Lu Tokwa ku Ziba Kuli Mulimu Ki Mañi

BUSIHU mahalimu h’a ngwelukile, kana ha mu utwangi hande ku bona linaleli ze ñata-ñata? Kana munko wa lipalisa ze buheha ha si o munde? Kana ha mu ikolangi ku utwa ku cobila kwa linyunywani ni mulumo wa matali a nyanganya ha ku fuka kamoya? Mi luli litapi ze tuna ni libupiwa ze ñwi ze mwa mawate ki ze makaza hakalo! Ku tuha f’o ku na ni batu ba ba na ni mazwalo a sebeza ni booko bo bu ipitezi luli. Mu kona ku talusa cwañi ku ba teñi kwa lika kaufela ze makaza ze fumaneha?

Ba bañwi ba lumela kuli lika zeo kaufela li itahezi fela. Kono haiba ku cwalo, ki kabakalañi batu ha ba nahananga ka za Mulimu? Ki kabakalañi ku kopana-kopana ko ku si ka leliwa kwa lika ze shutana-shutana ha ne ku ka tahisa batu ba ba nahananga za bulumeli?

“Bulapeli bu tomile ka ku tiya mwa miinelo ya ka taho ya batu mi bu fumaneha ku ba ba fumile ni ba ba si ka fuma, ku ba ba itutile ni ba ba si ka ituta kaufela.” Manzwi ao n’a talusize ka bukuswani ka za patisiso yeo caziba ya bizwa Alister Hardy n’a ñozi mwa buka ya hae ye bizwa The Spiritual Nature of Man. Lipatisiso ze ezizwe cwanoñu fa ka za booko li ezisize baituti ba bañwi ba za sibupeho sa batu ku akaleza kuli batu ba bupilwe ni buikoneli bwa ku ba balapeli. Buka ye bizwa Is God the Only Reality? i li: “Ku bata taluso ya lika ka bulapeli . . . ki nto ye ezizwe mwahal’a batu ba lizo kaufela ili ka nako kaufela ku zwa fo ba bezi teñi batu.”

Mu bone ze ñwi zeo munna yo muñwi ya n’a itutile n’a fitile fa ku lumela lilimo ze 2,000 kwamulaho. N’a ñozi kuli: “Ndu ye ñwi ni ye ñwi i na ni ya i yahile; kono ya yahile lika kamukana ki Mulimu.” (Maheberu 3:4) Mane, timana ya pili luli mwa Bibele i li: “Kwa simuluho Mulimu n’a ezize Lihalimu ni Lifasi.”—Genese 1:1.

Kono cwale Mulimu ki mañi? Likalabo za batu kwa puzo yeo za shutana-shutana. Mukulwani yo muñwi wa kwa Japan ya bizwa Yoshi ha n’a buzizwe kuli Mulimu ki mañi, n’a ize: “Ha ni zibi hande. Na ni mu-Buddha, mi ha ki kwa butokwa kuli ni zibe kuli Mulimu ki mañi.” Kono Yoshi a lumela kuli ba bañata b’a nga kuli yena Buddha ka sibili ki mulimu. Nick, munna ya sweli lipisinisi wa lilimo za mwa ma-60, u lumela ni ku nahana kuli Mulimu ki m’ata a matuna ka ku fitisisa. Nick ha n’a kupilwe ku talusa z’a ziba ka za Mulimu, hamulaho wa ku kutumana ka nako ye telele, a alaba kuli: “Mulikani, puzo yeo i t’ata luli. Se ni kona fela ku bulela kikuli Mulimu u teñi.”

 Batu ba bañwi ba “lapela ze bupilwe ki Mulimu, ku fita ku lapela yena Mubupi ka sibili.” (Maroma 1:25) Bolule-lule ba lapela bokukululu ba ba shwile, mi ba lumela kuli Mulimu u kwahule hahulu mi h’a koni ku atumelwa. Mwa bulapeli bwa si-Hindu, ku na ni milimu ye miñata ya banna ni basali. Milimu ye shutana-shutana, ye cwale ka Jupitere ni Mercuri, ne i lapelwanga mwa linako za baapositola ba Jesu Kreste. (Likezo 14:11, 12) Likeleke ze ñata za Krestendomu li luta kuli Mulimu ki Silalu, ili Mulimu Ndate, Mulimu Mwana, ni Mulimu Moya.

Kaniti, Bibele i li “ku na ni milimu ye miñata, ni malena a mañata.” Kono hape i ekeza kuli: “Kono ku luna, Mulimu ki a li muñwi, yena Ndate, yo linto kamukana li zwa ku Yena.” (1 Makorinte 8:5, 6) Ee, ku na ni fela Mulimu a li muñwi wa niti. Kono ki mañi yena y’o? U cwañi? Ku butokwa kuli lu zibe likalabo kwa lipuzo zeo. Jesu ka sibili n’a lapezi ku Yena y’o kuli: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Lu na ni libaka la ku lumela kuli, kuli lu be ni buiketo ku ya ku ile, lu na ni ku ziba niti ka za Mulimu.

[Siswaniso se si fa likepe 3]

Li tahile cwañi?

[Manzwi a bañi ba siswaniso]

Tapi ye tuna ya mwa liwate: Ka tumelezo ya Tourism Queensland