Ku Talimana ni “Muutwa mwa Mubili”

“Sishemo sa ka sa ku likana.”—2 MAKORINTE 12:9.

1, 2. (a) Ki kabakalañi ha lu sa lukeli ku komokiswa ki taba ya kuli lu tahelwa ki miliko ni butata? (b) Ki kabakalañi ha lu kona ku ba ni buikolwiso ha lu talimana ni miliko?

“BATU kaufela ba ba lata ku pila ka bulumeli bo bu li teñi ku Jesu Kreste, ba ka nyandiswa.” (2 Timotea 3:12) Ki kabakalañi ha ku li cwalo? Kakuli Satani u ñañelela kuli batu ba sebeleza Mulimu ka mabaka a buitati, mi u lika mw’a konela kaufela ku yemela buipapato bwa hae. Jesu n’a kile a lemusa baapositola ba hae ba ba sepahala kuli: “Satani u mi kupile kuli a mi uluse sina buloto.” (Luka 22:31) Jesu n’a ziba hande kuli Mulimu u tuhelela Satani ku lu lika ka matata a’ butuku. Kono f’o haki kuli butata kaufela bo bu lu tahela mwa bupilo bu simuluha ku Satani kamba badimona ba hae. (Muekelesia 9:11) Kono Satani u bata ku itusisa nzila ifi kamba ifi y’a kona kaufela kuli a felise busepahali bwa luna.

² Bibele i lu bulelela kuli lu si komokiswi ki miliko ya luna. Ku si na taba ni manyando a kana a lu wela, haki nto ye komokisa kamba ye si ka libelelwa. (1 Pitrosi 4:12) Mane, “butata ki bu li buñwi bo bu tahela banabahabo [luna] ba ba mwa lifasi.” (1 Pitrosi 5:9) Kacenu, Satani u sineneketa hahulu batanga ba Mulimu kaufela. Diabulosi u tabela ku lu bona lu nyandiswa ka matata a mañata-ñata a swana sina miutwa. Kuli a eze cwalo, u itusisa muinelo wa hae wa linto ka nzila yeo ka yona a kona ku ekeza kamba ku tunafaza ‘miutwa mwa mubili wa luna.’ (2 Makorinte 12:7) Niteñi, litwaniso za Satani ha li lukeli ku felisa busepahali bwa luna. Sina Jehova h’a ka “fa nzila ya ku zwa” kwa miliko kuli lu kone ku i tiyela, u ka eza nto ye swana ha lu talimana ni matata a swana sina miutwa mwa mubili wa luna.—1 Makorinte 10:13.

Mwa ku Talimanela ni Muutwa

3. Jehova n’a alabile cwañi Paulusi ha n’a mu kupile ku zwisa muutwa mwa mubili wa hae?

³ Muapositola Paulusi n’a kupile Mulimu ku zwisa muutwa mwa mubili wa hae. “Ka taba yeo ni lapezi Mulena hahulu, kuli nto yeo i zwiswe ku na.” Jehova n’a alabile cwañi kupo ye tiile ya Paulusi? N’a ize: “Sishemo sa ka sa ku likana; kakuli mata a ka a petahala  mwa mifokolo.” (2 Makorinte 12:8, 9) Ha lu nyakeñi kalabo yeo mi lu boneñi mo i kona ku lu tuseza ku talimana ni butata kaufela bo bu lu kataza bo bu swana sina muutwa.

4. Paulusi n’a tusizwe mwa linzila lifi ki sishemo se situna sa Jehova?

⁴ Mu lemuhe kuli Mulimu n’a susuelize Paulusi ku itebuha sishemo se situna s’a bonisizwe kale ka Kreste. Kaniti, Paulusi n’a fuyozwi mwa linzila ze ñata. Jehova ka lilato n’a mu file tohonolo ya ku ba mulutiwa, niha n’a kile a ba mulwanisi ya situhu wa balateleli ba Jesu. (Likezo 7:58; 8:3; 9:1-4) Hasamulaho, Jehova ka sishemo a fa Paulusi misebezi ye miñata ye tabisa. Tuto ye lu ituta teñi ya iponelwa. Niheba mwa miliko ye mituna ka ku fitisisa, lu sa na ni limbuyoti ze ñata ze lu lukela ku itebuha. Lu si tuheleli ni hanyinyani miliko ya luna ku lu libalisa bunde bo buñata bwa Jehova.—Samu 31:19.

