Kreste U Zamaisa Puteho ya Hae

“A mu bone, na, ni inzi ni mina ka mazazi kaufela, ku isa kwa mafelelezo a [muinelo wa linto, NW].”—MATEU 28:20.

1, 2. (a) Ha n’a fa taelo ya ku tahisa balutiwa, Jesu ya zusizwe kwa bafu n’a sepisizeñi kwa balateleli ba hae? (b) Jesu n’a zamaisize cwañi puteho ya makalelo ya Sikreste?

JESU KRESTE, Muzamaisi wa luna ya zusizwe kwa bafu, a si ka kambamela kale kwa lihalimu, n’a iponahalize kwa balutiwa ba hae ni ku bulela kuli: “Ni filwe bulena kaufela mwa lihalimu ni mwa lifasi. Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela. Mi, a mu bone, na, ni inzi ni mina ka mazazi kaufela, ku isa kwa mafelelezo a [muinelo wa linto, NW].”—Mateu 23:10; 28:18-20.

² Jesu n’a si ka fa fela balutiwa ba hae musebezi o pilisa wa ku tahisa balutiwa ba bañwi, kono hape n’a ba sepisize kuli n’a ka ba ni bona. Litaba ze ezahezi za Bukreste bwa makalelo, ka mo ku ñolezwi mwa buka ye mwa Bibele ya Likezo, li bonisa hande-nde kuli Kreste n’a itusisize m’ata a n’a filwe kwa ku zamaisa puteho ye n’e sa z’o tomiwa. N’a lumile “mutiisapilu” ya n’a sepisizwe—ili moya o kenile—kuli u tiise balateleli ba hae ni ku etelela misebezi ya bona. (Joani 16:7; Likezo 2:4, 33; 13:2-4; 16:6-10) Jesu ya zusizwe kwa bafu n’a sebelisize mangeloi a’ zamaiswa ki yena kuli a tuse balutiwa ba hae. (Likezo 5:19; 8:26; 10:3-8, 22; 12:7-11; 27:23, 24; 1 Pitrosi 3:22) Hape, Muzamaisi wa luna n’a file ketelelo kwa puteho ka ku lukisa kuli banna ba ba swanela ba be sitopa se si etelela.—Likezo 1:20, 24-26; 6:1-6; 8:5, 14-17.

3. Ki lifi lipuzo ze ka nyakisiswa mwa taba ye?

³ Kono ku cwañi ka za miteñi ya luna, ona “mafelelezo a muinelo wa linto”? Jesu Kreste u zamaisa cwañi puteho ya Sikreste kacenu? Mi lu kona ku bonisa cwañi kuli lwa amuhela tamaiso ya hae?

Mulena U Na Ni Mutanga ya Sepahala

4. (a) Ki bomañi ba ba li “mutanga ya sepahala, ya na ni kutwisiso”? (b) Mulena u file mutanga y’o musebezi mañi?

⁴ Jesu ha n’a polofita ka za sisupo sa ku ba  teñi kwa hae, n’a ize: “Ki mañi mutanga ya sepahala, ya na ni kutwisiso, y’a ka beya Mulen’a hae ku lisa batanga ba hae, ku ba fa lico ka nako ye lukela? U na ni mbuyoti mutanga yo, nako y’a ka fita Mulen’a hae, a mu fumana a eza cwalo. Kaniti na mi bulelela, kuli u ka mu beya fa bukombwa bwa z’a luwile kaufela.” (Mateu 24:45-47) “Mulena” ki Muzamaisi wa luna, yena Jesu Kreste, mi u ketile “mutanga ya sepahala, ya na ni kutwisiso”—ili sitopa sa Bakreste ba ba tozizwe ba ba fa lifasi—ku tokomela z’a luwile kaufela za fa lifasi.

5, 6. (a) Mwa pono ya n’a amuhezi muapositola Joani, “malambi a gauda a 7” ni “linaleli ze 7” li yemelañi? (b) Taba ya kuli “linaleli ze 7” li mwa lizoho la bulyo la Jesu i bonisañi?

