Mu Zwelepili ku Sebeleza Jehova ka Pilu Ye Tiile

“Pilu ya ka i tiile Mulimu, pilu ya ka i tiile.”—SAMU 57:7.

1. Ki kabakalañi ha lu kona ku ba ni buikolwiso bo bu swana ni bwa Davida?

JEHOVA wa kona ku lu tiisa mwa tumelo ya Sikreste, ilikuli lu kone ku kumalela kwa Bukreste bwa niti ka ku ba batanga ba hae ba ba sepahala. (Maroma 14:4) Kacwalo, lwa kona ku ba ni buikolwiso bo bu swana ni bwa n’a na ni bona walisamu Davida, ya n’a susuelizwe ku opela kuli: “Mulimu, pilu ya ka i tiile.” (Samu 108:1) Pilu ya luna ha i ba ye tiile, lu ka susuezwa ku peta za buineelo bwa luna ku Mulimu. Mi ka ku itinga ku yena kuli a lu etelele ni ku lu tiisa, lu ka ba ba ba sa zikinyehi, ili basepahali ba ba na ni tundamo ni buikolwiso bo bu tiile, ba ba ‘tiisa kamita musebezi wa Mulena.’—1 Makorinte 15:58.

2, 3. Ki ifi taluso ya likelezo za Paulusi ze kwa 1 Makorinte 16:13?

² Mwa likelezo ze n’e ñolezwi balateleli ba Jesu ba mwa Korinte ya kwaikale, kono ili ze sebeza ni kwa Bakreste ba mwa miteñi ye, muapositola Paulusi n’a ize: “Mu tone, mu tiye mwa tumelo; mu be banna, mu be ni mata.” (1 Makorinte 16:13) Mwa Sigerike, ye ñwi ni ye ñwi ya litaelo zeo i bonisa nto ye ezahala ka nako yona yeo, mi kacwalo ili ye tokwa ku zwelapili ku eziwa. Kelezo yeo i talusañi?

³ Lwa kona ‘ku tona’ kwa moya ka ku hanela Diabulosi ni ku sutelela ku Mulimu. (Jakobo 4:7, 8) Ku itinga ku Jehova ku lu konisa ku zwelapili mwa buñwi ni ku ‘tiya mwa tumelo ya Sikreste.’ Luna—hamoho ni basali ba bañata ba ba mwahal’a luna—lu ‘ba banna’ ka ku sebeleza Mulimu ka bundume sina bashaeli ba Mubuso. (Samu 68:11) Lu ‘ba ni m’ata’ ka ku zwelapili ku itinga ku Ndat’a luna wa kwa lihalimu kuli a lu tiise ilikuli lu eze tato ya hae.—Mafilipi 4:13.

4. Ne ku tile cwañi kuli lu fite fa ku kolobezwa sina Bakreste?

⁴ Ne lu amuhezi niti ha ne lu ineezi ku  Jehova ka ku tala ni ku bonisa buineelo b’o ka ku nweliswa mwa mezi. Kono ne ku tahile cwañi kuli lu fite fa ku kolobezwa? Sapili, ne lu kalile ku ituta zibo ye nepahezi ya Linzwi la Mulimu. (Joani 17:3) Kiha lu ba ni tumelo ni ku susuezwa ku baka, ili ku bonisa ha buniti kuli lu bakezi libi za kwamulaho. (Likezo 3:19; Maheberu 11:6) Kihona lu sikuluha, kakuli ne lu fulalezi likezo ze maswe ilikuli lu pile ka ku lumelelana ni tato ya Mulimu. (Maroma 12:2; Maefese 4:23, 24) Ku tuha f’o, lwa ineela ku Jehova ka tapelo ka pilu ya luna kaufela. (Mateu 16:24; 1 Pitrosi 2:21) Lwa kupa Mulimu ku lu fa lizwalo le linde mi lwa kolobezwa ka ku bonisa buineelo bwa luna ku yena. (1 Pitrosi 3:21) Ku ikupulisanga mihato yeo ku ka lu tusa ku isa mamelelo kwa butokwa bwa ku zwelapili ku ikataza ku peta za buineelo bwa luna ni ku zwelapili ku sebeleza Jehova ka pilu ye tiile.

