Ki Kai Ko Mu Sepile ku Fumana Buiketo?

Mwa munzinyana wa kwa West Africa, Josué wa mucaha u laeza lubasi lwa habo ni balikani ba hae. * Mi kihona a ya kwa tolopo ye tuna ku yo bata mali. Kono hasamulaho fela wa ku fita, sepo ya hae y’a unda ha lemuha kuli ku t’ata ku fumana mali mwa tolopo.

JOSUÉ u fita fa ku zwafa h’a nze a lika ku twaela ku pila bupilo bwa mwa tolopo. Ni hanyinyani, tolopo ye tuna ha i si ka ba mwa n’a hupulela. Ka nako yeo kaufela, kwatas’a pilu ya Josué ku na ni takazo ye tuna ya ku kutela kwa lubasi lwa habo ni kwa balikani mwa munzi o shebile wale wa n’a siile. Kono u saba kuli bayahi ba bañwi mwa munzi ba ka mu sheununa. U bilaela cwana u li: ‘Ba ka ni biza kuli ni mupalelwi, kakuli ha ni si ka kondisa ze ne ni bata mwa tolopo.’

Nto ye mu bilaeza ni ku fita ki maswabi e ba kana ba ikutwa bashemi ba hae. Ba sepile yena kuli a ba tuse kwa mali. Ha nz’a lika ku talimana ni lipilaelo ze imeza zeo, Josué u tanda lihora ze ñata fa musebezi o nyazahalisa kono u fumana fela mali a manyinyani hahulu ku a n’a libelela ku holanga. U bombile bakeñisa ku beleka ka ku tula tikanyo. Mi nako ye siyezi ya kuli a eze misebezi ya Sikreste y’a nga ka butuna, i fukuzeha viki ni viki. U ikutwa ku ishonda ni buinosi bakeñisa ku ba kwahule hahulu ni silikani sa lubasi ni balikani ba kale. U fumana kuli tolopo ha i si ka mu fumanisa buiketo bwa n’a lakaza hahulu.

Nihaike mabizo ni libaka za shutana-shutana, taba ye maswe ya Josué i sweli ku kuta-kutela ku ezahala. Haki kuli Josué n’a na ni buitati bakeñisa ku bata ku shimbuluka—n’a bata fela buiketo. N’a ikutwa ku zwelela kwatas’a pilu ya hae kuli n’a kona ku peta ze nde mwa tolopo ku fita mwa munzinyana wa habo yena. Kwa utwahala kuli fokuñwi mutu n’a kana a fita fa ku ba muipumaneli, kono seo ha si koni ku mu tahiseza buiketo sakata. Ne ku si ka ba cwalo ku Josué, mane ka mo ku bonahalela ha ku na ku ba cwalo ni ku ba bañwi ba bañata ba ba lika ku eza cwalo. Seo si lu buzisa kuli, ‘Buiketo ki sika mañi?’

Batu ba utwisisa buiketo ka ku shutana-shutana. Buiketo bu kona ku taluswa kuli ki tukuluho kwa lubeta kamba tukuluho kwa sabo kamba kwa ku ikalelwa. Buñata bwa batu ba lemuhile kuli kacenu ha ku na tukuluho ye tezi kwa lubeta. Ku bona ku likani ibile fela ba ikutwa ku silelezwa, ku si na taba ni miinelo ye bemba ye kana ya ba teñi.

Mina bo? Ki kai ko mu libelela ku fumana buiketo? Kana bu fumaneha mwa tolopo ku fita mwa munzi, sina mwa n’a hupulela Josué? Kana bu fumanwa ka masheleñi, ku si na taba ni ko mu a fumana kamba mo mu a fumanela? Esi mwendi bu fumanwa ka ku lika ku fumana mayemo a pahami mwa nyangela? Ku si na taba ni ko mu kolwa ku fumana buiketo, kana mina ni lubasi lwa mina mu ka ba ni bona nako ye kuma kai?

Ha lu nyakisiseñi linzila ze talu zeo batu ba bañata ba fumana buiketo ka zona—ko si fumaneha sibaka; masheleñi; mayemo. Kihona lu ka tatubisisa ko ku fumaneha buiketo bwa niti ili bo bu inelela.

[Litaluso za kwatasi]