⁵ Buka ye mwa Bibele ya Sinulo i bonisa kuli mutanga ya sepahala, ya na ni kutwisiso u zamaiswa luli ki Jesu Kreste. Mwa pono ya “lizazi la Mulena,” muapositola Joani n’a boni “malambi a gauda a 7; mi fahali a malambi, [a] bona yo muñwi ya swana inge mwan’a mutu,” y’o “ku la bulyo n’a sweli linaleli ze 7.” Ka ku taluseza Joani yona pono yeo, Jesu n’a ize: “Kunutu ya linaleli ze 7 z’o boni mwa lizoho la ka la bulyo, ni ya malambi a gauda a 7. Linaleli ze 7 ki mangeloi a Likeleke ze 7, mi malambi a 7 ki likeleke ze 7.”—Sinulo 1:1, 10-20.

⁶ “Malambi a gauda a 7” a yemela liputeho kaufela za niti za Sikreste ze li teñi mwa “lizazi la Mulena,” le ne li kalile ka 1914. Kono “linaleli ze 7” bo? Sapili, ne li yemela baokameli kaufela ba ba tozizwe ka moya be ne ba babalela liputeho zeo za mwa lilimo za mwanda wa pili. * Baokameli bao ne ba li mwa lizoho la bulyo la Jesu—mwatas’a tamaiso ni ketelelo ya hae. Ee, Kreste Jesu n’a zamaisa sitopa kamukana sa mutanga. Kono cwale, baokameli ba ba tozizwe ki ba banyinyani. Tamaiso ya Kreste i fita cwañi kwa liputeho za Lipaki za Jehova ze fitelela 93,000 ze mwa lifasi kamukana?

7. (a) Jesu u itusisa cwañi Sitopa Se Si Etelela kuli a zamaise liputeho ze mwa lifasi kaufela? (b) Ki kabakalañi ha ku konwa ku bulelwa kuli baokameli ba Sikreste ba ketiwa ka moya o kenile?

⁷ Sina mo ne ku bezi mwa lilimo za mwanda wa pili, sitopanyana sa banna ba ba swanela ba ba zwa mwahal’a baokameli ba ba tozizwe se li sona Sitopa Se Si Etelela, se si yemela sitopa kaufela sa mutanga ya sepahala, ya na ni kutwisiso. Muzamaisi wa luna u itusisa Sitopa Se Si Etelela seo kwa ku keta banna ba ba swanela—ibe ba ba tozizwe kamba kutokwa—ku ba maeluda mwa liputeho. Kacwalo, moya o kenile, w’o Jehova a file Jesu m’ata a ku itusisa ona, u peta kalulo ye tuna hahulu. (Likezo 2:32, 33) Sapili, baokameli bao ba lukela ku kwanisa lipimo ze tomilwe mwa Linzwi la Mulimu, le li tahile ka moya o kenile. (1 Timotea 3:1-7; Tite 1:5-9; 2 Pitrosi 1:20, 21) Lipabazo ni liketo li eziwa hamulaho wa tapelo ni ka ketelelo ya moya o kenile. Hape, batu ba ba ketiwa ba fa bupaki bwa kuli ba beya muselo wa ona moya w’o. (Magalata 5:22, 23) Kacwalo, kelezo ya Paulusi i sebeza ka ku swana kwa maeluda kaufela, ibe batoziwa kamba kutokwa. Kelezo yeo i li: “Mu itibelele, mi mu lise mutapi kaufela o mu beilwe balibeleli ba ona ki Moya o Kenile.” (Likezo 20:28) Banna ba ba ketilwe bao ba fiwa ketelelo ki Sitopa Se Si Etelela mi ba lisa puteho ka ku itatela. Ka ku eza cwalo, Kreste u inzi ni luna cwale mi u zamaisa puteho.