Mu Zwelepili ku Bata Zibo Ye Nepahezi

5. Ki kabakalañi ha lu lukela ku zwelapili ku ituta zibo ya Mañolo?

⁵ Kuli lu pete za buineelo bwa luna ku Mulimu, lu lukela ku zwelapili ku ba ni zibo ya Mañolo ye tiisa tumelo. Ne ku tabisa hakalo ku ca sico sa kwa moya ha ne lu til’o ziba niti ya Mulimu lwa pili! (Mateu 24:45-47) “Lico” zeo n’e li ze tabusa—mi ne li lu tiisize kwa moya. Cwale, ki kwa butokwa ku zwelapili ku ca sico sa kwa moya se si tiisa ilikuli lu zwelepili ku ba ni pilu ye tiile ka ku ba batanga ba Jehova ba ba sepahala.

6. Ne mu konile ku tusiwa cwañi ku ba ni buitebuho bo bu zwelela kwa pilu bwa niti ye mwa Bibele?

⁶ Buikatazo bwa tokwahala kuli lu ekeze kwa zibo ya luna ya Mañolo. Ku swana ni ku pumbula maluo a’ patilwe—ili nto ye tokwa ku sebeza ka t’ata. Kono kwa tabisa hakalo ku fita fa “ku ziba za Mulimu”! (Liproverbia 2:1-6) Muhasanyi wa Mubuso ha n’a kalile ku ituta Bibele ni mina, mwendi n’a itusisize buka ya Zibo Ye Isa kwa Bupilo Bo Bu Sa Feli. Mwendi ne ku tandilwe nako ye ñata kuli mu feze kauhanyo ni kauhanyo, mi mwendi ne mu sa i fezangi mwa muitutelo u li muñwi. Ne mu tusizwe mañolo a’ bonisizwe ha n’a balilwe ni ku taluswa. Haiba sisupo se siñwi ne si li t’ata ku si utwisisa, ne si taluswa. Ya n’a mi lutanga Bibele n’a itukiseza hande, ku kupa moya wa Mulimu, ni ku mi tusa ku itebuha niti ku zwelela kwa pilu.

7. Ki nto mañi ye konisa mutu ku luta ba bañwi niti ya Mulimu?

⁷ Buikatazo b’o ne bu swanela, kakuli Paulusi n’a ñozi kuli: “Ya lutwa Linzwi a abele ya mu luta ku ze nde kaufela.” (Magalata 6:6) F’a, linzwi la Sigerike li bonisa kuli lituto za Linzwi la Mulimu ne li suñilwe mwa muhupulo ni pilu ya mutu “ya lutwa.” Ku lutiwa kwa mina cwalo ku mi konisa kuli ni mina mu lute ba bañwi. (Likezo 18:25) Kuli mu pete za buineelo bwa mina, mu lukela ku zwelapili ku ba ni buikangulo bo bunde bwa kwa moya ni buitiiso ka ku zwelapili ku ituta Linzwi la Mulimu.—1 Timotea 4:13; Tite 1:13; 2:2.

 Mu Hupule ku Baka ni ku Sikuluha kwa Mina

8. Ku zwelapili ku ba ni muzamao wa silumeli ku konahala cwañi?

⁸ Kana mwa hupula mo ne mu ikutwezi ku imuluha ha ne mu itutile niti, mwa baka, mi mwa ikutwa kuli Mulimu u mi swalezi ka ku ya ka tumelo mwa sitabelo sa Jesu sa tiululo? (Samu 32:1-5; Maroma 5:8; 1 Pitrosi 3:18) Kaniti ha mu bati ku kutela hape mwa mupilelo wa sibi. (2 Pitrosi 2:20-22) Mwahal’a lika ze ñwi, ku lapelanga kamita ku Jehova ku ka mi tusa ku zwelapili mwa muzamao wa silumeli, ku peta za buineelo bwa mina, ni ku zwelapili ku sebeleza Jehova ka busepahali.—2 Pitrosi 3:11, 12.