5, 6. (a) Jehova n’a lutile Paulusi cwañi kuli m’ata a Hae a “petahala mwa mifokolo”? (b) Mutala wa Paulusi n’o bonisize cwañi kuli Satani ki lihata?

⁵ Sishemo se situna sa Jehova ki se si likani ka nzila ye ñwi. M’ata a Mulimu ki a likani mwa ku lu tusa ku talimana ni miliko ya luna. (Maefese 3:20) Jehova n’a lutile Paulusi kuli m’ata a Hae a “petahala mwa mifokolo.” Kamukwaufi? Ka lilato, n’a file Paulusi m’ata kaufela a n’a tokwa kuli a talimane ni muliko wa hae. Ku tuha f’o, ku itiisa kwa Paulusi ni ku sepa Jehova ka ku tala ne ku bonisize bote kuli m’ata a Mulimu n’a sweli ku tula ku munna y’o ya fokola, wa muezalibi. Cwale mu nahane m’o seo si amela Diabulosi, ya ipapata kuli batu ba sebeleza Mulimu ha ba pila fela hande ni ku sa ba ni butata. Busepahali bwa Paulusi ne bu swana inge kuli musawani y’o n’a tompolozwi!

⁶ Ki yo Paulusi, ya n’a tusanga Satani mwa ku lwanisa Mulimu, ya n’a nyandisanga hahulu Bakreste, ili Mufalisi wa cisehelo y’o ku si na kakanyo n’a pilanga bupilo bwa mbombolelwa kakuli n’a pepezwi mwa lubasi lo lu fumile. Paulusi cwale n’a sebeleza Jehova ni Kreste sina “yo munyinyani kwa baapositola.” (1 Makorinte 15:9) Kacwalo, n’a ipeya ka buikokobezo kwa m’ata a sitopa se si etelela sa Bakreste ba mwa lilimo za mwanda wa pili. Mi n’a sweli ku itiisa ka busepahali niha n’a na ni muutwa mwa mubili. Ka ku swabisa Satani, miliko ya mwa bupilo ne i si ka fokolisa cisehelo ya Paulusi. Paulusi ni kamuta n’a si ka libala sepo ya kuli n’a ka ba mwa Mubuso wa kwa lihalimu wa Kreste. (2 Timotea 2:12; 4:18) Cisehelo ya hae ne i sa konwi ku feliswa ki muutwa ufi kamba ufi, ni ko n’o ka ba o butuku cwañi. Haike cisehelo ya luna ni yona i zwelepili ku tiya cwalo! Ka ku lu tiisa mwa miliko ya luna, Jehova wa lu kutekehisa ka tohonolo ya ku tusa mwa ku bonisa kuli Satani ki lihata.—Liproverbia 27:11.

Lituso za Jehova Ki za Butokwa

7, 8. (a) Jehova u matafaza batanga ba hae kacenu ka ku itusisa lika mañi? (b) Ki kabakalañi ku bala ni ku ituta Bibele kamita ha ku li kwa butokwa hahulu mwa ku talimana ni miutwa ye mwa mubili wa luna?

⁷ Kacenu, Jehova u tiisa Bakreste ba ba sepahala ka moya wa hae o kenile, Linzwi la hae, ni kopano ya mizwale ba luna ba Sikreste. Sina muapositola Paulusi, lwa kona ku lwalisa Jehova milwalo ya luna ka tapelo. (Samu 55:22) Mulimu nih’a si ke a felisa miliko ya luna, wa kona ku lu fa butali bwa kuli lu kone ku talimana ni yona, mane niheba miliko ye t’ata hahulu ku talimana ni yona. Jehova hape wa kona ku lu tiisa—ku lu fa ‘mata a matuna hahulu.’—2 Makorinte 4:7.

