo.

Libaka la pili kikuli, ku na ni milao ya silifasi ye zamaisa linyalo la mwahal’a mutu ni muhabo yo mutuna, mi ka mutomo Bakreste ba tamehile ku kuteka milao ya mwa naha mo ba pila. (Mateu 22:21; Maroma 13:1) Kiniti kuli milao ye cwalo ya shutana mwa sibaka ni sibaka. Milao ye miñata ya cwale ya mufuta w’o sihulu i tomilwe fa ku nyakisisa za sihozo. Ki taba ye zibahala kuli linyalo la mwahal’a mutu ni muhabo yo mutuna li kana la tahisa buhole ni matuku kwa bana. Ka libaka leo ni ka ku ‘ipeya mwatas’a ba ba beilwe fa bulena,’ Bakreste ba ba nyalana ba kuteka milao ya linyalo ya mwa sibaka.

Ku tuha f’o ku na ni taba ya se si amuheleha ni se si sa amuhelehi mwa sibaka mwa pila mutu. Ibat’o ba mwa lizo kaufela ku na ni milao ni miezezo ye zamaisa linyalo mwahal’a mutu ni muhabo yo mutuna ka sipepo, hañata ili k’u nga manyalo a cwalo ku ba a sindoe mi kacwalo ki sitangu. Nihaike kuli sihabo se si talusizwe si kana sa shutana hahulu mwa lizo ze shutana-shutana, buka ya The Encyclopædia Britannica ili, “ka mulao, haiba sihabo mwahal’a batu ba babeli ki se situna, ni ku hanisa kamba ku paleliswa tobali mwahal’a bona ku tiya hahulu.” Kacwalo, ni ha ku si na liswalisano za sindoe, Bakreste ha ba tabeli ku eza lika ka ku keshebisa lizo ze tomilwe kamba ku eza lika ze sisumukisa mwa sibaka mo ba pila, ilikuli ba si ke ba tahisa nyazo fa puteho ya Sikreste kamba fa libizo ya Mulimu.—2 Makorinte 6:3.

Lu si libali lizwalo la luna le lu filwe ki Mulimu. Batu kaufela ba pepilwe ba na ni temuho ya ze lukile ni ze si ka luka, ze nde ni ze maswe. (Maroma 2:15) Mazwalo a bona a ba bulelela ze swanela ni ze nde ni ze si za ka taho ni ze fosahezi, konji haiba mazwalo a bona ao a sinyizwe kamba ku bulaiwa ki likezo ze maswe. Jehova n’a amile kwa taba yeo ha n’a file Maisilaele mulao wa hae o hanisa linyalo mwahal’a mutu ni muhabo yo mutuna. Lu bala kuli: “Mu si ke mwa likanyisa se si ezwa mwa naha ya Egepita mo ne mu yahile pili, kamba se si ezwa mwa naha ya Kanana ye ni mi isa ku yona, mi mu si ke mwa ya ka mikwa ya bona.” (Livitike 18:3) Bakreste ba babalela mazwalo a bona a lutilwe ki Bibele mi ha ba a lumelezi kuli a sinyiwe ki litemuho ze maswe za ze lukile ni ze si ka luka za macaba.—Maefese 4:17-19.

Kacwalo lu ka liñi? Nihaike kuli Bakreste ha ba yo mwatas’a Mulao wa Mushe, mazwalo a bona a ba bulelela kuli linyalo mwahal’a mutu ni muhabo yo mutuna—sina ka ndate ni mwana, me ni mwana, mutu ni kaizel’a hae—ha li lumelelwi ni hanyinyani mwahal’a Bakreste. * Sihabo ha si nze si yanduluka, Bakreste ba lemuha kuli ku na ni milao ye zamaisa linyalo la ka mulao ni kuli ku na ni lipimo ze amuheleha kwa sicaba ni ku za sizo. Zeo li swanela ku nyakisiswa ka tokomelo ilikuli lu latelele taelo ya mwa Mañolo ye li: “Linyalo li kutekiwe kwa batu kaufela.”—Maheberu 13:4.

[Litaluso za kwatasi]