Mu Bate Mulimu ka Pilu ni Kutwisiso ya Mina

Bukreste bwa niti bu susueza ku itusisa pilu ni munahano kwa ku yaha tumelo ye tabisa Mulimu.

MANE, mutateki wa Bukreste, yena Jesu Kreste, n’a lutile kuli lu lukela ku lata Mulimu ka ‘kutwisiso ya luna kaufela’ kamba ka ngana ya luna kaufela, hamoho ni ka ‘pilu ya luna kaufela’ ni ‘moya wa luna kaufela.’ (Mateu 22:37) Ee, m’ata a luna a ku nahana a swanela ku peta kalulo ya butokwa mwa bulapeli bwa luna.

Ha n’a memanga bateelezi ba hae ku nahanisisa lituto za hae, Jesu hañata n’a bulelanga kuli: “Mo mu hupulela ki cwañi?” (Mateu 17:25; 18:12; 21:28; 22:42) Ka ku swana, muapositola Pitrosi n’a ñolezi balumeli sina yena kuli a ‘zuse maikuto a bona a kenile.’ (2 Pitrosi 3:1) Mulumiwa wa kwakale ya n’a zamaile hahulu, yena muapositola Paulusi, n’a susuelize Bakreste ku itusisa “m’ata a [bona] a ku nahana” (NW) ni kuli “[ba] lemuhe se si latwa ki Mulimu kana ki sifi, se sinde, se si kateleha, se si petehile.” (Maroma 12:1, 2) Ki ka muezezo wa ka tokomelo o cwalo fela Bakreste ba kona ku yaha tumelo ya bona ye tabisa ku Mulimu ni ku talimana hande ni miliko ye zuha mwa bupilo.—Maheberu 11:1, 6.

Kuli ba tuse ba bañwi ku yaha tumelo ye cwalo, Bakreste ba bakutazi ba kwa makalelo ne ba “bulela ni bona, ka ku ya ka Mañolo.” (Likezo 17:1-3) Muezezo o munde o cwalo n’o tahisize kuli ba ba sepahala b’a nge mihato ye minde. Ka mutala, batu ba bañata mwa muleneñi wa Masedonia wa mwa Berea “ba amuhela Linzwi [la Mulimu] ka ku li tukufalelwa, mi ba batisisa mwa Mañolo, ka mazazi kaufela, ba lemuhe litaba ze [n’e taluswa ki Paulusi ni balikani ba hae] kana ki mo li inezi.” (Likezo  17:11) Ku lemuhiwa lika ze peli fa. Pili, batu ba Berea ne ba tukufalelwa ku teeleza kwa Linzwi la Mulimu; sa bubeli, ne ba sa lumeli fela ku si na buniti kuli ze ne ba utwile ne li ze lukile, kono ne ba batisisize mwa Mañolo. Luka, Mukreste ya n’a li mulumiwa ka buikokobezo n’a lumbile batu ba kwa Berea ka za seo, ili ku ba biza kuli ki ba “lipilu ze nde.” Kana ni mina mwa bonisa pilu ye nde cwalo ka mo mu amuhelela litaba za Mulimu?

Munahano ni Pilu Za Sebelisana

Sina ha ku bulezwi kwa makalelo, bulapeli bwa niti bu ama kutwisiso ni pilu. (Mareka 12:30) Mu nahane ka za swanisezo ye mwa taba ye felile ka za mutu ya n’a filwe musebezi wa ku penta ili ya n’a pentile ndu ka mubala o sa swaneli. Kambe n’a teelelize ka tokomelo kwa litaelo za n’a mu file mubelekisi wa hae, n’a ka be a ezize musebezi wa hae ka pilu ya hae kaufela ni ku sepa kuli musebezi wa hae n’o ka tabelwa ki muñ’a ona. Ki nto ye swana ni kwa bulapeli bwa luna.

