“Mu Tahe ku Na . . . , Mi ni Ka Mi Imulula”

Mikopano Ye Susumeza ku Ba ni Lilato ni Misebezi Ye Minde

KU KALELA kwa Toronto ku yo fita kwa Tokyo, ku zwa kwa Moscow ku ya kwa Montevideo—ka linako ze fapahana-fapahana mwa viki, bolule-lule ba Lipaki za Jehova ni balikani ba bona ba konganelanga kwa libaka za bona za milapelo. Batu bao ba kopanyeleza bo ndate-mabasi ba ba beleka ka t’ata, ili ba ba katezi hamulaho wa ku beleka lizazi kaufela; basali ili bashemi ba miswalo ba ba zamaya hamoho ni bana ba bona ba ba sa fokola; mikulwani ba ba sa ikutwa ili ba ba tandile lizazi kwa sikolo; basupali ba ba fokola ili ba ba zamaya ka bunya bakeñisa ku opa ni butuku bo ba utwa; limbelwa ni lindiala ba ba itiisa; ni batu ba ba lembwalile ili ba ba tokwa ku omba-ombiwa.

Bona Lipaki za Jehova bao, ba itusisa litanansipoti za mifuta-futa—ku kalela kwa litima ze mata ka lubilo lo lutuna ku isa kwa limbongolo, ku zwa kwa limota za magesi ze mata fa njanji ye mwatas’a mukwakwa ku isa kwa bimbayambaya. Ba bañwi ba na ni ku sila linuka ze tezi likwena hailif’o ba bañwi bona ba na ni ku tiyela ku liyehiswa ki siimpiti sa limota za mwa litolopo ze tuna. Ki kabakalañi batu bao kaufela ha ba ikataza cwalo?

Sihulu ki kakuli ku fumaneha ni ku abana kwa mikopano ya Sikreste ki nzila ya butokwa ya ku lapela Jehova Mulimu ka yona. (Maheberu 13:15) Muapositola Paulusi na bulezi libaka le liñwi ha n’a ñozi kuli: ‘A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, . . . kono lu kutazane, sihulu ka ku bona kuli lizazi le lituna li sutelezi.’ (Maheberu 10:24, 25) Paulusi f’o, n’a kutezi maikuto a walisamu, Davida, ya n’a opezi kuli: “Na taba ha ba ni bulelela, ba li: A lu yeñi mwa Ndu ya [Muñ’a] Bupilo.”—Samu 122:1.

Ki kabakalañi Bakreste ha ba tabiswa ki ku fumaneha kwa mikopano ya bona? Ki kabakala kuli baputehi haki bashalimeli fela. Kono, mikopano i ba fa kolo ya ku zibana hande. Mikopano yeo sihulu i ba konisa ku ba ni nako ya ku fana isi ku amuhela fela, ni ku susumezana mwa ku bonisa lilato ni ku eza misebezi ye minde. Seo si bisa mikopano ku ba nako ye yahisa. Fahalimw’a seo, mikopano ya Sikreste ki ye ñwi ya linzila zeo Jesu a taleleza sepiso ya hae y’e li: “Mu tahe ku na, . . . mi ni ka mi imulula.”—Mateu 11:28.

 Sibaka sa Mbombolelwa ni Pabalelo

Lipaki za Jehova ba na ni mabaka a utwahala a ku nga mikopano ya bona ku ba ye katulusa. Libaka le liñwi kikuli lico za kwa moya li sweli ku fiwa ka nako ye lukela kwa mikopano ki “mutanga ya sepahala, ya na ni kutwisiso.” (Mateu 24:45) Mikopano hape ki ya butokwa mwa ku bisa batanga ba Jehova ku ba baluti ba Linzwi la Mulimu ba ba cuukile ili ba ba mafulofulo. Fahalimw’a seo, kwa Ndu ya Mubuso mutu u kona ku fumana sikwata sa batu ba ba na ni lilato, ba ba mu isa pilu, ili balikani ba ba na ni pabalelo ba ba iteekezi ni ku itatela ku tusa ni ku omba-omba ba ba mwa manyando.—2 Makorinte 7:5-7.

