Ku Ituta Ha Ku Na Buhulu

KSENIYA n’a pepilwe mwa silimo sa 1897. Musali y’o n’a na ni bana ba basizana ba balalu, mushimani a li muñwi, baikulu ba 15, ni bana ba baikulyae ba 25. Mwa bupilo bwa hae kaufela, n’a eza ze ne ba mu lutile bashemi ba hae. Nihaike n’a balehezi kwa Moscow ha n’a sabile ndwa kwa Abkhaz Republic, ili naha ye fumaneha mwahal’a liwate la Black Sea ni sibaka sa Caucasus, n’a tabiswa ki bupilo bwa hae, kono sihulu n’a tabiswa ki sa n’a biza kuli ki tumelo ya ku hoza.

Mwa silimo sa 1993, mwan’a Kseniya wa musizana ya bizwa Meri n’a bile yo muñwi wa Lipaki za Jehova. Meri n’a kalile ku n’o bulelelanga Kseniya ka za Jehova Mulimu ni ka za Bibele, kono n’a sa lati ku teeleza. Kseniya n’a zwezipili ku bulelelanga mwan’a hae y’o kuli, “Nako ya kuli ni itute lika ze nca i felile kale.”

Nihakulicwalo, mwan’a hae Meri; Londa, musal’a muikulyae; ni bo Nana ni Zaza, bana ba baikulyae, be ne ba bile Lipaki za Jehova kaufela, ne ba zwezipili ku n’o mu bulelelanga za Bibele. Busihu bo buñwi ka 1999, ne ba balezi Kseniya liñolo le ne li mu fitile kwa pilu. Ne li na ni manzwi a nyangumuna ao Jesu n’a bulelezi baapositola ba ba sepahala ha n’a toma Mulalelo wa Mulena. (Luka 22:19, 20) Bona busihu b’o, Kseniya wa lilimo ze 102 n’a ikatulezi ku kalisa ku ituta Bibele.

Kseniya u li: “Hamulaho wa ku pila lilimo ze 102, kwa nalulelule na utwisisa mulelo wa bupilo. Cwale ni lemuhile kuli ha ku na nto ye fita ku sebeleza Mulimu wa luna yo munde ni ya lilato, Jehova. Ni sa zangukile mi ni sa iketile. Na kona ku bala ku si na mangilasi ni ku swalisana hahulu ni lubasi lwa hesu.”

Kseniya a kolobezwa la November 5, 2000. U bulela kuli: “Cwale ni fa bupilo bwa ka ku Jehova, ku mu sebeleza ka lilato. Ni abelanga limagazini ni matrakiti inze ni inzi fa sitishini sa limbasi bukaufi ni ko ni ina. Bahesu ba ni potelanga hañata, mi ni ba talusezanga ka tabo niti ka za Jehova.”

Kseniya u libelela lizazi leo ‘nama ya mubili wa hae ikaba ye nde ku fita ya mwanana, ni ku kutelwa ki mata a kwa bukalibe bwa hae.’ (Jobo 33:25) Haiba mutu wa lilimo ze fitelela mwanda h’a ikutwi kuli ku hula hahulu kwa mu paleliswa ku ituta za mulelo wa bupilo ku zwelela mwa Bibele, mina b’o?