Kana Mwa Nyakisisa Lisinyehelo?

JESU KRESTE n’a file balutiwa ba hae sepo ya bupilo bo bu sa feli, kono hape n’a ba susuelize ku nyakisisa lisinyehelo za ku ba Mukreste. N’a talusize sisupo seo ka ku buza kuli: “Ki mañi ku mina h’a lata ku yaha tawala, ya sa ini pili ku likanyisa teko ya yona [kamba, ku nyakisisa lisinyehelo], kana u na ni sa ku i feza?” (Luka 14:28) Jesu n’a talusa lisinyehelo mañi?

Bakreste kaufela ba talimananga ni miliko, mi ye miñwi ku yona ki ye mituna. (Samu 34:19; Mateu 10:36) Kacwalo, lu tokwa ku itukiseza mwa munahano ni kwa moya ilikuli lu si komoki ha lu tahelwa ki twaniso kamba matata a mañwi. Lu lukela ku ba ba ba nyakisisize kale miliko ye cwalo ya ku ba mulutiwa wa Kreste, ka ku ziba kuli mupuzo—ona wa ku banduswa kwa sibi ni lifu—ki wa butokwa hahulu ku fita nto ifi kamba ifi ye lu kona ku fumana mwa muinelo wa linto wo. Ee, ha ku na nto ni ye kana y’a lumeleza Mulimu—niheba lifu—ye kona ku lu tahiseza kozi ya kamita ha lu zwelapili ku mu sebeleza.—2 Makorinte 4:16-18; Mafilipi 3:8.

Tumelo ya luna i kona ku ba cwañi ye tiile cwalo? Tumelo ya luna i zwelapili ku tiiswa nako kaufela ha lu eza katulo ye nde, ku kumalela likuka za Sikreste, kamba ku eza nto ye ñwi ka ku lumelelana ni z’a lata Mulimu—sihulu ha lu sineneketwa ku fosa. Ha lu ikutwa kuli Jehova u lu fuyozi kabakala mupilelo wa luna wa ka busepahali, tumelo ya luna ya tiiswa ni ku tungiswa. Kacwalo, lu latelela mutala wa Jesu, wa balutiwa ba hae ba pili, ni wa banna ni basali kaufela ba tumelo ba kale-kale bao ka swanelo ne ba ‘nyakisisize lisinyehelo’ za ku sebeleza Mulimu.—Mareka 1:16-20; Maheberu 11:4, 7, 17, 24, 25, 32-38.