Jesu n’a ize, ‘Balapeli ba niti ba ka lapela Ndate ka moya ni ka niti.’ (Joani 4:23) Kacwalo, muapositola Paulusi n’a ñozi kuli: “Kabakaleo ni luna . . . ha lu si ka lisela ku mi lapelela ni ku mi kupela kuli mu tale zibo [ye nepahezi, NW] ya tato ya hae, ye ka yona mu ka fiwa butali ni kutwisiso ya za Moya; kuli mu zamaye ka mukwa o swanela Mulena, a mi katelwe kai ni kai.” (Makolose 1:9, 10) “Zibo ye nepahezi” ye cwalo i konisa batu ba ba sepahala ku lapela ka pilu ya bona kaufela, ka buikolwiso bo bu tezi kakuli ba “lapela se [ba] ziba.”—Joani 4:22.

Ka mabaka ao, Lipaki za Jehova ha ba kolobezi banana ba banyinyani kamba batu ba ba tabela ba ba si ka ituta Mañolo ka tokomelo. Jesu n’a laezi balateleli ba hae kuli: “Mu lute macaba kaufela, . . . mu ba lute ku mamela ze ni mi laezi kaufela.” (Mateu 28:19, 20) Kiha se ba fumani zibo ye nepahezi ya tato ya Mulimu baituti ba ba sepahala ba Bibele ba kona ku eza katulo ye nde ka za taba ya za bulapeli. Kana mu sweli mwa satalala ku fumana zibo ye nepahezi ye cwalo?

Ku Utwisisa Tapelo ya Mulena

Kuli lu bone shutano ye mwahal’a ku ba ni zibo ye nepahezi ya Bibele ni zibo ye nyinyani ya se i bulela, ha lu nyakisiseñi seo ba bañata ba biza kuli ki Tapelo ya Ndat’a Luna, kamba Tapelo ya Mulena, ye ñozwi kwa Mateu 6:9-13.

Bolule-lule kamita ba kuta-kutelanga tapelo ya Jesu ye li mutala kwa keleke. Kono ki ba bakai be se ba lutilwe taluso ya yona, sihulu kalulo ya pili ya tapelo yeo ye bulela za libizo la Mulimu ni Mubuso wa hae? Litaba zeo ki za butokwa hahulu kuli mane Jesu n’a bulezi pili za zona mwa tapelo ya hae.

I kala kuli: “Ndat’a luna ya kwa lihalimu, Libizo la hao a li be le li kenile,” ili ku talusa ku tompiwa. Mu lemuhe kuli Jesu n’a bulezi ka za ku lapela kuli libizo la Mulimu li keniswe. Kwa batu ba bañata, nto yeo i zusa lipuzo ze peli. Ya pili ki ya kuli, ki lifi libizo la Mulimu? Mi ya bubeli ki ya kuli, ki kabakalañi ha li tokwa ku keniswa?

Kalabo kwa puzo ya pili i konwa ku fumanwa mwa libaka ze fitelela 7,000 mwa Bibele ili mwa lipuo za kwa makalelo mo ne i ñozwi. Ya pili i kwa Isaya 12:2, ye li: ‘A mu bone, ya ni pilisa ki Mulimu! Ki Yena ye ni sepa, mi ha ni na ku saba se siñwi; kakuli mata a ka, ni muñ’a milumbeko ya ka, ki Muñ’a Bupilo Jehova; ki Yena Mupilisi wa ka.’ Ka za libizo la Mulimu, lona la Jehova, Exoda 3:15 i li: “Ki lona Libizo la ka la kamita, mi ka lona mu ka ni hupula mwa linako kaufela, ku ya ku ile.” * Kono ki kabakalañi libizo ya Mulimu, ili lona luli le li talusa bukeni, ha li tokwa ku keniswa? Kakuli li nyefuzwi ni ku silafazwa ku zwa kwa simuluho  luli ya batu.

Mwa Edeni, Mulimu n’a bulelezi bo Adama ni Eva kuli ne ba ka shwa ha ne ba ka ca kwa muselo o hanisizwe. (Genese 2:17) Satani ka kashwau a kananisa Mulimu, ka ku bulelela Eva kuli: “Ku shwa, ha mu na ku shwa.” Kacwalo, Satani n’a tamelelize Mulimu buhata. Niteñi, n’a si ka feleza f’o. A ekeza ku nyefula libizo la Mulimu ka ku bulelela Eva kuli Mulimu n’a si ya lukile ka ku tima Eva zibo ya butokwa. “Kono Mulimu u ziba kuli, nako ye mu [ca kota ya ku ziba bunde ni bumaswe], meto a mina a ka tona, mi mu ka ba sina milimu, mu zibe bunde ni bumaswe.” Ki bumunjuli hakalo!—Genese 3:4, 5.