9. Ha se lu tuhezi ku eza likezo za sibi, lu lukela ku latelela mupilelo mañi?

⁹ Ha se mu cincize ka ku tuhela likezo za sibi, mu zwelepili ku kupa tuso ku Mulimu ilikuli mu zwelepili ku ba ni pilu ye tiile. Ku swana inge kuli ne mu zamaya mwa nzila ye fosahezi mi mwa bata ketelelo fa mapa ye sepeha mi mwa kalisa ku zamaya mwa nzila ye lukile. Mu si keluhi cwale. Mu zwelepili ku itinga fa ketelelo ya Mulimu, mi mu tundamene ku inelela mwa nzila ye isa kwa bupilo.—Isaya 30:20, 21; Mateu 7:13, 14.

Ni Kamuta Mu Si Libali Buineelo ni Kolobezo ya Mina

10. Ki lisupo mañi ze lu lukela ku n’o hupulanga ka za buineelo bwa luna ku Mulimu?

¹⁰ Mu si libali kuli ne mu ineezi ku Jehova ka tapelo, ka mulelo wa ku mu sebeleza ka busepahali ku ya ku ile. (Juda 20, 21) Buineelo bu talusa ku itemuhela, kamba ku ikauhanya, ka mulelo wa ku eza musebezi o kenile. (Livitike 15:31; 22:2) Buineelo bwa mina n’e si tumelelano ya swalelele kamba buitamo kwa batu. N’e li buineelo bo bu sa feli ku Mubusi wa pupo kamukana, mi ku peta za bona ku tokwa kuli mu be ba ba sepahala ku Mulimu ku ya ku ile. Ee, ‘ha lu pila kamba ku shwa, lu ba Mulena.’ (Maroma 14:7, 8) Tabo ya luna i itingile fa ku eza tato ya hae ni ku zwelapili ku mu sebeleza ka pilu ye tiile.

11. Ki kabakalañi ha mu lukela ku hupula kolobezo ya mina ni butokwa bwa yona?

¹¹ Kamita mu hupulange kolobezo ya mina ye bonisa buineelo bwa mina ku Mulimu bwa ka pilu ya mina kaufela. N’e si kolobezo ya ku hapelezwa, kakuli ki mina beñi be ne ba ikatulezi. Kana cwale mu ka tundamena ku itusisa mwa bupilo bwa mina kaufela tato ya mina ka ku lumelelana ni tato ya Mulimu? Ne mu kupile Mulimu kuli a mi fe lizwalo le linde mi ne mu kolobelizwe ka ku bonisa kuli mu ineezi ku yena. Mu bukeleze lizwalo le linde leo ka ku peta za buineelo bwa mina, mi mu ka fuyolwa hahulu ki Jehova.—Liproverbia 10:22.

Tato ya Mina I Peta Se Siñwi

12, 13. Tato ya luna ka sibili i nyalanisana cwañi ni buineelo ni kolobezo?

¹² Kaniti, buineelo ni kolobezo li tusize hahulu-hulu bolule-lule ba batu mwa lifasi kaufela. Ha lu bonisa buineelo bwa luna ku Mulimu ka ku kolobezwa mwa mezi, lu shwa kwa neku la mupilelo wa luna wa kale, kono ha lu shwi kwa neku la tato ya luna. Ka ku ba balumeli ba ba lutilwe hande, ne lu itusisize tato ya luna ha ne lu ineezi ku Mulimu ka tapelo ni ku kolobezwa. Ku ineela ni ku kolobezwa ku tokwa kuli lu zibe seo tato ya Mulimu i li sona mi ni ku ikatulela ku i eza. (Maefese 5:17) Kacwalo, lu likanyisa Jesu, ya n’a itusisize tato ya hae ha n’a tuhezi musebezi wa hae wa bubeti, a kolobezwa, mi a itusisa nako ya hae kaufela  mwa ku eza tato ya Ndat’ahe wa kwa lihalimu.—Samu 40:7, 8; Joani 6:38-40.