⁸ Lu fumana cwañi tuso yeo? Lu lukela ku ituta Linzwi la Mulimu ka tundamo, kakuli ki mona m’o luli lu fumana likutazo za hae. (Samu 94:19) Mwa Bibele, lu bala manzwi a susueza a batanga ba Mulimu ha ne ba nze ba kupa kuli Mulimu a ba tuse. Likalabo za Jehova, zeo hañata li kopanyelezanga ku omba-omba ka manzwi, ki ze lu lukela ku nyakisisa. Tuto i ka lu tiisa ilikuli “mata ao a matuna hahulu ibe a Mulimu, isi a luna.” Sina ha lu tokwa ku ca ka zazi kuli lu hule ni ku tiya, lu tokwa ku ifepa cwalo fa manzwi a Mulimu kamita. Kana lwa ezanga cwalo? Haiba ku cwalo,  f’o lu ka bona kuli ku amuhela kwa luna “mata ao a matuna hahulu” ku lu tusa ku tiyela miutwa ya swanisezo ifi kamba ifi y’e lu kataza cwale.

9. Maeluda ba kona ku tusa cwañi ba ba nyanda?

⁹ Maeluda ba Sikreste ba ba saba Mulimu ba kona ku “ba sina mukunda ha ku fuka moya” wa maswenyeho, “sina sisabelo ha ku taha liñungwa” la manyando. Maeluda, ba ba bata ku ba mo u bulelela cwalo moya, ba kupa Jehova ka buikokobezo ni ka busepahali ku ba fa “lilimi le li talifile” ilikuli ba kone ku ziba mwa ku alabela ba ba nyanda ka manzwi a swanela. Manzwi a maeluda a kona ku ba sina pula ye suluha hande ye batisa ni ku omba-omba moya wa luna mwa miinelo ye t’ata mwa bupilo bwa luna. Ka ku bulela ka ku ‘tiisa ba lipilu ze shekesha,’ maeluda kaniti ba tiisa mizwale ni likaizeli ba bona ba Sikreste ba ba kana ba sweli ku katala kamba ku lembwala kabakala muutwa o muñwi o mwa mubili wa bona.—Isaya 32:2; 50:4; 1 Matesalonika 5:14.

10, 11. Batanga ba Mulimu ba kona ku susueza cwañi ba bañwi ba ba mwa miliko ye mituna-tuna?

¹⁰ Batanga ba Jehova bote ki lilama za lubasi lwa hae lo lu swalisani lwa Sikreste. Ee, “kaufela lu lilama ba bañwi za ba bañwi” mi lu “swanezi ku latana.” (Maroma 12:5; 1 Joani 4:11) Lu peta cwañi swanelo yeo? Ka ku ya ka 1 Pitrosi 3:8, lu eza cwalo ka ku ba ni ‘maikuto a li mañwi, ka ku ba ni mukekecima, ni ka ku ba ni musa’ ku bahabo luna kaufela mwa tumelo. Haili ka za ba ba sweli ku talimana ni muutwa o butuku hahulu mwa mubili, ibe banana kamba ba bahulu, kaufel’a luna lwa kona ku iyakatwa bona ka nzila ye ipitezi. Ka mukwa ufi?

¹¹ Lu lukela ku satalala ku nahananga za manyando a bona. Haiba ha lu na makeke, silikani, kamba lu ba ba si na mamelelo, lwa kona ku ekeza kwa manyando a bona ka ku sa ziba. Ku lemuha kwa luna miliko ya bona ku lukela ku lu susueza ku tokomela ze lu bulela, mo lu li bulelela, ni mo lu ezeza lika. Ha lu ba ba ba na ni sepo ili ba ba susueza, lu kana lwa tusa ku fukuza kwa butuku bo butuna bwa miutwa ifi kamba ifi y’e ba kataza. Ka ku eza cwalo, lu ka fita fa ku ba tiisa pilu.—Makolose 4:11.

