Tala I Tuha I Feliswa!

MU KANA mwa buza kuli: ‘Ki tala ya mufuta mañi?’ Ki tala ya sico sa kwa moya! Mupolofita wa kwaikale wa Muheberu n’a polofitile za tala yeo ha n’a ize: “A mu bone he, lizazi la ta, ku bulela Mulena [Muñ’a] Bupilo, le ni ka lumela mwa lifasi, isi tala ya buhobe nihaili linyolwa la mezi; kono tala ni linyolwa la ku utwa manzwi a [Muñ’a] Bupilo.” (Amosi 8:11) Kuli ba tuse ku felisa tala yeo ya kwa moya, b’a 48 be ne ba keni sitopa sa bu-112 sa Sikolo sa Giliadi sa Bibele sa Watchtower, se si kwa Patterson, mwa New York, ba ka ya kwa linaha ze 19 ze mwa mafasi a ketalizoho ni lioli za mwa mawate.

Ba ya ba lwezi isi nama kamba buloto za luli, kono zibo, yeloseli, ni tuto. Ka likweli ze ketalizoho, ne ba sweli ku ituta Bibele ka butungi ilikuli ba tiise tumelo ya bona ku za ku eza sebelezo ya bulumiwa mwa linaha li sili. La March 9, 2002, b’a 5,554 be ne ba fumanehile kwa tukiso yeo ya ku ungula sikolo ne ba teelelize ka tabo.

Stephen Lett, y’a li silama sa Sitopa Se Si Etelela sa Lipaki za Jehova, n’a kwaluzi tukiso yeo ka mafulofulo. Ka kamuhelo ye ipitezi, n’a amuhezi bapoti ba bañata be ne ba zwa kwa libaka ze fitana-fitana za lifasi. Mi cwale a zwelapili ku sebelisa manzwi a Jesu a’ li “Mina mu liseli la lifasi” kwa musebezi wa be ne ba ka ba balumiwa kwapili. (Mateu 5:14) N’a talusize kuli: ‘Mwa misebezi ya mina, mu ka bonahaza likalulo ze shutana-shutana za misebezi ye makaza ya Jehova, ili ku konisa ba ba sepahala ku bona bunde bwa Jehova ni milelo ya hae.’ Muzwale Lett n’a susuelize balumiwa ku itusisa liseli la Linzwi la Mulimu kwa ku beya fa ngandaleza lififi la lituto za buhata ni ku fa ketelelo ku ba ba bata niti.

Mubonelo O Munde Ki Wa Butokwa Kuli Lika Li Konde

Muina-situlo ha s’a felize ku bulela, Baltasar Perla, yo muñwi wa Katengo ka Mutai wa kwa United States, n’a file ngambolo ya pili kwa lingambolo za ka ku tatamana ze n’e lukiselizwe ku tusa be ne ba ungula sikolo bao kuli ba kondise mwa bulumiwa bwa bona. N’a ambozi fa taba ye li “Mu Tiye, Mu Itiise Pilu, mi Mu Eze.” (1 Makolonika 28:20) Mulena Salumoni wa Isilaele wa kwaikale n’a filwe musebezi o mutuna wa ku eza nto ye ñwi ya n’a s’a li ku simwa a sa i ezi—ili ya ku yaha tempele mwa Jerusalema. Salumoni n’a ezize cwalo, mi ka tuso ya Jehova, tempele yeo ne i felizwe ku yahiwa. Ka ku bonisa be ne ba ungula sikolo sisupo sa taba yeo, Muzwale Perla n’a ize: ‘Mu filwe musebezi o munca, ona wa ku ba mulumiwa, mi mu tokwa ku tiya ni ku itiisa pilu.’ Baituti bao kaniti ne ba omba-ombilwe ki ku kolwiswa kuli Jehova h’a na ku ba tuhela ibile fela ba zwelapili ku ba bukaufi ni yena. Muzwale Perla n’a susumelize baputehi ka ku ungula ka za n’a iponezi yena, kuli: ‘Mwa kona ku peta ze ñata ka  ku ba balumiwa. Na ni lubasi lwa hesu ne lu lutilwe niti ki balumiwa!’

