Kana Mwa Itebuha Lilato la Mulimu?

MUTA o muñwi munna ya bizwa Jobo n’a kile a talusa muinelo wa batu wa ku sa petahala ka manzwi a li: “Mutu ya pepilwe ki musali, bupilo bwa hae ki bo bukuswani, mi bu tezi maziyezi; wa taha sina palisa, mi wa pumwa; wa fela sina muluti, h’a ini sibaka.” (Jobo 14:1, 2) Bupilo, ka mwa n’a bu pilezi Jobo, ne bu tezi matomola ni masitapilu. Kana mu kile mwa ikutwa cwalo?

Kono ku si na taba ni matata ni maziyezi e lu kana lwa tahelwa, ku na ni sepo ye tiile, ye tomile fa mufelañeke ni lilato la Mulimu. Sa pili, Ndat’a luna ya sishemo wa kwa lihalimu u fanile sitabelo sa ku liulula batu kwa muinelo wa bona wa sibi. Ka ku ya ka Joani 3:16,17, Jesu Kreste n’a ize: “Mulimu u latile lifasi hahulu [ili batu], mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli. Kakuli Mulimu h’a si ka luma Mwan’a hae mwa lifasi kuli a atule lifasi; kono, kuli lifasi li piliswe ki yena.”

Hape mu nahane moya wa sishemo wa bonisize Mulimu ku luna batu ba ba si ka petahala. Muapositola Paulusi n’a zibahalize kuli: “Ki Yena ya ezize ka mali a li mañwi macaba kamukan’a batu, kuli ba yahe mwa sibaka kaufela sa lifasi; ki Yena ya lukisize linako za ku pila kwa sicaba ni sicaba, ni miseto ya fa mayahelo a ona; ilikuli ba bate Mulimu; kuli ha ba nze ba babatela, ba ka swana ba mu fumana, nih’a sa ini kwahule ni mutu ni mutu wa luna.” (Likezo 17:26, 27) Mu nahane ka za teñi! Niha lu li batu ba ba si ka petahala, lu sa kona ku ba ni silikani sa ka butu ni Mubupi wa luna ya lilato, Jehova Mulimu.

Kacwalo, lwa kona ku talima kwa nako ya kwapili ka sepo, ka ku ziba kuli Mulimu wa lu babalela ni kuli ka lilato u ezize tukiso ya kuli lu fiwe tuso ye sa feli. (1 Pitrosi 5:7; 2 Pitrosi 3:13) Kaniti he, lu na ni susuezo ye tiile ya ku ituta ze ñata ka za Mulimu wa luna ya lilato ka ku ituta Linzwi la hae, yona Bibele.