Kana Tumelo I Swanela ku Toma fa Nahanisiso?

Yo muhulu wa sikolo sa baprisita sa za bulapeli mwa United States u ñola kuli: “Ku na ni batu ba bañata-ñata ba ba twi ki balumeli ili be ne ba keni bulapeli sihulu ka ku sa bata ku itusisa m’ata a bona a ku nahana.” U ekeza kuli: “Ba bata fela ku lumela lika kaufela ‘ze si na bupaki.’”

F’O KIKULI buñata bwa batu ba ba ipala ku ba ni tumelo ya za bulapeli ha ba nahanangi ka za libaka ha ba lumela ze ba lumela kamba ku bona nji tumelo ya bona i na ni fo i tomile hande. Ha ku komokisi libaka taba ya bulapeli ha i li taba yeo ba bañata ba honona ku ambola ka za yona.

Ka bumai, likezo ze cwale ka ku itusisa maswaniso mwa ku lapela ni ku kuta-kutela litapelo ze petilwe ni zona ha li susuezi ku nahana ko ku swanela. Likezo zeo, hamoho ni miyaho ye lolekilwe, mahaulo a mande-nde a basizwe ka bukwala, ni lipina ze hoha, ibat’o ba kuli li bonisa mo bu inezi bulapeli bwa batu ba bañata. Nihaike likeleke ze ñwi li ipapata kuli tumelo ya zona i tomile fa Bibele, lushango lwa bona lwa kuli ‘u lumele ku Jesu mi u ka puluswa’ lu nyinyafaza butokwa bwa ku ituta Bibele. Ba bañwi ba fetuhela kwa ku itusisa likuka za Bibele kwa matata a nyangela kamba kwa litaba za muuso. Ki lifi ze zwile mwa lika zeo kaufela?

Ka za muinelo wa mwa North America, muñoli yo muñwi wa za bulapeli n’a ize: “Bukreste . . . bu bonahala ku ba bwa fahalimu fela, [mi] balateleli ba bona ha ba si ka ituta hande mwa tumelo.” Mubuzisisi yo muñwi wa litaba mane n’a fitile fa ku talusa kuli United States ki “naha ye si ka ituta za Bibele.” Ka buniti fela, litemuho zeo li kona ku ba cwalo ni mwa linaha ze ñwi ze twi ki za Sikreste. Buñata bwa bulapeli bo bu si bwa Sikreste ni bona ha bu fi susuezo ya ku nahana ko ku swanela, kono bu tiiseza mwa lipina, litapelo za lizo, ni ku yeya kwa mifuta-futa ko ku ama lika za sidimona, mwa sibaka sa ku nahana ka za lika ze swanela ili ze yahisa.

Niteñi, mwa bupilo bwa bona bwa ka zazi, bona batu ba ba swana bao ba ba sa nahanisisi hahulu ka za ku nepahala kamba buniti bwa litumelo za bulapeli bwa bona hañata ba nahananga litaba ze ñwi ka tokomelo hahulu. Kana ha ku komokisi kuli mutu ya eza lipatisiso ze tuna za ku bata fela kuli a leke mota—ili yeo muta o muñwi i ka ba biemba-mba—n’a ka bulela ka za bulapeli bwa hae kuli, ‘Haiba ne bu li bo bunde kwa bashemi ba ka, ni ku na ki bo bunde’?

Haiba luli lwa tabela ku tabisa Mulimu, kana ha lu lukeli ku nyakisisa ka tokomelo buniti bwa se lu lumela ka za yena? Muapositola Paulusi n’a bulezi ka za batu ba bañwi ba bulapeli ba mwa miteñi ya hae be ne “ba tukufalezwi za Mulimu, kono isi ka ku utwiseza.” (Maroma 10:2) Ba ba cwalo ba kona ku bapanywa ni  mutu ya filwe musebezi wa ku penta ili ya sebeza ka t’ata ku penta ndu kono u itusisa mupende o sa swaneli kakuli h’a utwi litaelo za muñ’a ndu. Mupenti y’o a kana a tabela musebezi wa hae, kono kana ni muñi u ka u tabela?

Ki lifi z’a amuhela Mulimu ka za bulapeli bwa niti? Bibele i alaba kuli: “Kakuli se ki se sinde, ki s’a katelwa Mulimu Mupilisi wa luna, yena ya lata kuli batu kamukana ba piliswe, mi ba fite fa zibo ya ku ziba niti.” (1 Timotea 2:3, 4) Ba bañwi ba kana ba ikutwa kuli ha ku konahali ku fumana zibo ye cwalo mwahal’a bulapeli bo buñata-ñata kacenu. Kono mu nahane—haiba ki tato ya Mulimu kuli batu ba fite fa zibo ye nepahezi ya ku ziba niti, kana n’a ka ba patela yona ka ku sa luka? Kutokwa. Kakuli Bibele i li: ‘Ha u bata Mulimu u ka mu fumana.’—1 Makolonika 28:9.

Kana Mulimu u izibahazanga cwañi ku ba ba mu bata ka pilu yote? Kalabo i ka fumaneha mwa taba ye tatama.