Lipuzo Ze Zwa kwa Babali

Kana nweliso ye tezi ya mwa mezi ya tokwahala haiba mutu ya bata ku kolobezwa ki sihole hahulu kamba ki ya si ka iketa hahulu kwa mubili, ili nto ye kona ku tatafalisa nweliso?

Pulelo ya “ku kolobeza” i tolokilwe ku zwa fa linzwi la Sigerike la baʹpto, le li talusa ku cimbeka. Mwa Bibele, “ku kolobezwa” kwa swana ni “ku nweliswa.” Bibele ya The Emphasised Bible, ye tolokilwe ki Rotherham i li: “Ba ya mwa mezi bubeli bwa bona, bo Filipi ni nduna,—mi a mu nwelisa.” (Likezo 8:38) Kacwalo mutu ya kolobezwa wa cimbekiwa luli mwa mezi.—Mateu 3:16; Mareka 1:10.

Jesu n’a laezi balutiwa ba hae kuli: “Mu ye cwale, mu lute macaba kaufela, mu ba kolobeze.” (Mateu 28:19, 20) Ka ku swana ni seo, Lipaki za Jehova ba lukisanga za kolobezo mwa masa, linuka, kamba libaka ze ñwi mo ku na ni mezi a mañata kuli ku be ni nweliso ye tezi. Bakeñisa kuli kolobezo ka nweliso ye tezi ki nto ye tokwahala ka Mañolo, batu ha ba na tukelo ya ku lukulula mutu kwa kolobezo. Kacwalo, mutu u swanela ku kolobezwa niha ku na ni ku eziwa mihato ye sienyi bakeñisa muinelo wa hae. Ka mutala, likolobezo mwa likotolo ze tuna za ku tapela se li tusize hahulu kwa basupali kamba ba ba si ka iketa kwa mibili. Mezi a mwa sitapelo a kona ku futumazwa, mi mutu ya kolobezwa wa kona ku beiwa mwa mezi ka ku iketa ili hanyinyani-hanyinyani. Ha s’a twaelani ni mezi kwa kona ku eziwa cwale yona kolobezo ka sibili.

Nihaiba batu ba ba li lihole hahulu-hulu se ba kolobelizwe. Ka mutala, batu ba ba kile ba pazulwa fa ngwangwali, mi ka ku eziwa cwalo, ba ba ni lisuba le li inelezi fa mumizo, kamba ba ba tokwa ku itusisa lipangaliko za ku buyelisa, se ba kolobelizwe. Kono ku swanelwa ku eziwa buitukisezo bo bu tezi ka za likolobezo ze cwalo kaufela. Ne ku ka ba hande ku ba ni nasi ya itutile kamba dokota fakaufi haiba wa fumaneha. Kono haiba ku ba ni tokomelo ye ipitezi ni ku nahanela cimo, kolobezo ya kona ku eziwa ibat’o ba mwa miinelo kaufela. Kacwalo, buikatazo kaufela bo bu swanela bu lukela ku eziwa bwa ku kolobeza mutu mwa mezi haiba yeo ki takazo ye buniti ya mutu yo mi haiba wa itakaleza ku talimana ni likozi ze kona ku zwa mwateñi.