Mukunda Ha ku Fuka Moya

FAHALIMU a malundu a mañwi a matelele a kwa Yurope, mwa kona ku fumana tucacani to tu tiile to tu bizwa alpine rose. Ona tucacani to tunyinyani t’o twa lipalisa ze buheha tu melanga sikutu hañata ibat’o ba ku lapama fafasi kuli tu isileleze kwa moya o maswe o fukanga mwa libaka ze lumbile. Moya o maswe wo, o sa kuzangi, u bat’o fezanga limela za alpine ka ku fukuza mufutumala wa zona, ku anya mukamo mwa moya ni mwa mubu, ni ku kumula mibisi ya zona.

Limela za alpine rose hañata li bandukanga ku sinyiwa ki moya ka ku mela mwa miandala a mwahal’a macwe. Nihaike libaka zeo li kana za ba ni mubu o munyinyani, miandala ya mwa macwe, ya tusa ku sileleza limela zeo kwa moya ni ku li konisa ku buluka mezi. Limela zeo ha li bonahalangi ibata iba buñata bwa nako mwa silimo, kono mwa mbumbi limela zeo li kabisanga malundu a masabelo a zona ka lipalisa za bufubelu bo bu benya.

Mupolofita Isaya n’a talusize kuli “makwambuyu” ne ba ka ketiwa ki Mulimu, mi yo muñwi ni yo muñwi ku bona n’a ta ba sina “mukunda ha ku fuka moya.” (Isaya 32:1, 2) Mwatas’a ketelelo ya Mulena, yena Kreste Jesu, makwambuyu ba kwa moya bao, kamba baokameli, ne ba ka ba sina macwe a sa zikinyehi, ili ku yema ka ku tiya mwa nako ya ñalelwa kamba ya manyando. Ne ba ka fa silelezo ye swanela mwa nako ya likayamana ni ku tusa ba ba tokwile kuli ba kone ku buluka mezi a kwa moya a bona a’ zwa mwa Linzwi la Mulimu.

Sina moya o buhali, nyandiso, zwafo, kamba makulanu z’a kona ku lenga Mukreste, ili ku anya tumelo ya hae haiba h’a si ka silelezwa. Maeluda ba Sikreste b’a kona ku sileleza ka ku teeleza ka tokomelo kwa butata bwa hae, ku fa kelezo ye tomile mwa Bibele, ni ku mu susueza kamba ku mu fa tuso ye swanela. Ka ku swana sina Kreste Jesu, Mulen’a bona ya ketilwe, ba bata ku tusa ba “ba hasani.” (Mateu 9:36) Mi ba lakaza ku tusa ba bañwi ba ba sinyizwe ki moya o maswe wa lituto za buhata. (Maefese 4:14) Tuso ye cwalo ka nako ye swanela i kona ku ba ya butokwa.

Miriam u talusa kuli: “Ne ni kile na tunkeha hahulu kwa pilu muta balikani ba ka ba batuna ne ba fulalezi puteho, mi ka nako ye swana yeo bondate ne ba kula butuku bwa ku lota mali mwa booko. Mwa ku lika ku felisa maikuto a ka a maswabi a matuna, na kalisa ku tambalanga ni mutangana wa silifasi. Hamulahonyana wa fo, ka ku ikutwa ku sa swanela, na zibisa maeluda ba puteho kuli ne ni bata ku fulalela niti kakuli ne ni kozwi kuli Jehova n’a sa koni ku ni lata.

“Ka nako ya kaulakanyi yeo, eluda ya mufelañeke a ni hupulisa buñata bwa lilimo ze ne ni bile paina wa kamita. A ni taluseza kuli ka nako kaufela n’a tabiswa ki busepahali bwa ka, mi ka sishemo a ni kupa kuli ni lumelele maeluda ku ni tusa, kuli ba ni kolwise kuli Jehova wa ni lata. Lilato le ne ba ni bonisize mwa nako ye t’ata yale, ne li bile sina ‘mukunda’ ku na mwahal’a moya o fuka maswe wa kwa moya o n’o ni ambekile. Mwa kweli i liñwi, na felisa siango sa ka ni mulikan’a ka yale wa mutangana, mi ni zwezipili ku zamaya mwa niti haisali.”

Maeluda ba ikutwa ku kutisezwa ha ba bona Bakreste sina bona ha ba eza hande kwa moya ka tuso ya silelezo ye ba filwe ka nako ye lukela. Mi yona ‘mikunda’ yeo, i lu fa mitamuno ya lituso ze ñata-ñata za kwa moya ze lu ka ikola ka nako ya Puso ya Kreste ya Lilimo ze Sikiti.