M’o Ba Bañwi Ba Talimanezi Hande ni Yona

12-14. (a) Mukreste yo muñwi n’a ezize cwañi kuli a kone ku talimana ni butuku bwa kansa? (b) Mizwale ni likaizeli ba Sikreste ba musali y’o ne ba mu tusize ni ku mu susueza cwañi?

¹² Ha lu nze lu atumela mafelelezo a mazazi a maungulo a, “manyando” a sweli ku ekezeha ka zazi. (Mateu 24:8) Kacwalo, miliko mwendi i ka kataza mañi ni mañi fa lifasi, sihulu batanga ba ba sepahala ba Jehova, ba ba bata ku eza tato ya hae. Ka mutala, mu nge Mukreste yo muñwi ya n’a li sikombwa sa ka nako ye  tezi. N’a fumanwi ni butuku bwa kansa mi likeleswa za hae ze panga mati ni ze tusa mwa ku lwanisa matuku ne li na ni ku zwisiwa ka ku pazulwa. Yena ni bomunn’a hae ha ne ba til’o ziba kuli n’a kula butuku b’o, kapili-pili ba lapela ku Jehova tapelo ye telele. Hasamulaho, kaizeli y’o a bulela kuli ne ba bile mwa kozo ye tuna. Niteñi, n’a tiyezi linako za mwa bupilo ze nde ni ze maswe, sihulu ha n’a talimana ni butata bwa hamulaho wa likalafo.

¹³ Kuli a talimane ni muinelo wa hae, kaizeli y’o n’a likile ku ituta za n’a kona ku ituta kaufela ka za kansa. N’a buzize madokota ba hae. Mwa Tora ya ku Libelela ni Awake!, ni lihatiso ze ñwi za Sikreste, a fumana litaba za ze ezahezi mwa bupilo ze bonisa m’o batu ba bañwi ne ba konezi ku pila ba na ni butuku b’o. Hape n’a balile mañolo a swanela a mwa Bibele a bonisa kuli Jehova wa kona ku tiisa batu ba hae mwa miliko, ni litaba ze ñwi ze tusa.

¹⁴ Taba ye ñwi ye bonisa mwa ku tiyela ku zwafa ne i na ni manzwi a’ butali a, a’ li: “Mutu ya sa lati siango ni ba bañwi, u bata z’a lakaza yena a nosi.” (Liproverbia 18:1) Taba yeo kacwalo ne i file kelezo ye: “Mu ezange liango.” * Kaizeli y’o u li: “Ba bañata ne ba ni bulelezi kuli ne ba ni lapelelanga; ba bañwi ne ba ni lizezanga luwaile. Maeluda ba babeli kamita ne ba ni lizezanga luwaile ku ni lekula. Ne ni amuhelanga lipalisa ni mañolo a mañata-ñata. Mane, ba bañwi ne ba ni lukisezanga lico. Hape, ba bañata ne ba itakalezanga ku ni isa kwa likalafo.”

15-17. (a) Mukreste yo muñwi n’a konile cwañi ku pila ni butata bo ne bu tahisizwe ki likozi? (b) Ba mwa puteho ne ba file tuso mañi?

¹⁵ Mutang’a Jehova yo muñwi wa ka nako ye telele mwa tolopo ya New Mexico, mwa U.S.A., n’a bile mwa likozi za fa mukwakwa ze peli. N’a holofezi mwa mulala ni fa maheta, mi butuku bwa hae bwa mwa lingongo—ili butuku bwa n’a s’a kulile lilimo z’e 25—bwa ekezeha. U li: “Ne ni na ni butata bo butuna hahulu bwa ku inuka ni ku shimba nto ifi kamba ifi ye n’e fitelela li-kilogram z’e peli kwa bukiti. Kono ku lapela ku Jehova ka tukufalelo ku ni tiisize hahulu. Litaba ze lu itutile mwa Tora ya ku Libelela ni zona li ni tiisize. Ye ñwi ne i talusize Mika 6:8, ili ku bonisa kuli ku zamaya ka buikokobezo ni Mulimu ku talusa ku lemuha bufokoli bw’a na ni bona mutu. Seo ne si ni tusize ku lemuha kuli niha ne ni kula cwalo, ha ni lukeli ku zwafa, niha ne ni sa koni ku tanda nako ye ñata mwa bukombwa ka mo ne ni batela. Sa butokwa hahulu-hulu ki ku mu sebeleza ka milelo ye minde.”