Samuel Herd, yo muñwi wa ba Sitopa Se Si Etelela, n’a file ngambolo ya toho ya taba ye li “Mu Itinge ku Jehova Kuli Mu Kondise Lika.” Baituti bao ba ka y’o kala musebezi wa bulumiwa, mi ku kondisa kwa bona ku itingile hahulu fa silikani sa bona ni Jehova. Muzwale Herd n’a ba elelize kuli: ‘Se mu bile ni zibo ye ñata ya mwa Bibele ku zwelela ku ze mu itutile kwa Sikolo sa Giliadi. Ne mu sweli ku amuhela ka tabo. Kono cwale, kuli mu kondise hande lika, mu na ni ku y’o kalisa ku fa ze mu itutile.’ (Likezo 20:35) Balumiwa ba ka ba ni linako ze ñata za ku eza cwalo ha ba nze ba ‘selelwa’ ba bañwi.—Mafilipi 2:17.

Ki lifi likelezo za malaezo zeo baluti ne ba ka li fa kwa baituti bao? Mark Noumair n’a tomile toho ya taba ya ngambolo ya hae fa Ruti 3:18. Toho yeo ne i li, “Mu Ine, Ku Fitela Mu Ziba Taba Mo I Y’o Fwekela.” Ka ku itusisa mutala wa Naomi ni Ruti, mubuleli y’o n’a susuelize be ne ba ungula sikolo ku sepa ka ku tala litukiso ze lukisizwe ki kopano ya Mulimu ya fa lifasi ni ku kuteka tamaiso ya teokratiki. Ka ku fita baituti kwa lipilu za bona, Muzwale Noumair n’a ize: ‘Mwendi fokuñwi ha mu na ku utwisisa libaka ha ne ku ezizwe katulo ye mi ama luli kamba  mu kana mwa ikutwa luli kuli nto ye ñwi i swanela ku ezezwa musili. Mu ka ezañi? Kana mu ka yema ni ku eza mo mu batela mina kamba kana mu ka “ina,” ili ku sepa kuli Mulimu u ka zamaisa litaba, ka ku kolwa kuli nako ha inze i ya, u ka bona teñi kuli ku ka eziwa ze nde fela?’ (Maroma 8:28) Kelezo ya ku ‘isa pilu kwa ku zwisezapili ze ama za Mubuso, ku tokomela ze i eza kopano ya Jehova ku fita kwa bufokoli bwa ba bañwi,’ kaniti ku ka ba kwa butokwa ku ba ba ka ya mwa bulumiwa mwa misebezi ya bona ya mwa linaha li sili.

Wallace Liverance, ya n’a li mulumiwa mi cwale s’a li muluti kwa sikolo sa Giliadi, n’a file ngambolo ya mafelelezo kwa lingambolo zeo za ka ku tatamana. Toho ya taba ya ngambolo ya hae n’e li ye li “Mu Si Ke Mwa Hakanyeha, Mu Zwelepili mwa Sebelezo ya Mulimu.” N’a bonisize kuli mupolofita Daniele ha n’a boni Babilona i ngandumunwa ni ku bona za n’a polofitile Jeremia, n’a lemuhile kuli ku lukululwa kwa Maisilaele mwa butanga ne ku li fakaufi. (Jeremia 25:11; Daniele 9:2) Daniele n’a ziba za tomahanyo ya Jehova, mi nto yeo ne i mu tusize ku sa hakanyeha milelo ya Mulimu ha ne i nze i petahala. Ka ku fapahana, Maisilaele ba mwa miteñi ya Hagai ne ba ize: “Nako ha i si ka fita.” (Hagai 1:2) Ne ba sa boni butokwa bwa linako ze ne ba pila ku zona, kono ne ba patehisizwe ki ku ipatela minyaka ya bona ni ze ne ba tabela, mi ne ba tuhezi ku eza musebezi w’o ne ba lukululezwi mwa Babilona kuli ba t’o u eza, ona wa ku yaha sinca tempele. Muzwale Liverance n’a unguzi ngambolo ya hae ka ku bulela kuli: “Kacwalo, kuli mu si ke mwa hakanyeha, mu zwelepili ku hupulanga kamita mulelo wa Jehova.”