8. Kreste u itusisa cwañi mangeloi kwa ku zamaisa balateleli ba hae?

⁸ Jesu hape u itusisa ona mangeloi luli mwa ku etelela balateleli ba hae kacenu. Ka ku ya ka nguli ya buloto ni mufuka, nako ya kutulo i ka taha kwa “mafelelezo a [muinelo wa linto, NW].” Mulena n’a ka itusisa bomañi mwa ku kutula? Kreste n’a ize: “Bakutuli ki  mangeloi.” N’a ekelize kuli: “Mwan’a mutu u ka luma mangeloi a hae, kuli a kumule mwa mubuso wa hae ba ba sitatalisa batu, ni ba ba eza bumaswe.” (Mateu 13:37-41) Hape, sina lingeloi ha ne li etelezi Filipi kuli a y’o fumana munna wa Muetopia, kacwalo, ku na ni bupaki bo buñata kacenu bwa kuli Kreste u itusisa mangeloi a hae kwa ku etelela musebezi wa Bakreste ba niti kuli ba fumane batu ba ba sepahala.—Likezo 8:26, 27; Sinulo 14:6.

9. (a) Kreste u zamaisa puteho ya Sikreste ka nzila ifi kacenu? (b) Ki ifi puzo ye lu lukela ku nyakisisa haiba lu bata ku tusiwa ki tamaiso ya Kreste?

⁹ Kwa wetulusa hakalo ku ziba kuli Jesu Kreste kacenu u zamaisa balutiwa ba hae ka Sitopa Se Si Etelela, moya o kenile, ni ka mangeloi! Ba bañwi kwa batanga ba Jehova niha ne ba ka kauhanywa kwa Sitopa Se Si Etelela ka nakonyana kabakala nyandiso kamba ze ñwi cwalo, Kreste n’a ka zwelapili ku ba fa tamaiso ka moya o kenile ni ku ba tusa ka mangeloi. Kono lu tusiwa ki tamaiso ya hae haiba fela lu i amuhela. Lu kona ku bonisa cwañi kuli lwa amuhela tamaiso ya Kreste?

‘Mu Utwe . . . Mu Ipeye Kwatasi’

10. Lu kona ku bonisa cwañi likute kwa maeluda ba ba ketilwe mwa puteho?

¹⁰ Muzamaisi wa luna u file liputeho “batu ba ba li limpo”—ba “bañwi kuli ba be baapositola, ba bañwi ba be bapolofita, ba bañwi ba be babuleli.” (Maefese 4:8, 11, 12, NW) Mo lu b’a ngela ni mo lu ba ezeza ku bonisa hande-nde ka za haiba lwa amuhela tamaiso ya Kreste. Kwa swanela kuli lu “be ni buitumelo” kwa banna ba ba fitile ku ze konisa za mañolo bao Kreste a fanile. (Makolose 3:15) Hape ba swanelwa ku kutekiwa ki luna. Muapositola Paulusi n’a ñozi kuli: “Ba bahulu ba ba lisa hande, u ba talime kuli ba lukela ku kutekiwa mane ku fita.” (1 Timotea 5:17) Lu kona ku bonisa cwañi kuli lwa itebuha ni ku kuteka banna-bahulu—maeluda, kamba baokameli—ba ba mwa puteho? Paulusi u alaba kuli: “Mu utwe bazamaisi ba mina, mi mu ipeye kwatas’a bona.” (Maheberu 13:17) Ee, lu lukela ku ba utwa ni ku ipeya kwatas’a bona.

11. Ki kabakalañi taba ya ku kuteka tukiso ya maeluda ha i ama ku peta za buineelo bwa luna?

¹¹ Muzamaisi wa luna u petehile. Banna b’a file sina limpo bona ha ba si ka petahala. Kacwalo, fokuñwi ba kana ba fosa. Niteñi, ki kwa butokwa kuli lu zwelepili ku sepahala kwa tukiso ya Kreste. Mane, ku peta za buineelo ni kolobezo ya luna ku talusa kuli lwa lemuha tukelo ya baokameli ba mwa puteho ba ba ketilwe ka moya ni ku ipeya kwatas’a bona ka ku itatela. Ku kolobezwa kwa luna ‘ka libizo la moya o kenile’ ki bupaki kwa nyangela bwa kuli lu amuhela moya o kenile ni ku lumela kalulo ye u peta mwa milelo ya Jehova. (Mateu 28:19) Kolobezo ye cwalo i talusa kuli lwa swalisana ni ona moya w’o mi ha lu ezi nto ifi kamba ifi ye ka u tibela ku sebeza mwahal’a balateleli ba Kreste. Bakeñisa kuli moya o kenile u peta kalulo ye tuna mwa ku babazwa ni ku ketiwa kwa maeluda, kana luli lwa kona ku peta za buineelo bwa luna haiba lu sa sebelisani hande ni tukiso ya maeluda ba mwa puteho?

