Mu Kona ku Punyuha Cwañi Mafelelezo a Lifasi Le?

BIBELE i talusa mafelelezo a muinelo wo wa linto ku ba “lizazi la buhali, lizazi la maswenyeho ni la ñalelwa; ki lizazi la ku sinya ni la ku bulaya, lizazi la lififi ni la bunsu, lizazi la malu ni la lififi le linsu.” (Zefania 1:15) Kaniti leo haki lizazi le ne mu ka libelela ka tabo! Kono muapositola Pitrosi n’a elelize Bakreste ba bañwi ku ina inze ba “libelezi ni ku akufisa lizazi la Mulimu, le ka lona lihalimu li ka fela ku ca, mi linto li ka shengunukiswa ki mulilo o buhali. Kono ka sepiso ya hae, lu talimezi lihalimu le linca, ni lifasi le linca, mo ku yahile Ku Luka.”—2 Pitrosi 3:12, 13.

Pitrosi f’o n’a sa buleli za sinyeho ya lihalimu ni lifasi za luli. “Lihalimu” ni “lifasi” za n’a talusa Pitrosi mwa taba yeo li yemela lipuso za batu za cwale ze si ka luka ni nyangela ya batu ba ba maswe. ‘Lizazi la Muñ’a Bupilo’ ha li na ku sinya lona lifasi ka sibili, kono “ba ba maswe ba ku [lona] ba ka timiswa.” (Isaya 13:9) Kacwalo ku ba ba “tonga, ni ba ba lila, kabakala bumaswe kaufela” bo bu sweli ku eziwa ki batu ba ba maswe kacenu, lizazi la Jehova li ka ba lizazi la puluso.—Ezekiele 9:4.

Kacwalo, mutu u kona ku puluswa cwañi fa “lizazi la [Muñ’a] Bupilo, le lituna, le li sabisa”? “Linzwi la [Muñ’a] Bupilo” le ne li bulezwi ku yo muñwi wa bapolofita ba hae li alaba puzo yeo, kuli: “Mutu ni mutu ya ka lapela Libizo la [Muñ’a] Bupilo u ka piliswa.” (Joele 1:1; 2:31, 32) Lipaki za Jehova ba ka tabela ku mi tusa ku ituta ze ku talusa ku lapela libizo la Jehova.