¹³ Jehova Mulimu n’a lelile kuli Mwan’a hae ‘a eziwe ya petehile, ka butuku bw’a utwile.’ Kacwalo, Jesu n’a na ni ku itusisa tato ya hae ilikuli a tiyele butuku bo bu cwalo ka busepahali. Kabakaleo, n’a tahisize “litapelo ni likupo ka muhuwo o mutuna, ni ka miyoko, . . . mi a utwiwa kabakala bulapeli bwa hae.” (Maheberu 2:10, 18; 5:7, 8) Ha lu ba ni sabo ye swanela ye cwalo ku Mulimu, ni luna kaniti luli lu ka “utwiwa,” mi lwa kona ku kolwa kuli Jehova u ka lu tiisa ka ku ba Lipaki za hae ze sepahala.—Isaya 43:10.

Mwa Kona ku Zwelapili ku Ba ni Pilu Ye Tiile

14. Ki kabakalañi ha lu lukela ku bala Bibele ka zazi?

¹⁴ Ki lika mañi ze ka mi tusa ku zwelapili ku ba ni pilu ye tiile mi kacwalo ni ku peta za buineelo bwa mina ku Mulimu? Mu bale Bibele ka zazi, ka mulelo wa ku ba ni zibo ya Linzwi la Mulimu ye zwelapili ku ekezeha. “Mutanga ya sepahala, ya na ni kutwisiso,” kamita u lu susuezanga hahulu ku  eza cwalo. Kelezo ye cwalo ya fiwa kakuli ku peta za buineelo bwa luna ku tokwa kuli lu zwelepili ku zamaya mwa niti ya Mulimu. Kambe kopano ya Jehova ne i ka luta lituto za buhata ka bomu, Lipaki za Jehova ni be ba kutaza ku bona ne ba si ke ba susuezwa ku bala Bibele.

15. (a) Ki lika mañi ze lukelwa ku nyakisiswa ha mu eza likatulo? (b) Ki kabakalañi ha ku konwa ku bulelwa kuli mubeleko ku Mukreste haki ona wa butokwa ka ku fitisisa?

¹⁵ Ha mu eza likatulo, kamita mu nyakisise mo li amela ka za ku peta za buineelo bwa mina ku Jehova. Li kana za ama mubeleko wa mina. Kana mwa likanga ka t’ata kuli mubeleko wa mina u mi tuse ku zwisezapili za bulapeli bwa niti? Nihaike hañata babelekisi ba fumananga kuli Bakreste ba ba ineezi ba konwa ku itingwa mi ba sebeza hande, hape ba lemuha kuli Lipaki za Jehova ha ba lakazi litulo mwa lifasi mi ha ba lwaneli ni ba bañwi ku bata ku ba mwa libaka ze tuna hahulu. Libaka kikuli Lipaki ha ba leli ku ipumanela sifumu, libubo, butumo, kamba m’ata. Nto ya butokwa ka ku fitisisa ku ba ba peta za buineelo bwa bona ku Mulimu ki ku eza tato ya hae. Mubeleko o’ ba konisa ku ipumanela ze tokwahala mwa bupilo u mwa sibaka sa bubeli, haki wa butokwa ka ku fitisisa. Sina muapositola Paulusi, musebezi wa bona o mutuna ki bukombwa bwa Sikreste. (Likezo 18:3, 4; 2 Matesalonika 3:7, 8; 1 Timotea 5:8) Kana mu iyakatwa hahulu ze ama za Mubuso mwa bupilo bwa mina?—Mateu 6:25-33.

16. Lu kona ku ezañi haiba lipilaelo ze fitelezi li lu palelwisa ku peta za buineelo bwa luna ku Mulimu?

¹⁶ Ba bañwi pili ba si ka ituta niti mwendi ne ba bat’o eshulwa ki lipilaelo za mifuta-futa. Kono ne ba bile ni tabo, buitebuho, ni lilato ku Mulimu ha ne ba amuhezi sepo ya za Mubuso! Ku nahana ka za lituso ze ba fumani ku zwa ka nako yeo ku kona ku ba tusa ku peta za buineelo bwa bona ku Jehova. Kono ku cwañi haiba lipilaelo ze fitelezi ka za butata bwa mwa bupilo mwa muinelo w’o li bata ku yowelisa “Linzwi la Mulimu,” mane sina mikakani ha i kona ku palelwisa limela ku hula? (Luka 8:7, 11, 14; Mateu 13:22; Mareka 4:18, 19) Ha mu lemuha kuli seo si kalisa ku ezahala ku mina kamba kwa lubasi lwa mina, mu lwalise Jehova pilaelo ya mina mi mu kupe kuli a mi tuse ku hula mwa lilato ni buitebuho bwa mina. Ha mu mu lwalisa mulwalo wa mina, u ka mi tiisa ni ku mi fa m’ata a ku zwelapili ku mu sebeleza ka tabo ili ka pilu ye tiile.—Samu 55:22; Mafilipi 4:6, 7; Sinulo 2:4.