12. Juda u fa mitala ifi ka za ku sa kuteka tamaiso, mi i lu lutañi?

 ¹² Mwa Mañolo ku na ni mitala ye lu luta butokwa bwa ku utwa ni ku ipeya kwatasi. Ka za be ne ba nyefula banna ba ba ketilwe mwa puteho, mulutiwa Juda n’a file mitala ye milalu ya temuso, ka ku bulela kuli: “Ba ka tahelwa ki bumai! Kakuli ba zamaile nzila ya Kaine, mi ba matezi bupumi bwa Balami bwa ku bata bufumu; ba ipulaya ka ku ikuhumusa sina Kora.” (Juda 11) Kaine n’a keshebisize kelezo ya Jehova ye lilato mi ka bomu n’a latelezi kezo ye situhu ya bubulai. (Genese 4:4-8) Balami niha n’a kuta-kutezwi ku elezwa ki Mulimu, n’a likile ku kuta batu ba Mulimu ka ku bata ku fiwa limpo. (Numere 22:5-28, 32-34; Deuteronoma 23:5) Kora yena n’a na ni buikalabelo bwa hae bo bunde mwa Isilaele, kono n’a bu halala. A kukueza petuhelo ku Mushe, mutang’a Mulimu, ya n’a li ya musa ka ku fitisisa fa lifasi. (Numere 12:3; 16:1-3, 32, 33) Bo Kaine, Balami, ni Kora ne ba wezwi ki likozi. Mitala yeo i lu luta hande-nde kuli lu n’o teelezanga kwa kelezo ya bao Jehova a file buikalabelo mi lu ba kuteke!

13. Mupolofita Isaya n’a polofitile lituso mañi ka za ba ba ipeya kwatas’a tukiso ya maeluda?

¹³ Ki mañi ya n’a si ke a bata ku tuseha ka tukiso ye tuna ya okamelo yeo Muzamaisi wa luna a i tomile mwa puteho ya Sikreste? Mupolofita Isaya n’a polofitile ka za limbuyoti za yona, ka ku bulela kuli: “Mi cwale mulena u ka busa ka ku luka, mi ni bona makwambuyu ba ka zamaisa ka mulao. Mutu kih’a ka ba sina mukunda ha ku fuka moya, ni sina sisabelo ha ku taha liñungwa; a be sina linuka ze isa mezi mwa naha ye omile, ni sina muluti wa licwe le lituna mwa naha ye shukezwi mezi.” (Isaya 32:1, 2) Mañi ni mañi kwa maeluda u lukela ku ba “mukunda” o cwalo wa silelezo ni buiketo. Niha lu fumana t’ata ku  ipeya kwa tamaiso, haike lu satalale ka tapelo ku utwa ni ku ipeya kwatas’a tamaiso y’a tomile Mulimu mwa puteho.

M’o Maeluda Ba Ipeela Kwatas’a Tamaiso ya Kreste

14, 15. Ba ba etelela mwa puteho ba bonisa cwañi kuli ba ipeya kwatas’a tamaiso ya Kreste?

¹⁴ Bakreste kaufela—sihulu maeluda—ba lukela ku latelela tamaiso ya Kreste. Baokameli, kamba maeluda, ba na ni m’atanyana mwa puteho. Kono ha ba bati ku ‘busa tumelo ya balumeli ba bañwi’ ka ku lika ku zamaisa bupilo bwa bona. (2 Makorinte 1:24) Maeluda ba tokomela za n’a bulezi Jesu, kuli: “Mwa ziba kuli malena a macaba ba a busa ka tata, ni kuli ba batuna ba a limba. Ku si ke kwa ba cwalo ku mina.” (Mateu 20:25-27) Maeluda ha ba nze ba peta buikalabelo bwa bona, ba lika ku kombwekela ba bañwi ha buniti.