¹⁶ Hape u li: “Maeluda kamita ne ba ni babazanga ha ne ni ikatazanga ku fumaneha kwa mikopano ni ku zwela mwa bukombwa bwa mwa simu. Mitangana ni likalibe ne ba ni lumelisanga ka ku ni kumbata. Mapaina ne ba li ba pilutelele ku na mi hañata ne ba cincanga litomahanyo za bona ha ne ni kulanga hahulu. Lizazi ha ne li siyo hande, ka musa ne ba ni bitulanga kwa misipili ya makutisezo kamba ku ni mema ku ya ni bona kwa lituto za bona za Bibele. Mi bakeñisa kuli ne ni sa koni ku shimba mukotana wa libuka, bahasanyi ba bañwi ne ba ni shimbelanga lihatiso za ka mwa mikotana ya bona ha ne ni yanga mwa bukutazi.”

¹⁷ Mu lemuhe m’o maeluda ba mwa puteho ni balumeli ba bañwi ne ba konezi ku tusa likaizeli ba babeli bao kuli ba kone ku pila ni butuku bwa bona bo bu swana sina muutwa. Ne ba ba ezeza lika ze ñwi ili ka musa, ka mulelo wa ku kwanisa butokwi bwa kwa moya, bwa kwa mubili, ni bwa mwa maikuto. Kana seo ha si mi susuezi ku tusa mizwale ni likaizeli ba bañwi ba ba mwa butata? Ni mina ba banca mwa kona ku tusa ba mwa puteho ya mina ba ba sweli ku talimana ni miutwa mwa mubili wa bona.—Liproverbia 20:29.

18. Lu kona ku fumana susuezo mañi mwa litaba ze ezahezi ze hatisizwe mwa limagazini za Tora ya ku Libelela ni Awake!?

¹⁸ Mwa limagazini za Tora ya ku Libelela ni  Awake!, se ku hatisizwe litaba ze ñata ze ezahezi ni ze bonwi za Lipaki ba bañata ba ba konile ku pila ni matata mwa bupilo, mi ba sa zwelapili cwalo. Ha mu nze mu bala kamita litaba zeo, mu ka bona kuli mizwale ni likaizeli ba luna ba Sikreste ba bañata mwa lifasi kaufela se ba tiyezi bubotana, ku bulaiwa kwa balatiwa ba bona mwa likozi, ni miinelo ye sabisa ya mwa linako za lindwa. Ba bañwi ba pila ni matuku a fokolisa. Ba bañata ha ba koni ku eza buñata bwa lika za mwa bupilo ze bunolo zeo ba ba iketile ba li keshebisa. Makulanu a bona ki muliko o mutuna hahulu, sihulu haiba ha ba koni ku abana hahulu mwa misebezi ya Sikreste ka mo ba batela. Ba itebuha hahulu tuso yeo mizwale ni likaizeli ba bona, banana ni ba bahulu, ba ba fa!

