Lipuzo Ze Zwa kwa Babali

Kana kwa swanela ku atumela Mulimu ka tapelo mutu a sa buleli kuli “ka libizo la Jesu”?

Bibele i bonisa kuli Bakreste ba ba lakaza ku atumela Jehova ka tapelo ba lukela ku eza cwalo ka libizo la Jesu. Jesu n’a bulelezi balutiwa ba hae kuli: “Ha ku na mutu ya ka taha ku Ndate, konji ka na.” N’a ekelize kuli: “Se mu ka kupa kaufela ka Libizo la ka, ni ka si eza, kuli Ndate a lumbwe ka Mwana. Ha mu kupa se siñwi ka Libizo la ka, ni ka si eza.”—Joani 14:6, 13, 14.

Ka za mayemo a’ ipitezi a Jesu, buka ye bizwa Cyclopedia of Biblical, Theological, and Ecclesiastical Literature i li: “Mulimu ki yena a nosi ya lukelwa ku lapelwa, mi u lapelwa ka Jesu Kreste, yena Muyemeli y’a fahali. Kacwalo, likupo kaufela ze fitiswa kwa bahalalehi kamba mangeloi ki za mbango, mi hape ki za bunyefuli. Bulapeli kaufela bwa ku lapela sibupiwa, ibe se si m’ata cwañi, ki ku lapela milimu, mi ku eza cwalo ku haniswa hahulu-hulu mwa mulao o kenile wa Mulimu.”

Ku cwañi haiba mutu, hamulaho wa kezahalo ye tabisa, a bulela kuli, “Ni itumezi Jehova” a sa ekezi ku bulela kuli “ka libizo la Jesu”? Kana ku eza cwalo neikaba kashwau? Kutokwa. L’u ngeñi kuli Mukreste u tahelwa ki kozi ya ka sipundumukela mi a huwa kuli: “Ha ku ni tuse, Jehova!” Mulimu n’a si ke a hana ku tusa kakuli mutang’a hae n’a si ka bulela kuli “ka libizo la Jesu.”

Kono ku lemuhiwe kuli tapelo ha i talusi ku bulela fela ka ku tumusa linzwi, niheba ku Mulimu. Ka mutala, Kaine ha s’a atuzwi ki Jehova bakeñisa ku bulaya Abele munyan’a hae, n’a ize: “Koto ya ka i bukiti, ya ni fita. Bona, kacenu u ni lelekile mwa naha; mane ni patelwe pata ya hao; mi ni ka ba mutu ya saba, ya yambaela mwa lifasi; kabakaleo, mutu kaufela ya ka ni fumana, u ka ni bulaya.” (Genese 4:13, 14) Kaine niha n’a bulelela Jehova cwalo, ku liloka kwa hae n’e li ku bilaela ka za muselo o maswe wa sibi.

Bibele i lu bulelela kuli: “Mulimu u hanela ba ba ikuhumusa, kono u shemuba ba ba ikokobeza.” Ku ambota Mwambakani-Ya-Pahami inge kuli mutu u ambota mutu yo muñwi kaniti luli ku bonisa kutokwa buikokobezo. (Jakobo 4:6; Samu 47:2; Sinulo 14:7) Hape neikaba kashwau ku ba ni zibo ya se li bulela Linzwi la Mulimu ka za kalulo ya Jesu mi ka bomu ni ku lapela mutu a sa lemuhi Jesu Kreste.—Luka 1:32, 33.

F’o haki kuli Jehova u bata kuli ha lu lapela, lu lapele ka nzila ye ñwi kamba mukwa o muñwi o tomilwe. Nto ya butokwa ki muinelo wa pilu ya mutu. (1 Samuele 16:7) Mwa lilimo za mwanda wa pili C.E., mulauli wa mpi ya Siroma wa libizo la Kornele “n’a sa katali ku lapela Mulimu.” Kornele, ya n’a li Mulicaba ya n’a si ka kena mwa mupato, n’a si ka ineela ku Jehova. Nihaike ha ku bonahali kuli n’a lapezi ka libizo la Jesu, litapelo za hae ne li “kambamezi ku Mulimu, mi [ne] li hupuzwi.” Libaka? Kakuli “ya lika lipilu” n’a boni kuli Kornele n’a li “mutu wa milapelo, ya saba Mulimu.” (Likezo 10:2, 4; Liproverbia 17:3) Ha n’a til’o ba ni zibo ka za “Jesu wa Nazareta,” Kornele a amuhela moya o kenile, mi a ba mulutiwa ya kolobelizwe wa Jesu—Likezo 10:30-48.

Sa butokwa kikuli batu haki bona ba ba atula ka za litapelo zeo Mulimu a utwa. Haiba Mukreste fokuñwi u bulelanga manzwi a mañwi ku Mulimu mi a sa buleli kuli “ka libizo la Jesu,” h’a tokwi ku ikutwa ku ba ni mulatu. Jehova wa ziba hande bufokoli bwa luna mi u bata ku lu tusa. (Samu 103:12-14) Lwa kona ku kolwa kuli ha lu lumela “Mwan’a Mulimu, . . . ha lu kupa nto ka ku lata kwa hae, wa lu utwa.” (1 Joani 5:13, 14) Kono sihulu Bakreste ba niti ha ba yemela ba bañwi mwa tapelo, ba lemuha kalulo ye bonisizwe mwa Mañolo yeo Jesu a peta mwa mulelo wa Jehova. Mi ka ku ipeya ku utwa ba lika ku kuteka Jesu ka ku kupa ze ba bata ku Mulimu ka yena.