¹⁵ Bakreste ba susuezwa kuli: “Mu hupule ba ba mi zamaisa, . . . mu likanyise tumelo ya bona, mi mu lemuhe mafelelezo a bupilo bwa bona.” (Maheberu 13:7) Ku ba likanyisa k’o ha ku tokwahali ka libaka la kuli maeluda ki bazamaisi. Jesu n’a ize: “Muzamaisi wa mina ki a li muñwi, Yena Kreste.” (Mateu 23:10) Ki tumelo ya maeluda ye lukelwa ku likanyiswa kakuli ba likanyisa Muzamaisi wa luna wa luli, yena Kreste. (1 Makorinte 11:1) Ha lu nyakisiseñi linzila ze ñwi zeo ka zona maeluda ba lika ku likanyisa Kreste mwa swalisano ya bona ni ba bañwi mwa puteho.

16. Ku si na taba ni m’ata a’ n’a na ni ona, Jesu n’a ezanga cwañi balateleli ba hae?

¹⁶ Nihaike Jesu u fitela kwahule-hule batu ba ba si ka petahala mwa linto kaufela ni kuli u filwe m’ata a matuna-tuna ki Ndat’ahe, n’a sebelisananga ka buishuwo ni balutiwa ba hae. N’a sa eshulangi bateelezi ba hae ka ku ba bonisa kuli u na ni zibo ye tuna-tuna. Jesu n’a iyakatwanga balateleli ba hae ni ku ba utwela makeke, ili ku nahana bufokoli bwa bona. (Mateu 15:32; 26:40, 41; Mareka 6:31) N’a sa batangi kuli balutiwa ba hae ba fe ze ne ba sa koni, mi n’a sa ba shimbisangi ze ne ba sa koni ku shimba. (Joani 16:12) Jesu n’a li ya na ni “musa ni pilu ye bunolo.” Kacwalo, ku swanezi ba bañata ha ne ba ikutwa ku imuluha ha ne ba li ni yena.—Mateu 11:28-30.

17. Maeluda ba lukela ku bonisa cwañi buishuwo bo bu swana ni bwa n’a bonisize Kreste mwa ku sebelisana kwa bona ni ba bañwi mwa puteho?

¹⁷ Haiba Kreste Muzamaisi n’a ishuwa, ba ba etelela mwa puteho ba swanezi ku eza cwalo hahulu ni ku fita! Ee, ba tokomela ku sa itusisa maswe m’ata afi kamba afi e ba filwe. Mi ha ba ‘tahi ka bunde bo butuna bwa manzwi,’ ili ku lika ku tabisa ba bañwi. (1 Makorinte 2:1, 2) Kono ba lika ku bulela ka bunolo ni ka busepahali manzwi a niti ye mwa Mañolo. Hape, maeluda ba lika ku sa tula tikanyo ku ze ba libelela ku ba bañwi, mi ba utwisisa bufokoli bwa bona. (Mafilipi 4:5) Ka ku ziba kuli mañi ni mañi u na ni bufokoli, ba utwisisa mizwale ba bona ha ba fosa. (1 Pitrosi 4:8) Mi kana maeluda ba ba ishuwa ili ba ba musa ha ba imululi? Kaniti luli ba imulula.

18. Maeluda ba kona ku itutañi ku Jesu ka m’o n’a ezelize banana?

¹⁸ Jesu n’a li ya silikani, mane ni ku ba banyinyani. Mu bone za n’a bulezi balutiwa ba hae ha ne ba omanyize batu kakuli ne  ba ‘tisa ku yena bana ba banyinyani.’ Jesu n’a ize: “Mu tuhele bana ba banyinyani ba tahe ku na, mi mu si ke mwa ba hanisa.” Kihona a “ba nga mwa mazoho a hae, mi a ba fuyola ka ku beya mazoho a hae fahalimu a bona.” (Mareka 10:13-16) Jesu n’a li ya silikani ili ya musa, mi ba bañwi ne ba mu tabela. Batu ne ba sa sabi Jesu. Mane ni banana ne ba ikutwa ku lukuluha ha ne ba li ni yena. Maeluda ni bona ki ba ba silikani, mi ha ba bonisa silikani ni musa, ba bañwi—niheba banana—ba ikutwa ku lukuluha ku ba ni bona.

