Lipuzo Ze Zwa kwa Babali

Kwa Maroma 12:19, kana muapositola Paulusi n’a akaleza kuli Bakreste ha ba swaneli ku halifa, ha n’a bulezi kuli: “Balatiwa, mu si ke mwa kutisa bumaswe ili mina, kono mu fe buhali sibaka”?

Kutokwa. Mwa taba yeo, muapositola Paulusi n’a isa mamelelo kwa buhali bwa Mulimu. Kono f’o haki kuli Bakreste ni ko ba halifa ni ko ba sa halifi ha ku na taba. Bibele i lu eleza hande-nde ka za ku sa halifa. Ki ye mitala ya likelezo ze ñwi za Mulimu.

“Lisela ku fela pilu, u tuhele ku halifa. U si ke wa filikana, ki ku isa fela kwa sibi.” (Samu 37:8) “Mutu nihaikaba ufi kamba ufi ya ka halifela mwanahabo, u ka swanelwa ki ku atulwa.” (Mateu 5:22) “Misebezi ya nama ya zibahala: Ki ku buka, ni buhule, ni mikwa ye masila, ni bubelete, ki ku lapela milimu, ni buloi, ki sitoyo, ni lifapano, ni lifufa, ni buhali.” (Magalata 5:19, 20) “Ze baba kaufela, ni ku nyema, ni buhali, ni komano, ni matapa . . . li zwiswe ku mina.” (Maefese 4:31) “Mutu kaufela ibe ya teeleza kapili, ya liyeha kwa ku bulela, ya liyeha ni kwa ku halifa.” (Jakobo 1:19) Hape, buka ya Liproverbia i kuta-kutela ku lu eleza ka za ku sa halifa kamba ku nyema-nyema ka za lifoso ze nyinyani ni bufosi bwa batu.—Liproverbia 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Taba mo li bulezwi ze kwa Maroma 12:19 i lumelelana ni likelezo ze cwalo. Paulusi n’a elelize kuli lilato la luna li tokwe buikeziso, kuli lu fuyole ba ba lu nyandisa, kuli lu nahane ka za bunde bwa ba bañwi, kuli lu si ke lwa kutisa bumaswe ka bumaswe, ni kuli lu like ka t’ata ku pilisana mwa kozo ni batu kaufela. Ku tuha f’o, a susueza kuli: “Balatiwa, mu si ke mwa kutisa bumaswe ili mina, kono mu fe buhali sibaka; kakuli ku ñozwi kuli: Ku likanyisa ki kwa ka, ki Na ni ka kutisa, ku bulela Mulena.”—Maroma 12:9, 14, 16-19.

Ee, lu si tuheleli buhali ku tahisa kuli lu yolise misuha. Zibo ya luna ya miinelo ni katulo ya luna ha li si ka petahala. Haiba lu tuhelela buhali ku tahisa kuli lu yolise misuha, hañata lu ka fosa. Seo si ka tahisa kuli mulelo wa Diabulosi, yena Sila sa Mulimu, u petahale. Ko kuñwi, Paulusi n’a ñozi kuli: “Niha mu ka halifa mu si ke mwa eza sibi; mu si ke mwa likelelwa ki lizazi mu nze mu halifile, mi mu si ke mwa fa [Diabulosi] sibaka.”—Maefese 4:26, 27.

Nto ye nde, ye butali ku i eza, ki ku tuhelela Mulimu ku atula kuli ya lukela ku kutisezwa bumaswe ki mañi ni kuli a bu kutisezwe lili. U kona ku eza cwalo ka ku ziba litaba kaufela, mi koto kaufela y’a fa i ka bonisa katulo ya hae ye lukile. Lwa kona ku bona kuli seo ki sona s’a talusa Paulusi kwa Maroma 12:19 ha lu lemuha ku kutela kwa hae ku bulela manzwi a’ kwa Deuteronoma 32:35, 41, a’ kopanyeleza manzwi a’ li: “Ki Na ya ka likanyisa ni ku lifisa.” (Mu bapanye Maheberu 10:30.) Kacwalo, nihaike manzwi a’ li “a Mulimu” h’a yo mwa timana yeo mwa Sigerike, batoloki ba cwale b’a sikai ba a beile mwa Maroma 12:19. Ki kabakaleo ku bile ni litoloko ze cwale ka “Mulimu a yolise misuha” (The Contemporary English Version); “mu fe buhali bwa Mulimu sibaka” (American Standard Version); “haike Mulimu a fe koto haiba a lata” (The New Testament in Modern English); “mu fe Mulimu sibaka sa ku fa koto.”—The New English Bible.

Niha lu nyandiswa ki lila za niti, lwa kona ku bonisa kuli lu sepile Jehova Mulimu ka mwa n’a taluselizwe ku Mushe, kuli: ‘[Muñ’a] Bupilo, [Muñ’a] Bupilo, ki Mulimu ya na ni makeke ni musa, ya sa akufi ku halifa, ya tezi sishemo, ya na ni niti; ya tiiseza ku shemuba batu mwa masika a bona a’ eza lule, ya swalela batu bumaswe, ni buikuhumuso, ni sibi; kono ki ya sa latuli mulatu wa ya fosize.’—Exoda 34:6, 7.