Piho ya Bashaeli Ba Mubuso

“Ne Ni Bata ku Sebeleza Mulimu”

“A MU zwe ku yena mina sicaba sa ka.” Yeo n’e li pizo ya lingeloi ye n’e utwilwe ki muapositola Joani mwa lilimo za mwanda wa pili C.E. Mwa miteñi ya luna, bolule-lule ba batu ba ba sepahala se ba ngile muhato ni ku zwa ku “Babilona yo mutuna,” yona kopano ya lifasi ya bulapeli kamukana bwa buhata. (Sinulo 18:1-4) Mwahal’a bona ku na ni Wilner wa kwa Haiti, ya talusa za n’a ipumani ku zona ze.

“Ne ni pepilwe ka 1956 mwa lubasi lwa balapeli ba ba tiile ba Katolika mwa toloponyana ya St. Marc, mwa Haiti. Mu nahane tabo ye n’e bile mwa lubasi lwa hesu ha ne ni ketilwe hamoho ni ba babeli ba bañwi mwa tolopo ya luna ku ya kwa sikolo sa baprisita mwa St. Michel de l’Atalaye, mwa Haiti. Ku tuha f’o, ka 1980, lwa lumelwa kwa Stavelot, mwa Belgium, kuli lu y’o ituta ze ñwi. Teñi ko, lwa y’o kena hape kwa yunivesiti ya Katolika.

“Kwa makalelo ne ni cisehela ka za ku ba muprisita. Zazi le liñwi mwa muzuzu wa ku cela lico za musihali, muprisita ya n’a zamaisa sikwata sa hesu a ni kupa ku litela hanyinyani kakuli kutwi n’a na ni sa n’a bata ku ni bulelela. Mu nahane mo ne ni komokezi ha n’a ni bulelezi patalaza kuli n’a bata ku eza kalombe ni na! Na hana tushambwe twa hae twa ku ni bata, niteñi na zwafa hahulu. Na ñolela lubasi lwa hesu ka za kezahalo yeo mi na zwa kwa sikolo sa baprisita seo hamulaho wa likwelinyana, ku si na taba ni ku ñoñoleha kwa bona. N’a yo fumana kwa ku ina mwa munzi o muñwi mi na zwelapili ku ituta lituto za musebezi u sili.

“Ha ne ni kutezi kwa St. Marc, ne se ni tuhezi ku sepa Keleke ya Katolika. Niteñi, ne ni sa bata ku sebeleza Mulimu, kono ne ni sa zibi sa ku eza. Na ya kwa keleke ya Adventist, kwa keleke ya Ebenezer, ni kwa keleke ya ma-Mormon. Ne ni kukana kwa moya.

“Cwale na hupula kuli ha ne ni sa li kwa sikolo sa buprisita mwa Belgium, ne ni balanga Bibele ya Crampon. Mwa Bibele yeo ne ni fumani kuli Mulimu u na ni libizo. Mi ka ku itusisa libizo la hae, na lapela ka t’ata ku Mulimu kuli a ni tuse ku fumana bulapeli bwa niti.

“Hamulahonyana wa f’o, Lipaki za Jehova ba babeli ba tutela mwa sibaka mo ne ni pila. N’e li ba ba wile pilu, ba maoyo, ili ba ba kutekeha luli. Ne ni tabezi mupilelo wa bona. Zazi le liñwi, yo muñwi wa Lipaki ba babeli bao a ni mema ku ya kwa Kupuzo ya ka silimo ya lifu la Kreste. Na y’o ikola hahulu mukopano w’o mi na lumela ku ituta Bibele kamita ni Lipaki. Mwa likweli ze bat’o ba ze silezi hasamulaho, na kolwa kuli ne ni fumani nzila ye lukile ya ku sebeleza Mulimu ka yona. Na ineela ku Jehova mi na kolobezwa la November 20, 1988.”

Hañi-hañi, Wilner a kalisa sebelezo ya ka nako ye tezi. Kacenu le, ki eluda mwa puteho. Yena ni musal’a hae, hamoho ni bana ba bona ba babeli, ba sebeza ka tabo mwa puteho.

[Siswaniso se si fa likepe 9]

Ka ku bala Bibele, Wilner n’a fumani kuli libizo la Mulimu ki Jehova