Nako ya ku Punya Kunutu

Ku sa punya likunutu ze ñwi ku kona ku tahisa kozo ku fita ku tahisa lindwa. Kono kana ku na ni nako ya ku punya likunutu? Mu bone s’a bulela mupolofita Amosi ka za Mulimu wa hae: “[Muñ’a] Bupilo h’a na ku eza se siñwi, a si ka sebela mulelo wa hae kwa batanga ba hae ba bapolofita.” (Amosi 3:7) Manzwi ao a kona ku lu luta se siñwi ka za likunutu. Jehova wa kona ku pata litaba ze ñwi ku fitela ha se ku fitile nako ye ñwi mi kwa nalulelule ni ku li punyeza batu ba bañwi. Lu kona ku likanyisa cwañi Jehova mwa taba yeo?

Fokuñwi, balisana ba ba ketilwe mwa puteho ya Sikreste ba bona kuli ku butokwa ku sa punya litaba ze ñwi. (Likezo 20:28) Ka mutala, ka ku beya mwa munahano mo i ka tusezwa puteho, ba kana ba pata litaba kaufela za litukiso kamba licinceho za buikalabelo bwa mwa puteho konji ha se ku fitile nako ye ñwi.

Kono mwa miinelo ye cwalo, ku butokwa ku bonisa hande ku ba ba amilwe teñi ka za haiba taba yeo i ka punyiwa, i ka punyiwa lili, mi i ka punyiwa cwañi. Ku ziba fo i ka zibahalezwa taba yeo ku kona ku ba tusa ku sa punya likunutu.—Liproverbia 25:9.