17. Ku konahala cwañi ku tiyela miliko ye mituna?

¹⁷ Mu zwelepili ku lapela kamita ku Jehova Mulimu, mane sina ha ne mu lapezi ha ne mu ineela ku yena. (Samu 65:2) Ha mu ba mwa tiko ya ku fosa kamba mwa muliko o mutuna, mu kupe ketelelo ni tuso ku Mulimu, mi mu li sebelise. Mu hupule butokwa bwa tumelo, kakuli mulutiwa Jakobo n’a ñozi kuli: “Mutu ku mina h’a tokwa butali [bwa ku tiyela ka bona muliko], a bu kupe ku Mulimu ya fanga batu kamukana ka bufani bo butuna, a sa kanani; mi u ka bu fiwa. Kono a kupe ka tumelo, a si ke a bilaela ka se siñwi; kakuli ya bilaela u swana sina liputu la liwate, le li zukuzwa ki moya, le li fukisezwa kafa ni kafa. Mutu ya cwalo a si ke a libelela ku amuhela se siñwi ku Mulena; ki mutu wa lipilu ze peli, ya lika-lika mwa linzila za hae kaufela.” (Jakobo 1:5-8) Haiba muliko o muñwi u bonahala ku ba o mutuna hahulu, lwa kona ku kolwa ka za se: “Ha mu si ka tahelwa kale ki muliko o sa konwi ki mutu. Kono Mulimu wa sepahala, mi h’a na ku lumela kuli mu likwe ki ze mi fita; kono hamoho ni muliko u ka mi fa nzila ya ku zwa ku ona, kuli mu kone ku itiisa ku ona.”—1 Makorinte 10:13.

18. Lu kona ku ezañi haiba sibi se siñwi se situna se lu patile si fokolisa tundamo ya luna ya ku peta za buineelo bwa luna ku Jehova?

¹⁸ Ku cwañi haiba sibi se situna se mu patile sa mi sisita mwa lizwalo ni ku fokolisa tundamo ya mina ya ku peta za buineelo bwa mina ku Mulimu? Haiba mu bakile, mwa kona ku omba-ombiwa ki ku ziba kuli Jehova ‘h’a nyenyi pilu ye lobehile, ye swabile.’ (Samu 51:17)  Mu kupe tuso kwa maeluda ba Sikreste ba ba lilato, ka ku ziba kuli bona—ka ku likanyisa Jehova—ha ba na ku keshebisa takazo ya mina ya ku kalisa sinca silikani se sinde ni Ndat’a mina wa kwa lihalimu. (Samu 103:10-14; Jakobo 5:13-15) Cwale, m’ata a mina a kwa moya ha s’a uncafalizwe mi pilu ya mina ha se i tiisizwe, mu ka kona ku ezeza mautu a mina linzila ze lukile ni ku kona ku peta za buineelo bwa mina ku Mulimu.—Maheberu 12:12, 13.

Mu Zwelepili ku Sebeza ka Pilu Ye Tiile

19, 20. Ki kabakalañi ha ku li kwa butokwa kuli lu zwelepili ku peta za buineelo bwa luna?

¹⁹ Mwa linako ze t’ata ze, lu lukela ku satalala ku peta za buineelo bwa luna ni ku zwelapili ku sebeleza Mulimu ka pilu ye tiile. Jesu n’a ize: “Ya tundamena ku isa kwa mafelelezo, ki yena ya ka piliswa.” (Mateu 24:13) Bakeñisa kuli lu pila mwa “mazazi a maungulelo,” mafelelezo a kona ku taha ka nako ifi kamba ifi. (2 Timotea 3:1) Hape, ha ku na ni yo mukana ku luna ya kona ku ziba hande kuli lu ka pila kamuso. (Jakobo 4:13, 14) Kacwalo, ku butokwa luli kuli lu zwelepili ku peta za buineelo bwa luna hona cwale!