Ka ku ca muselo w’o o hanisizwe, bo Adama ni Eva ba swalisana ni Satani. Ku zwa ona nako yeo, buñata bwa batu, ka ku ziba kamba ka ku sa ziba, ba ekelize kwa nyefulo ya kwa makalelo yeo ka ku hana lipimo ze lukile za Mulimu. (1 Joani 5:19) Batu ba sa nyefula Mulimu ka ku mu nyazeza manyando a bona—nih’a kana a tahiswa ki likezo za bona ze maswe. Liproverbia 19:3 i li: “Butanya bwa mutu bu mu kenya mwa nzila ye maswe, ibe pilu ya hae i nyemela [Muñ’a] Bupilo.” Kana mwa bona libaka Jesu, yo kaniti n’a lata Ndat’ahe, ha n’a lapezi kuli libizo la Hae li keniswe?

“Ku Tahe Mubuso wa Hao”

Ha s’a lapezi kuli libizo la Mulimu li keniswe, Jesu a li: “Ku tahe mubuso wa hao; Se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Ka za taba yeo, lu kana lwa buza kuli: ‘Mubuso wa Mulimu ki nto mañi? Mi ku taha kwa ona ku swalisana cwañi ni ku eziwa kwa tato ya Mulimu mwa lifasi?’

Mwa Bibele, linzwi la “mubuso” ka mutomo li talusa “puso ye busiwa ki mulena.” Kacwalo, kwa utwahala kuli Mubuso wa Mulimu ne u ka talusa puso, kamba mulonga, wa Mulimu, o’ na ni mulena ya ketilwe ki yena. Mulena yo ki Jesu Kreste ka sibili, ya zusizwe kwa bafu—yena “Mulena wa malena, ni Mubusisi wa babusisi.” (Sinulo 19:16; Daniele 7:13, 14) Ka za Mubuso wa Mulimu wa Mesiya o’ mwa tamaiso ya Jesu Kreste, mupolofita Daniele n’a ñozi kuli: “Mwa mazazi a malena ao [mibuso ya batu ye busa cwale], Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Daniele 2:44.

Ee, Mubuso wa Mulimu u ka busa lifasi kaufela, ili ku felisa ku lona bumaswe kaufela ni ku busa “ku ya ku ile.” Ka nzila yeo, Mubuso wa Mulimu ki ona w’o Jehova a ka bonisa ka ona bukeni bwa libizo la hae, ku li kenisa kwa bunyefuli bwa buhata bwa Satani ni bwa batu ba ba maswe.—Ezekiele 36:23.

Sina milonga kaufela, Mubuso wa Mulimu u na ni babusiwa. Ki bomañi bona bao? Bibele i alaba kuli: “Ba ba ishuwa ba ka luwa naha, ba ka ikola kozo ye tuna.” (Samu 37:11) Ka ku swana, Jesu n’a ize: “Mbuyoti ki ya ba ba ishuwa, kakuli ba ka ca sanda sa lifasi.” Kono bona bao ba na ni zibo ye nepahezi ya za Mulimu, ili nto ye tokwahala kuli mutu a piliswe.—Mateu 5:5; Joani 17:3.

Mu nahane fela mo ku ka bela lifasi kaufela ha li ka tala batu ba ba ishuwa ba ba lata luli Mulimu ni batu ba bañwi! (1 Joani 4:7, 8) Ki sona sa n’a lapelezi Jesu ha n’a ize: “Ku tahe Mubuso wa hao; Se si latwa ki Wena si ezwe mwa lifasi, mo si ezezwa mwa lihalimu.” Kana mwa utwisisa libaka Jesu ha n’a lutile balateleli ba hae ku lapela cwalo? Sa butokwa ni ku fita kikuli, kana mwa bona m’o talelezo ya tapelo yeo i kona ku mi amela?