Ku Itiisa ku Tahisa Tabo

19. Ki kabakalañi Paulusi ha n’a kona ku taba niha n’a na ni miliko ni mifokolo ye swana sina miutwa?

¹⁹ Paulusi n’a tabile ha n’a boni mwa n’a mu tiiselize Mulimu. N’a ize: “Ka tabo luli, ni lata ku itumba ka mifokolo ya ka, kuli ni apeswe mata a Kreste. Kabakaleo, mo ni lata ki mwa mifokolo, ni mwa linyefulo, ni mwa bubotana, ni mwa manyando, ni mwa maswabi, kabakala Kreste. Kakuli nako ye ni fokola, ki yona nako ye ni na ni mata.” (2 Makorinte 12:9, 10) Kabakala miinelo ya n’a ipumani ku yona, Paulusi n’a kona ku bulela ka buikolwiso kuli: “Ha ni buleli ka za ku tokwa; kakuli ni itutile ku kolwa mwa litaba lifi kamba lifi ze ni inzi ku zona. Ni ziba ku pila ka ku kokobezwa, mi ni ziba ku pila ka ku atelwa ki lika. Kai ni kai, ni mwa linto kaufela, ni itutile ku pila nihaiba ka ku kula lico kamba ku lapa, ku atelwa kamba ku taelelwa. Ni kona linto kamukana ka Kreste ya ni fa mata.”—Mafilipi 4:11-13.

20, 21. (a) Ki kabakalañi ha lu kona ku ba ni tabo ka ku yeya “lika ze sa bonahali”? (b) Ki lifi ze ñwi za “lika ze sa bonahali” ze mu sepa ku bona mwa Paradaisi ya fa lifasi?

²⁰ Kacwalo he, ka ku tiyela miutwa mwa mubili ya swanisezo ifi kamba ifi, lwa kona ku ba ni tabo ye tuna ka ku bonisa bote kuli m’ata a Jehova a sweli ku petahala mwa mifokolo ya luna. Paulusi n’a ñozi kuli: “Ha lu zwafi; kono mutu wa luna . . . wa mwahali yena unz’a shemunwa sinca ka zazi ni zazi. Kakuli ñalelwa ya luna, ye bubebe, ya nako ya cwale, inze i lu fumanisa bufumu bwa kanya, bo bu sa likanyiswi, bo bu sa feli; Kakuli . . . lu talima ze sa bonahali; kakuli . . . ze sa bonahali ki za ku ya ku ile.”—2 Makorinte 4:16-18.

²¹ Buñata bwa batu ba Jehova kacenu ba sepa ku pila mwa lifasi la hae la Paradaisi ni ku ikola limbuyoti z’a sepisize. Limbuyoti ze cwalo li kona ku ngiwa ku ba “ze sa bonahali” ku luna kacenu. Kono nako i taha i cibilika f’o lu ka iponela limbuyoti zeo ka meto a luna, ee, ni ku ikola zona ku ya ku ile. Ye ñwi kwa limbuyoti zeo ikaba kimuluho ya ku sa tola lu pila ni butata bufi kamba bufi bo bu swana ni muutwa! Mwan’a Mulimu u ka ‘felisa misebezi ya Diabulosi’ ni ku ‘felisa ya sweli mubuso wa lifu mwa mata a hae.’—1 Joani 3:8; Maheberu 2:14.

22. Lu lukela ku ba ni buikolwiso ni tundamo mañi?

²² Kacwalo, ku si na taba ni muutwa o mwa mubili wa luna ili o lu kataza ka nako ya cwale, haike lu zwelepili ku u tiyela. Sina Paulusi, lu ka ba ni m’ata a ku eza cwalo ka Jehova, y’o ka sishemo a lu fa m’ata. Ha se lu pila mwa Paradaisi ya fa lifasi, lu ka lumbeka Jehova yena Mulimu wa luna ka zazi kabakala lituso ze nde kaufela z’a lu ezeza.—Samu 103:2.

[Litaluso za kwatasi]

Ne Mu Ka Alaba Cwañi?

• Ki kabakalañi Diabulosi h’a lika ku felisa busepahali bwa Bakreste ba niti, mi u lika ku eza cwañi cwalo?

• M’ata a Jehova a “petahala mwa mifokolo” ka nzila ifi?

• Maeluda ni ba bañwi ba kona ku susueza cwañi ba ba katazwa ki matata?

[Lipuzo za Tuto]

[Siswaniso se si fa likepe 18]

Halalu, Paulusi n’a kupile kuli Mulimu a zwise muutwa mwa mubili wa hae