²⁰ Muapositola Pitrosi n’a koñomekile taba yeo mwa liñolo la hae la bubeli. N’a bonisize kuli sina ba ba maswe ha ne ba yundisizwe mwa Munda, kacwalo lifasi la swanisezo, kamba nyangela ya batu ba ba maswe, ba ka yundiswa mwa “lizazi la Mulena.” Kacwalo, Pitrosi n’a ize: “Mu lukela ku pila ka mizamao ye kenile hahulu, ni ka bulapeli.” Hape n’a ba susuelize kuli: ‘Balatiwa, ha mu lemusizwe litaba zeo pili, mu tone; kakuli ha mu ka hohiwa ni mina [ki baluti ba buhata ni banyefuli], mu ka suhana mwa wa mwa ku tiya kwa mina.’ (2 Pitrosi 3:5-17) Neikaba bumai bo butuna mutu ya kolobelizwe ha n’a ka yaululwa ni ku fita kwa mafelelezo a bupilo bwa hae a li mutu y’a palezwi ku zwelapili ku ba ni pilu ye tiile!

21, 22. Manzwi a Samu 57:7 a bile cwañi a niti ku Davida ni kwa Bakreste ba niti?

²¹ Tundamo ya mina ya ku peta za buineelo bwa mina ku Mulimu i ka tiiswa ha mu zwelapili ku hupula lizazi la tabo fo ne mu kolobelelizwe mane ni ha mu kupa tuso ku Mulimu ilikuli lipulelo ni likezo za mina li tabise pilu ya hae. (Liproverbia 27:11) Jehova ni kamuta h’a swabisangi batu ba hae, mi kaniti lu lukela ku sepahala ku yena. (Samu 94:14) N’a bonisize mufelañeke ni makeke ha n’a filikanyize milelo ya lila ni ku lukulula Davida. Ka ku itebuha zeo, Davida a bulela ka ku tiya, ka ku sa zikinyeha, ka za lilato la hae ku Mupulusi wa hae. Ka ku itebuha hahulu, n’a opezi kuli: “Pilu ya ka i tiile Mulimu, pilu ya ka i tiile: Ni ka opela, e, ni ka ku lumbeka.”—Samu 57:7.

²² Sina Davida, Bakreste ba niti ha ba si ka tuhela ku sepahala ku Mulimu. Ka lipilu ze tiile, b’a nga Jehova ku ba yena mupilisi ni mubukelezi wa bona, mi ba mu opelela milumbeko. Haiba pilu ya mina ki ye tiile, i ka itinga ku Mulimu, mi ka tuso ya hae mu ka kona ku peta za buineelo bwa mina. Ee, mu ka ba sina “ya lukile” y’o walisamu n’a opezi ka za hae kuli: “H’a na ku saba taba ye maswe; pilu ya hae i tiile, i sepile [Muñ’a] Bupilo.” (Samu 112:6, 7) Ka ku sepa Mulimu ni ka ku itinga ku yena ka ku tala, mwa kona ku peta za buineelo bwa mina ni ku zwelapili ku sebeleza Jehova ka pilu ye tiile.

Kana Mwa Hupula?

• Ki kabakalañi ha lu lukela ku zwelapili ku ituta zibo ye nepahezi ye mwa Bibele?

• Ki kabakalañi ha lu lukela ku n’o hupulanga za ku baka ni ku sikuluha kwa luna?

• Lu tusiwa cwañi ka ku hupula za buineelo ni kolobezo ya luna?

• Ki lika mañi ze ka lu tusa ku zwelapili ku sebeleza Jehova ka pilu ye tiile?

[Lipuzo za Tuto]

[Maswaniso a fa likepe 18]

Kana mu ba ba zwelapili ku ba ni buikangulo bo bunde ka ku bala Linzwi la Mulimu ka zazi?

[Siswaniso se si fa likepe 18]

Ku nga musebezi wa bukombwa bwa Sikreste ku ba ona musebezi wa butokwa ka ku fitisisa ku lu tusa ku zwelapili ku sebeleza Jehova ka pilu ye tiile