Lipuzo Ze Zwa kwa Babali

Kana kwa swanela ku Mukreste wa niti ku y’o fumaneha kwa sililo kamba sinawenga se si ezezwa mwa keleke?

Ku abana mwa mufuta ufi kamba ufi wa bulapeli bwa buhata ha ku tabisi Jehova mi ku lukelwa ku ambukiwa. (2 Makorinte 6:14-17; Sinulo 18:4) Sililo se si ezezwa sebelezo mwa keleke ya bulapeli, hañata si ka kopanyeleza ni likutazo ze yemela mihupulo y’e si ya ka Mañolo ye cwale ka ku s’a shwa kwa moyo ni kuli batu ba bande kaufela ba fiwa mupuzo wa ku y’o pila kwa lihalimu. Sebelezo yeo hape i kana ya kopanyeleza ni mikwa ye cwale ka ku eza liponiso za ka mazoho za sifapahano ni ku abana mwa tapelo ye fiwa ki muprisita. Litapelo ni likezo ze ñwi za bulapeli ze lwanisana ni lituto za Bibele ne li kana hape za ba kalulo ya mukiti wa sinawenga wa bulapeli o ezezwa mwa keleke kamba ku sili. Mukreste ha n’a ka ba mwahal’a sikwata m’o batu kaufela ba abana mwa likezo za bulapeli bwa buhata, ne ku ka mu bela t’ata ku tiyela sineneketo ya kuli a abane ni bona. Ki kutokwa butali kwa butuna mutu h’a ikenya mwa sineneketo ye cwalo!

Ku cwañi haiba Mukreste u ikutwa kuli u tamehile ku y’o fumaneha kwa sililo kamba sinawenga se si ezezwa mwa keleke? Sina ka mutala, munna ya si mulumeli n’a kana a wayelela musal’a hae ya li Mukreste kuli a mu sindekete kwa kezahalo ye cwalo. Kana n’a ka mu sindeketa ka ku y’o ina fela a sa abani ku ze ezahala? Ka ku bonisa likute kwa maikuto a munn’a hae, musali n’a kana a keta ku mu sindeketa, ka ku ikatulela ku sa yo abana kwa sizo sa bulapeli sifi kamba sifi. Kwa neku le liñwi n’a kana a keta ku s’a ya kabakala ku hupula kuli sineneketo ya mwa maikuto ye tahiswa ki miinelo, n’e ka yo ba ye tuna hahulu kuli mane mwendi ne i ka mu tahiseza ku keluha likuka za silumeli. Keto n’e ka siyala ku yena. Kaniti, n’a ka tokwa ku ikolwisisa luli mwa pilu, ili ku ba ni lizwalo le li kenile.—1 Timotea 1:19.

Ka mo ku inezi kaufela, ne ku ka mu bela hande ha n’a ka taluseza munn’a hae kuli lizwalo la hae ne li si ke la mu lumeleza ku abana kwa sizo sifi kamba sifi sa bulapeli kamba ku abana hamoho mwa ku opela lipina kamba ku inamisa toho ya hae ha ku lapelwa. Ku likana ni mwa n’a ka taluseza musali, munn’a hae n’a kana a atula kuli ku y’o fumaneha teñi kwa musal’a hae ne ku tahisa muinelo o n’o si ke wa tabisa yena munna. N’a kana a iketela ku ya a nosi ka ku bonisa lilato ku musal’a hae ni ku bonisa likute kwa litumelo za musal’a hae, kamba ka ku s’a bata ku y’o utwiswa maswabi ni a makana. Kono haiba a ñañelela ku bata ku sindeketwa, musali w’a kona ku ya ka ku yo ba fela mutalimeli.

Lu si libali maikuto e ba kana ba ba ni ona balumeli sina luna kabakala ku y’o fumaneha kwa luna kwa lisebelezo ze ezezwa mwa keleke. Kana nto yeo y’a kona ku holofaza mazwalo a ba bañwi? Esi mwendi buikoneli bwa bona bwa ku hanyeza ku lapela maswaniso bu ka shekesha? Muapositola Paulusi n’a elelize kuli: “Mu zibe ku lemuha linto ze nde ku fita; mi mu be ba ba kenile, ba ba si na mulatu, ku isa kwa lizazi la Kreste.”—Mafilipi 1:10.

Haiba kezahalo yeo i ama mwanahabo mutu tota wa kwa mubili, kwa kona ku ba ni lisineneketo ze ñwi za mwa lubasi. Ka mo ku inezi kaufela, Mukreste u swanela ku nyakisisa mabaka kaufela a iputezi mwa taba. Mwa miinelo ye miñwi mutu n’a kana a atula kuli ha ku na butata bo bu kona ku zuha bakeñisa ku y’o fumaneha kwa hae kwa sililo kamba sinawenga se si ezezwa mwa keleke ka ku ba mutalimeli. Nihakulicwalo, ne ku kana kwa ba kuli, kolofalo ya lizwalo la hae kamba mazwalo a ba bañwi ili ye kona ku tahiswa ki ku y’o fumaneha teñi kwa hae i kona ku ba ye tuna ku fita lituso ze kona ku zwa teñi. Ka mo ku ka bela kaufela, Mukreste u swanela ku bona teñi kuli keto ya hae ha i na ku mu palelwisa ku bukeleza lizwalo le linde fapil’a Mulimu ni batu.