‘Ba Tiba,’ ‘Ba Shetumuka’

“Mandinda a ba apesize, ba tibezi kwatasi-tasi sina licwe.”

KA MANZWI ao, Mushe ni Maisilaele ba bina ka pina ya ku zibahaza punyuho ya bona kwa Liwate le Lifubelu ni ku yundiswa kwa lila za bona za Maegepita ze n’e ba ndongwami—ili Faro ni mpi ya hae.—Exoda 15:4, 5.

Mañi ni mañi ya n’a boni kezahalo ye tuna yeo, n’a utwisisize tuto ka bunolo. Tuto ne li ya kuli: Ha ku na ya kona hande-nde ku lwanisa kamba ku hanyeza tamaiso ya Jehova mi a pila. Kono hamulaho wa likwelinyana fela, Maisilaele ba batuna—ili bo Kora, Datani, Abirami, ni bayemeli ba bañwi ba ba eza 250—ba lwanisa patalaza tamaiso ya Mushe ni Aruni ye ne ba filwe ki Mulimu.—Numere 16:1-3.

Ka ku laelwa ki Jehova, Mushe a lemusa Maisilaele kuli ba zwe kwa litende za balwanisi bao. Datani ni Abirami, ka ku yemelwa ki lilama za mabasi a bona, ba hana ka t’ata. Kacwalo Mushe a zibahaza kuli Jehova ka nzila ya Hae n’a ka bonisa batu patalaza kuli banna bao “ba shwauzi [Muñ’a] Bupilo.” Ka nako yeo, Jehova a pazula mubu kwatas’a mahutu a bona. “Ba shetumukela mwa sibaka sa ba ba shwile inze ba pila, bona, ni za bona kaufela; lifasi la ba kwahela.” Kora ni balwanisi ba bañwi bo? “Kwa zwa mulilo ku [Muñ’a] Bupilo, wa bulaya banna bao ba 250 ba ba ne ba cisa insense.”—Numere 16:23-35; 26:10.

Faro ni mpi ya hae, hamoho ni balwanisi bao ba mwa lihalaupa, kaufela ba yunda kabakala ku sa lemuha tamaiso ya Jehova ni ku iyakatwa kwa hae za litaba ze ama batu. Kacwalo, ki nto ya butokwa hahulu kuli kaufela ba ba ka silelezwa ki Jehova mwa mazazi a t’ata a, ba itute ka za Jehova ni ku ipeya ku mu utwa sina Yena “Muambakani-ya-Pahami” ni “Ya-Mata-Kaufela.” Ka ku eza cwalo ba kona ku utwa manzwi a Jehova a kolwisa a’ li: “Batu ba ba eza lule ba ka wa kwatuko ni wena, ba ba eza bolule ba ba lishumi ba we ku la hao la bulyo; kono wena, lifu ha li na ku ku atumela. U ka li talima fela ka meto, u bone mupuzo wa ba ba maswe. Kakuli Wena [Muñ’a] Bupilo, ki Wena sisabelo sa ka! U iketezi Muambakani-ya-Pahami, kuli ibe mapilelo a hao.”—Samu 91:1, 7-9.