Ki mo ne ku bezi ku Phillis, ili yo na li mbelwa ya siyamezwi ka nako yeo yo muñwi wa bana ba hae n’a li wa lilimo ze 5, mi yo muñwi ze 8. Ha n’a talusa mo ne ba ikutwezi ku imululwa yena ni bana ba hae ha ne ba ile kwa mikopano ya Sikreste, n’a ize: “Ku ya kwa Ndu ya Mubuso ne ku ni tobile pilu kakuli balumeli ba bañwi kamita ne ba ni eza ka lilato ni ka pabalelo ka ku ni kumbata, ku ni omba-omba ka Mañolo, kamba ku ni lumelisa mwa lizoho ka lilato. Ki sibaka se ne ni tokwa ku ba ku sona kamita.”—1 Matesalonika 5:14.

Hamulaho wa ku pazulwa ko kutuna, Marie n’a bulelezwi ki dokota wa hae kuli ne ku ka m’u ngela liviki ze bat’o ba ze silezi kuli a fole. Kwa makalelo a liviki za n’a angulukelwa, Marie n’a sa koni ku ya kwa mikopano. Dokota wa hae a lemuha kuli Marie n’a sina mwangalwa wa sapili. Ha n’a lemuhile kuli n’a sa yangi kwa mikopano, dokota a mu susueza ku no yanga. Marie a mu alaba kuli munn’a hae ya n’a si mwa bulapeli bwa hae n’a sa lati kuli a yange kwa mikopano bakeñisa butuku bwa hae. Kabakaleo dokota a ñola taelo ya ka mulao ya ku “laela” Marie ku ya kwa Ndu ya Mubuso ku yo susuezwa ni ku yo ba mwa siango se si yahisa. Marie u feza cwana, u li: “Hamulaho wa ku fumaneha kwa mukopano u li muñwi, na ikutwa hande hahulu. Na kalisa ku ca, na lobala busihu kaufela, ne ni si ka tokwa ku tatahanyeza ku nwa mulyani o lilimalisa butuku, mi na angulukelwa hape!”—Liproverbia 16:24.

Moya wa lilato o banga kwa mikopano ya Sikreste u lemuhiwanga ki ba kwande. Muituti yo muñwi n’a ketile ku yo iponela Lipaki za Jehova ilikuli ite a ñole musebezi wa n’a filwe kwa sikolo wa ku ñola ka za tuto ya batu ni lizo za bona. Ka ku ama kwa moya o n’o li teñi kwa mikopano, n’a ñozi cwana mwa pampili ya hae: “Kamuhelo ye lilato ye ne ni fumani . . . [n’e li ye] tabisa hahulu. . . . Silikani sa Lipaki za Jehova ki ona mukwa o no zwile hahulu mubano mi ni bona kuli ki yona kalulo ye tuna ya kwateñi.”—1 Makorinte 14:25.

Mwa lifasi le li tezi butata le, puteho ya Sikreste ki masabelo a kwa moya. Ki sibaka mo ku fumaneha kozo ni lilato. Ka ku fumaneha kwa mikopano, mwa kona ku iponela buniti bwa manzwi a walisamu a’ li: “A mu bone, ku munati cwañi mi ku kateleha cwañi, batu ni banabahabo bona ha ba pila hamoho, mwa buñwi.”—Samu 133:1.

[Mbokisi/Siswaniso se si fa likepe 25]

KU TALELEZA BUTOKWI BO BU IPITEZI

Bosusu ba kona ku tuseha cwañi kwa mikopano ya Sikreste? Ku potoloha lifasi, Lipaki za Jehova ba sweli ku toma liputeho za puo ya ka mazoho. Mwahal’a lilimo ze 13 ze felile, mwa United States ku tomilwe liputeho ze 27 za puo ya ka mazoho ni likwata ze 43 za puo ya ka mazoho. Mwa linaha li sili ze bat’o ba 40, ku na ni liputeho za puo ya ka mazoho ze 140 cwale. Lihatiso za Sikreste li lukisizwe fa mavidio mwa lipuo za ka mazoho ze 13.

Puteho ya Sikreste i kwalulela bosusu kolo ya ku lumbeka Jehova. Odile, ya n’a li Mukatolika wa kwa France ili ya n’a ikutwanga ku lembwala maswe ka linako ze ñwi mi n’a na ni muhupulo wa ku iponda, u itebuha hahulu ka za tuto ya Bibele y’a fumani kwa mikopano ya Sikreste. U li: “Ne ni angulukezwi ni ku tabela ku pila. Kono se situna ni ku fita kikuli ne ni fumani niti. Bupilo bwa ka cwale bu na ni mulelo.”