Piho ya Bashaeli Ba Mubuso

Ku Fumana Niti mwa Sibaka Se Si Si ka Libelelwa

KI TATO ya Mulimu kuli “batu kamukana ba piliswe, mi ba fite fa zibo ya ku ziba niti.” (1 Timotea 2:3, 4) Kacwalo, Lipaki za Jehova se ba hatisize ni ku hasanya bolule-lule ba Libibele ni lihatiso ze itusiswa kwa ku ituta Bibele. Fokuñwi, lihatiso zeo se li tusize ba ba sepahala ku ituta niti ka linzila ze komokisa. Ka za seo, bashaeli ba Mubuso mwa Freetown, mwa Sierra Leone, ba biha taba ye latelela.

Osman n’a li mwana wa bubeli mwa lubasi lwa bana b’a 9. Ka ku ba ya n’a hulezi mwa lapa la balapeli, n’a yanga kamita ni bondat’ahe ku y’o lapela. Kono Osman n’a zingehile hahulu kabakala se ne bu luta bulapeli bwa habo ka za lihele. N’a sa koni ku utwisisa kuli Mulimu y’a sishemo n’a ka tukufaza batu ba ba maswe ka ku ba cisa mwa mulilo. Likalabo kaufela za n’a filwe Osman za ku mu tusa ku utwisisa tuto ya mulilo wa lihele ne li si ka felisa zingo ya hae.

Zazi le liñwi, Osman ha n’a li wa lilimo ze 20, a lemuha buka ye ñwi ya mubala wa ndilu ye n’e pumbami mwa manyalala mwa mungomo wa ku yumbela teñi masila. Ka ku ba ya n’a tabela ku bala libuka, a i nopa, a i kenisa, mi a bona toho ya taba ya yona y’e li “Niti ye isa kwa Bupilo Bwa Kamita.” *

Osman a ipuza kuli: ‘Ki niti mañi yona yeo?’ Ka ku bata ku batisisa litaba, Osman a shimba buka yeo kwa ndu ni ku y’o feza ku i bala honaf’o. N’a tabezi hahulu ha n’a itutile kuli Mulimu u na ni libizo le li mu konka—lona la Jehova! (Samu 83:18, NW) Osman hape n’a itutile kuli kalemeno ka katuna ka ku fitisisa ka Mulimu ki lilato. Hape n’a itutile kuli muhupulo wa ku tukufaza batu mwa sibaka sa mulilo mane ki o masila ku Mulimu. (Jeremia 32:35; 1 Joani 4:8) Kwa mafelelezo, Osman a bala kuli Jehova u ka tuha a tahisa paradaisi fa lifasi m’o batu ba ka kona ku pila ku ya ku ile. (Samu 37:29; Sinulo 21:3, 4) Ki niti kwa bunde ye zwa ku Mulimu y’a lilato ili y’a sishemo! Ka ku itebuha hahulu ku zwelela kwa pilu, Osman a itumela ku Jehova kwa ku mu lumeleza ku fumana niti mwa sibaka se ne si si ka libelelwa.

Mazazinyana hasamulaho, ka tuso ya balikani ba bañwi, Osman a fumana Ndu ya Mubuso ya Lipaki za Jehova mi a fumaneha lwa pili kwa mukopano o muñwi. Ha n’a sa li k’o, a kupa Paki yo muñwi ku ituta Bibele ni yena. Ba mwa lubasi lwa habo niha ne ba mu lwanisize hahulu, Osman a tundamena ku eza zwelopili ya kwa moya mi a fita fa ku kolobezwa. (Mateu 10:36) Kacenu le, ki eluda mwa puteho. Kwa makaza luli kuli zeo kaufela ne li kalezi fa ku fumana buka ya za Bibele mwa mungomo wa ku yumbela teñi masila!

[Litaluso za kwatasi]