Bolule-Lule Se Ba Nyakisisa Mañolo

Jesu n’a polofitile kuli ne ku ezwa musebezi wa ku luta za Mulimu mwa lifasi kaufela, o ne u ka zibahaza Mubuso wa Mulimu o taha. N’a ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana;  kihona ku ka taha mafelelezo.”—Mateu 24:14.

Mwa lifasi kaufela, Lipaki za Jehova ba ba bat’o eza 6 milioni ba sweli ku fitisa taba ye nde yeo kwa batu ba bañwi. Ba mi mema ku ituta ze ñwi ka za Mulimu ni Mubuso wa hae ka ku “batisisa mwa Mañolo,” ka ku itusisa m’ata a mina a ku nahana. Ku eza cwalo ku ka tiisa tumelo ya mina ni ku mi tahiseza tabo ha mu nze mu nahana ka za sepo ya bupilo bwa mwa paradaisi fa lifasi, ili le li ka tala “zibo ya [Muñ’a] Bupilo, sina mezi mw’a kwahelezi liwate.”—Isaya 11:6-9.

[Litaluso za kwatasi]

 [Mbokisi/Siswaniso se si fa likepe 8]

MU LIKANYISE MULUTI YO MUTUNA

Hañata, Jesu n’a lutanga ka ku toma fa litaba ze nongile za mwa Bibele. Ka mutala, ha s’a zuhile kwa bafu, n’a taluselize balutiwa ba hae ba babeli be ne ba ziyelizwe ki lifu la hae ka za kalulo y’a peta mwa mulelo wa Mulimu. Luka 24:27 ili: “A kala ka Mushe, a isa kwa bapolofita kaufela, inz’a ba taluseza mwa mañolo kaufela z’a bulezwi ka zona.”

Mu lemuhe kuli Jesu n’a iketezi taba ye nongile—“[ka za hae, NW],” yena Mesiya—ni kuli n’a amile kwa “mañolo kaufela” mwa puhisano ya hae. Jesu n’a kopanya litaba za Bibele ze fa bupaki, ili nto ye n’e konisize balutiwa ba hae ku utwisisa mutala wa niti ya kwa moya. (2 Timotea 1:13) Kacwalo, ne ba filwe monyehelo ni ku susuezwa hahulu. Taba yeo i lu bulelela kuli: “Ba bulelelana, ba li: Ha lu li, lipilu za luna ne li tuka mwa lifuba za luna, ha n’a lu bulelisa mwa nzila, a lu taluseza Mañolo?”—Luka 24:32.

Lipaki za Jehova ba satalala ku likanyisa miezezo ya Jesu mwa bukombwa bwa bona. Lihatiso za tuto ze ba itusisa hahulu ki broshuwa ya Ki Sifi Seo Mulimu A Tokwa ku Luna? ni buka ya Zibo Ye Isa kwa Bupilo bo Bu Sa Feli. Lihatiso zeo li nyakisisa litaba ze ñata-ñata ze tabisa za mwa Bibele, ze cwale ka ze li: “Mulimu Ki Mañi?,” “Ki Kabakalañi Mulimu H’a Tuhelela Manyando?,” “Mu Kona ku Fumana Cwañi Bulapeli bwa Niti?,” “A, Ki Ona Mazazi a Maungulelo!,” ni “Ku Yaha Lubasi Lo Lu Kuteka Mulimu.” Tuto ni tuto i na ni mañolo a mañata.

Mu lukuluhile ku ambola ni Lipaki za Jehova ba mwa silalanda sa mina kamba ku ñolela kwa keyala ye bonisizwe fa likepe 2 la magazini ye kuli mu fiwe tuto ya Bibele ye si na tifo ya litaba zeo ni ze ñwi cwalo.

[Siswaniso]

Mu fite kwa pilu ya muituti wa mina ka ku toma fa litaba ze nongile za mwa Bibele

[Maswaniso a fa likepe 7]

Kana mwa utwisisa taluso ya tapelo ya Jesu ye li mutala?

“Ndat’a luna ya kwa lihalimu, Libizo la hao a li be le li kenile . . . ”

“Ku tahe mubuso wa hao [wa Bumesiya] . . . ”

“Se si latwa ki Wena si ezwe mwa lifasi, mo si ezezwa kwa lihalimu.”