Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone nji mwa kona ku alaba lipuzo ze latelela:

• Ki ifi tukiso ya ka butu ye ama Ngambolo ya fa lilundu ye mu kana mwa itusisa kwa ku fukuza maswenyeho?

Ka zazi, mwa kona ku bala ye ñwi ya lituto ze bunolo za Jesu ze n’e bulezwi mwa ngambolo yeo kamba ko kuñwi mwa Libuka za Evangeli. Ka ku yeya tuto yeo ni ku bata ku i sebelisa ka butu, mu kana mwa fumana tabo ye ñata ni ku fukuza maswenyeho.—12/15, makepe 12-14.

• Ki afi mabaka a mande a malalu a kuli maeluda ba puteho ba lute batanga ba bukombwa ku peta buikalabelo bo bu ekezehile?

Bakeñisa kekezeho kwa palo ya Lipaki za Jehova, ku tokwahala banna ba bañata ba ba sepahala kuli ba tuse ba ba sa zo kolobezwa ku zwelapili. Maeluda ba kale cwale ha ba sa kona ku eza mo ne ba ezezanga kabakala busupali kamba makulanu. Mi maeluda ba bañwi ba ba kona ba sweli buikalabelo bo buñwi isi fela bwa mwa puteho ya bona, kacwalo ba kana ba sa koni ku eza ze ñata mwa puteho ya bona sina mo ne ba ezezanga pili.—1/1, likepe 29.

• Batu ba sepanga cwañi milimu ya buhata?

Buñata ba lapelanga milimu ya bulapeli bwa bona, kono yona yeo ka buniti fela i kana ya ba milimu ye sa pili ili ye sa koni ku pilisa inge Baale wa mwa lizazi la Elia. (1 Malena 18:26, 29; Samu 135:15-17) Ba bañwi ba tompa batu ba ba eza lika za ku itabisa ka zona kamba babapali ba batuna, ili ba ba sa koni ku fa sepo tenyene ya nako ya kwapili. Ka ku fapahana, Jehova u teñi luli mi wa taleleza lisepiso za hae.—1/15, makepe 3-5.

• Lu kona ku itutañi kwa muhato wa n’a ngile Kaine kwa temuso ya Mulimu?

Mulimu u lu file tukuluho ya ku iketela, mi lwa kona ku keta ku eza ze lukile ku fita ku eza lika ze si ka luka, za n’a ezize Kaine. Taba ya mwa Bibele hape i bonisa kuli Jehova u fanga katulo ya hae kwa batu ba ba sa baki.—1/15, makepe 22-3.

• Ki kabakalañi bukeni ha bu li bwa butokwa hahulu kacenu?

Mupilelo wa sicaba ha u nze u sweli ku cinca, ba bañata ba itusisa nako ye nyinyani fela kwa ku kenisa mahae a bona ku fita mo ne ku belanga. Ku keshebisa bukeni sina kwa lico ni mezi ku kona ku tahisa matuku. Ka ku ekeza kwa bukeni bwa kwa mubili, Bibele i koñomeka ku isa mamelelo kwa bukeni bwa kwa moya, mwa muzamao, ni mwa munahano.—2/1, makepe 3-6.

• Ka ku ama kwa lipaki be ne ba li teñi pili Bukreste bu si ka kalisa, Paulusi n’a bulezi kuli “ba si ke ba fumana ku petahala, luna lu li siyo kwateñi.” Kamukwaufi? (Maheberu 11:40)

Mwahal’a Lilimo ze Sikiti ze taha, Kreste ni banyani ba hae ba ba tozizwe ili ba ba mwa lihalimu, ba ba sebeza sina malena ni baprisita, ba ka fa lituso za tiululo ya sitabelo ku ba ba ka zusiwa kwa bafu. Ba ba sepahala cwalo inge ba ba ñozwi kwa Maheberu kauhanyo 11 kacwalo ba ka “fumana ku petahala.”—2/1, likepe 23.

• Sisupo sa Paulusi ne li sifi ha n’a bulelezi Maheberu kuli: “Ha mu si ka lwana mane ku zwe mali”? (Maheberu 12:4)

N’a talusize ku lwana ku isa lifu. Ne ku na ni mitala ya ba kwaikale be ne ba sepehalile ku isa lifu. Nihaike kuli Maheberu ba n’a ñolezi Paulusi ne ba si ka likwa ku fita f’o, ne ba tokwa ku zwelapili ku hula, ku yaha tumelo ya bona kuli ba tiyele se ne si ka ba tahela kaufela.—2/15, likepe 29.

• Kana kwa swanela kuli Mukreste a toze situpu sa muhabo ya timezi kuli si si ke sa bola?

Ku toza situpu k’o ki nzila ya ku si bukeleza ka yona. Batu ba bañwi ba kwaikale ne ba latelela kezo yeo ka mabaka a za bulapeli. Nto yeo ne i si ke ya ba cwalo kwa balapeli ba niti. (Muekelesia 9:5; Likezo 24:15) Ku toza situpu ku kana kwa liyehisa kezo ye sa konwi ku tibelwa ya kuli situpu si kutele kwa liluli. (Genese 3:19) Kono ha ku na tuso ya ku bilaela haiba mulao u tokwa kuli situpu si toziwe, lilama ba bañwi ba lubasi ba tabela ku eza cwalo, kamba kuli kwa tokwahala kabakala kuli ba bañwi ba na ni ku zamaya musipili o mutelele ku taha kwa maswabi.—3/15, makepe 29-31.

• Ki mitala ifi ya mwa Bibele y’e lu luta kuli Mulimu u lumelela batu ba mwa macaba kaufela?

Jehova n’a lumile mupolofita Jonasi ku yo lemusa batu ba Ninive, mi Mulimu a susueza Jonasi kuli a amuhele ku baka kwa bona. Ka manzwi ni ka mutala, Jesu n’a susuelize kuli Masamaria ba ezwe ka lilato. Muapositola Pitrosi ni muapositola Paulusi sibeli sa bona ne ba na ni musebezi wa ku tisa taba ye nde ku be ne ba si Majuda. Ku zwelela kwa mitala ye cwalo, lwa kona ku bona butokwa bwa ku lika ku tusa batu ba ba simuluha ko ku shutana-shutana.—4/1, makepe 21-4.