19. Ku ba ni “muhupulo wa Kreste” ku amañi, mi ku eza cwalo ku tokwa buikatazo mañi?

¹⁹ Maeluda ba kona ku likanyisa Kreste Jesu ka ku ya ka mo ba mu zibela hande. Paulusi n’a buzize kuli: “Ki mañi ya ziba muhupulo wa Mulimu, kuli a mu eleze?” Kihona a ekeza kuli: “Kono luna lu zibile muhupulo wa Kreste.” (1 Makorinte 2:16) Ku ba ni muhupulo wa Kreste ku talusa ku ziba mw’a nahanela ni ku ziba butu bwa hae ka ku tala kuli mane lwa ziba mwa n’a ka ezeza mwa muinelo o muñwi. Mu nahane mo ne ku ka bela ha ne lu ka ziba hande-nde cwalo Muzamaisi wa luna! Ee, kuli lu eze cwalo, lu tokwa ku isa hahulu mamelelo kwa litaba za Evangeli ni ku yeyanga kamita bupilo ni mutala wa Jesu. Maeluda ha ba satalala ku latelela cwalo tamaiso ya Kreste, ba mwa puteho ba fumana bunolo ku likanyisa tumelo ya bona. Mi maeluda ba ba ni tabo ya ku bona ba bañwi ba hata ka tabo mwa n’a hatile Muzamaisi.

Mu Zwelepili ku Ipeya Kwatas’a Tamaiso ya Kreste

20, 21. Ha lu nze lu libelela lifasi le li nca le li sepisizwe, lu lukela ku ikatulelañi?

²⁰ Ki kwa butokwa kuli kaufela luna lu zwelepili ku ipeya kwatas’a tamaiso ya Kreste. Ha lu nze lu atumela mafelelezo a muinelo wo wa linto, muinelo wa luna u swana ni wa Maisilaele ha ne ba li mwa Mabala a Moabi ka 1473 B.C.E. Ne ba tuha ba kena mwa Naha ya Sepiso, mi ka mupolofita Mushe, Mulimu n’a ize: “Ki wena [Joshua] ya ka kena ni sicaba se, mwa naha y’a itamile ka luci [Muñ’a] Bupilo ku bokuku wa bona, kuli u ka ba fa yona.” (Deuteronoma 31:7, 8) Joshua n’a li muzamaisi wa bona ya ketilwe. Kuli ba kene mwa Naha ya Sepiso, Maisilaele ne ba na ni ku ipeya kwatas’a tamaiso ya Joshua.

²¹ Bibele i lu bulelela kuli: “Muzamaisi wa mina ki a li muñwi, Yena Kreste.” Ki Kreste a nosi ya ka lu isa mwa lifasi le linca le li sepisizwe ili m’o ku ka yaha ku luka. (2 Pitrosi 3:13) Kacwalo, haike lu ikatulele ku ipeya kwatas’a tamaiso ya hae mwa likalulo kaufela za bupilo.

[Litaluso za kwatasi]

Kana Mwa Hupula?

• Kreste n’a zamaisize cwañi puteho ya makalelo?

• Kreste u zamaisa cwañi puteho ya hae kacenu?

• Ki kabakalañi ha lu lukela ku ipeya kwatas’a ba ba etelela mwa puteho?

• Maeluda ba kona ku bonisa mwa linzila lifi kuli Kreste ki Muzamaisi wa bona?

[Lipuzo za Tuto]

[Siswaniso se si fa likepe 15]

Kreste u zamaisa puteho ya hae mi u sweli baokameli mwa lizoho la hae la bulyo

[Maswaniso a fa likepe 16]

“Mu utwe bazamaisi ba mina, mi mu ipeye kwatas’a bona”

[Siswaniso se si fa likepe 18]

Jesu n’a li ya silikani. Maeluda ba Sikreste ba lika ka t’ata ku mu likanyisa