“Mwendi Cwale Mu Ka Utwa Butuku”

KANA mu kile mwa utwa manzwi ao? Mwendi n’a bulezwi ki dokota kamba nasi a si ka mi fa kale kalafo ye akalelizwe.

Mwendi ne mu si ka hana kalafo yeo kuli mu si ke mwa utwa butuku bo ne bu libelelwa. Kono ne mu tiyezi butuku b’o kuli mu fole. Ha ku na ni butuku bo butuna, ku amuhela kamba ku hana kalafo ye butuku ku kona ku pilisa mutu kamba ku mu tahiseza lifu.

Nihaike haki kamita lu kana lwa tokwa ku tatubiwa ki mualafi, kaufel’a luna ka ku ba batu ba ba si ka petahala lu tokwa kalimelo, kamba hakululo, fokuñwi mane nihaiba ye kana ya ba ye butuku. (Jeremia 10:23) Ka ku koñomeka kuli banana ba i tokwa, Bibele i li: “Bungulunde bu hanelezi mwa pilu ya mwana; kono tupa ya kalimelo i ka bu felisa ku yena.”—Liproverbia 22:15.

F’o, tupa i yemela m’ata a bushemi. Ki niti kuli ki banana ba sikai ba ba lata kalimelo. Haiba i ama koto ye ñwi, i kana ya ba nyemisa. Kono bashemi ba ba butali ili ba ba lilato ba isa mamelelo kwa ku konda kwa mwana, isi fela kwa ku filikana kwa hae. Bashemi ba Sikreste ba ziba kuli Linzwi la Mulimu li bulela niti ha li li: “Nako y’a kalimelwa mutu, ha ku bonahali kuli ku na ni tabo, kono u utwa maswabi; bo kwapili, ku kalimelwa ko, ku ka beya muselo wa kozo ni wa ku luka, ku ba ba likilwe cwalo.”—Maheberu 12:11; Liproverbia 13:24.

Kono haki banana fela ba ba tokwa kalimelo. Ni ba bahulu ba i tokwa. Bibele i bulela ku ba bahulu ha i li: “Swala tuto ka tata, u si ke wa i nyefula, u i buluke, kakuli ki bupilo bwa hao.” (Liproverbia 4:13) Ee, batu ba ba butali, ba bahulu ni banana, ba ka amuhela kalimelo ye tomile fa Linzwi la Mulimu, yona Bibele, kakuli ku eza cwalo kwa mafelelezo ku ka bukeleza bupilo bwa bona.