Ka M’o Mwana N’a Tuselize Bondat’ahe

JAMES, wa kwa England, wa lilimo ze 32, u ilamwi ki buanga mi u kataziwa hanyinyani ki butuku bo bu ezisa mutu ku sa ba ni taba ni batu. Kono, ka lilimo ze ñata, u fumanehile kwa mikopano ya Lipaki za Jehova hamoho ni bom’ahe ni kaizel’a hae. Niteñi, bondat’ahe ne ba sa isi hahulu pilu kwa litumelo za bona. Muta o muñwi manzibwana hamulaho wa mukopano o n’o bile ni poniso ye n’e bonisize mwa ku memela ndambo kwa Kupuzo ya lifu la Kreste, James a akufela kwa musiyo wa hae. Ka ku ikalelwa, bom’ahe ba mu latelela mi ba mu fumana inz’a fatungula limagazini za kwamulaho za Tora ya ku Libelela ni Awake! A keta i liñwi ye ne i na ni siswaniso sa mutu ya memela yo muñwi kwa Kupuzo fa likepe la kwamulaho mi a kwalokela ku bondat’ahe. Pili a supa siswaniso seo, kihona a supa bondat’ahe mi a li: “Mina!” Bom’ahe ni bondat’ate ba italima ka makalo ha ba lemuha kuli James n’a memela bondat’ahe kwa Kupuzo. Bondat’ahe ba bulela kuli mwendi ne ba ka fumaneha teñi.

Manzibwana a la Kupuzo, James a ya ko ba bulukelanga libyana bondat’ahe, a keta bulukwe, a bu iseza bondat’ahe, mi a ba bonisa kuli ba bu tine. Bondat’ahe ba bulela kuli ha ba yi kwa mukopano w’o. Kacwalo, James ni bom’ahe ba nanuha ku ya ba nosi kwa Ndu ya Mubuso.

Kono nako ye ñwi hasamulaho, James a kala ku ezanga sinundwe bom’ahe ha ne ba likanga ku mu lukiseza kuli ba ye kwa mikopano ya puteho. N’a ketanga ku siyala ni bondat’ahe fa lapa. Muta o muñwi la Sunda kakusasana, James hape a itakata bom’ahe ha ne ba mu lukiseza kuli a ye kwa mukopano. Ba imbwetukela bondat’ahe James ha ba fetuhela ku yena ni ku bulela kuli, “James, ha ni ka ya kwa mukopano kacenu, ni wena u ka ya nji?” Pata ya James ya benya ka tabo. A kumbata bondat’ahe mi a li “Eni!” mi bote ba ya kwa Ndu ya Mubuso mwa bulalu bwa bona.

Ku zwa ona zazi leo, bondat’ahe James ba zwelapili ku yanga kwa mikopano kaufela ya la Sunda mi hañihañi ba zibahaza kuli, kuli ba kone ku eza zwelopili, ne ba na ni ku yanga ni kwa mikopano ye miñwi. (Maheberu 10:24, 25) Ba eza ona cwalo, mi hamulaho wa likweli ze peli, ba kala ku itutanga Bibele kamita. Ba eza zwelopili ka bubebe, ili ku eza ka putako licinceho ze n’e tokwahala mwa bupilo bwa bona, mi ku si ka fita nako ye telele ba kala ku eza musebezi wa ku kutaza za Mubuso. Hamulaho wa silimo ku zwa fo ne ba kalezi ku ituta Bibele, ba neela bupilo bwa bona ku Jehova mi ba bonisa seo ka kolobezo ya mwa mezi. Nako ye ki batanga ba bukombwa mwa puteho ya bona. Cwale bote mwa lubasi ba sebeleza Jehova hamoho.