Buyanga Ha Bu Na Maciñekelo

CHRISTIAN, y’a pila mwa naha ye ñwi ya mwa Africa, n’a isizwe mwa kunu ki masole ba ne ba likile ku mu hapeleza ku kena mwa busole, kono n’a hanile kabakala lizwalo la hae le li lutilwe ka Bibele. Masole kiha ba mu isa kwa nkambe ya busole, ili k’o hamulaho wa ku natakiwa ka mazazi a mane, lisole yo muñwi ku bona a mu kunupa kwa lihutu. Christian n’a konile ku fita kwa sipatela, kono lihutu la hae ne li tokwa ku pumelwa mwatas’a liñwele. Mwa naha ye ñwi ya mwa Africa, nihaiba banana ba banyinyani se ba pumilwe mahutu ki balwani ba baipanguli. Mi ku kalela kwa Cambodia ku yo fita kwa Balkan, ku zwa kwa Afghanistan ku ya kwa Angola, limbomba ze teiwa mwa mubu li zwelapili ku holofaza ni ku tahisa buyanga kwa banana hamoho ni ba bahulu.

Ze ñwi hape ze swenya ki likozi ni matuku a’ cwale ka butuku bwa shuka. Nihaiba milyani ya sifanu ye fumaneha mwa sibaka y’a kona ku tahisa buyanga. Sina ka mutala, mwa libaka ze bapani za mwa tolopo ye ñwi kwa Eastern Europe, banana b’a sikai ba pepilwe ba si na mwambo. Ba na ni fela kanyumiti ka mwambo kwatas’a ñokolwa. Bupaki bu supa kwa kolofalo ya ka sizwalo ye tahiswa ki silafazo ya ka milyani. Palo-tuna ye ñwi ya batu ba na ni mahutu a kwanile kono niteñi ba bile liyanga bakeñisa ku omelela luñañali kamba ku kula fela li sili. Kaniti, buyanga ha bu na maciñekelo.

Ku si na taba ni kuli bu tahisizwe ki nto mañi, buyanga bwa kona ku sinya. Ha n’a li wa lilimo ze 20, Junior n’a luzize lihutu la hae la nzohoto ku kalela fa liñwele ku ya kwatasi. Hasamulaho n’a bulezi cwana: “Ne ni lembwalile hahulu-hulu. Ne ni lilanga maswe bakeñisa ku ziba kuli ne ni si ke n’a fumana lihutu la ka hape. Ne ni s’a zibi sa ku eza. Ne ni lyangani.” Kono ku si ka fita nako mubonelo wa Junior wa cinca hahulu-hulu. A kala ku ituta Bibele mi a ituta lika ze n’e mu tusize ku tiyela buyanga ili zeo hape ne li mu file sepo ye tabisa ya ku pila hande kwapili hona fa lifasi-mubu fa. Haiba mu liyanga, kana mwa kona ku tabela ku ba ni sepo ye cwalo ni mina?

Haiba ku cwalo, shangwe mu bale taba ye tatama. Lu mi susueza ku bala mwa Bibele ya mina ka sibili mañolo a bonisizwe ilikuli mu iponele zeo Mubupi a bulukezi ba ba ituta za mulelo wa hae ni ku pila ka ona.