Muta ku Baleha Ku Ba Nzila Ye Butali

LIFASI la cwale hañata li zibahala ka moya wa bundume bwa ku ipumisa ni mifilifili kamba ka miliko. Mutu ya baleha mwa butata hañata u’ ngiwanga kuli u buzwa kamba ki lipyeha. Mane a kana a tompololwa ki batu.

Kono Bibele i talusa ka ku utwahala kuli kwa banga ni linako f’o ku baleha ku li nzila ye butali ni ye bundume. Ka ku bonisa buniti bwa seo, Jesu Kreste, pili a si ka luma balutiwa ba hae ku ya mwa bukombwa, n’a ba bulelezi kuli: “Ha ba mi nyandisa mwa munzi o muñwi, mu sabele ku o muñwi.” (Mateu 10:23) Ee, balutiwa ba Jesu ne ba na ni ku lika ku baleha ku saba banyandisi ba bona. Ne ba si ke ba lika ku eza nto ye cwale ka ndwa ya bulapeli, ili ku lika ku sikulula ba bañwi ka ku ba hapeleza. Ne ba na ni taba ya kozo. (Mateu 10:11-14; Likezo 10:34-37) Kacwalo, mwa sibaka sa ku felela mwahalimu ka mabifi, Bakreste ne ba na ni ku baleha, ili ku ina kwahule ni balwanisi ba bona. Ka ku eza cwalo, ne ba zwezipili ku ba ni lizwalo le linde hamohocwalo ni silikani se sinde hahulu ni Jehova.—2 Makorinte 4:1, 2.

Mutala o fapahana u fumaneha mwa buka ya mwa Bibele ya Liproverbia. I bulela ka za mucaha, ili y’o mwa sibaka sa ku baleha ha n’a talimani ni muliko, a latelela lihule sina “pulu ye iswa kwa silaha.” Ne ku zwileñi? Ne ku zwile butata kabakala ku honiwa ki muliko o n’o sinyize bupilo bwa hae ka sibili.—Liproverbia 7:5-8, 21-23.

Ku cwañi haiba mu na ni ku talimana ni muliko wa ku eza buozwa kamba ku lwaniswa ki nto ye ñwi ye kona ku tahisa butata? Ka ku ya ka Linzwi la Mulimu, kezo ye swanela ikana ya ba ku baleha kapili-pili ku zwa mwa muinelo w’o.—Liproverbia 4:14, 15; 1 Makorinte 6:18; 2 Timotea 2:22.