Lawrence Bowen, muluti wa kwa sikolo sa Giliadi, n’a zamaisize puhisano ye n’e na ni toho ya taba ye li “Jehova U Fuyola Ba Ba Itusisa Linzwi Le Li Pila.” (Maheberu 4:12) Ngambolo yeo ne i li ya ze bonwi za mwa simu za baituti bao, mi ne i koñomeka m’o Jehova a fuyolela ba ba itusisa Bibele mwa ku kutaza ni ku luta. Muina-situlo n’a ize Jesu Kreste n’a tomezi likombwa za Mulimu kaufela mutala o munde, ka ku bulela kuli: ‘Jesu n’a kona ku bulela ka buniti kuli za n’a luta ne li sa zwi ku yena, kono n’a bulezi Linzwi la Mulimu.’ Ba ba sepahala ne ba lemuhile niti ni ku i amuhela. (Joani 7:16, 17) Ni kacenu ku cwalo.

Tuto ya kwa Giliadi I Twaeza Batu ku Eza Misebezi Kaufela Ye Minde

Ku tuha f’o, bo Richard Abrahamson ni Patrick LaFranca, be se ba bile lilama za lubasi lwa fa Betele ka nako ye telele, ba buhisana ni ba 6 be ne ba unguzi sikolo sa Giliadi bao cwale se ba li mwa mifuta ye shutana-shutana ya sebelezo ye ipitezi ya ka nako ye tezi. Be ne ba ungula sikolo sa bu-112 ne ba susuelizwe ha ne ba utwile kuli lilimo-limo hasamulaho, ba 6 bao, ku si na taba ni musebezi wa bona wa cwale, ba zwelapili ku itutisa tuto ye ne ba lutilwe kwa Giliadi kwa tuto ya Bibele, kwa ku eza lipatisiso, ni kwa ku pilisana hande ni batu.

Theodore Jaracz, yo muñwi wa ba Sitopa Se Si Etelela, n’a file ngambolo ye tuna fa tukiso yeo. Ne i na ni toho ya taba ye li “Ze Petiwa ka ku Tiyela Sitoyo sa Satani.” Mwa likweli ze ketalizoho ze felile, baituti ne ba pila mwa muinelo o munde wa teokratiki. Kono sina ha ne ku bonisizwe mwa litopa za bona mo ne ba itutela, lu pila mwa lifasi le li lu toile. Mwa lifasi kaufela, batu ba Jehova ba sweli ku lwaniswa. (Mateu 24:9) Ka ku itusisa litaba ze ñata za mwa Bibele, Muzwale Jaracz n’a bonisize kuli ‘ki luna bao sihulu Diabulosi a lwanisa.’ Lu lukela ku tiisa silikani sa luna ni Jehova mi ni ku tiiswa kuli lu kone ku talimana ni miliko.’ (Jobo 1:8; Daniele 6:4; Joani 15:20; Sinulo 12:12, 17) Muzwale Jaracz n’a unguzi ka ku bulela kuli batu ba Mulimu niha ba zwelapili ku toiwa, ‘ha ku na silwaniso se si ka ezezwa luna se si ka konda, ka mo i bulelela Isaya 54:17. Jehova mwa nako ya hae u ka bona teñi kuli lwa puluswa.’

Ka ku ba ba ba ‘talifisizwe luli,’ be ne ba ungula sikolo sa bu-112 sa Giliadi kaniti luli ba ka tusa hahulu kwa ku felisa tala ya sico sa kwa moya mwa linaha mo ba ka y’o sebeleza. (2 Timotea 3:16, 17) Lu nyolelwa ku utwa lipiho ka za m’o ba bulelela lushango lo lu fepa kwa batu ba mwa linaha zeo.

[Mbokisi fa likepe 23]

LITABA KA ZA SITOPA

Palo ya linaha ko ba zwa baituti: 6

Palo ya linaha ko ba lumezwi: 19

Palo hamoho ya baituti: 48

Avareji ya lilimo za buhulu: 33.2

Avareji ya lilimo za ku ba mwa niti: 15.7

Avareji ya lilimo za ku ba mwa bukombwa bwa ka nako ye tezi: 12.2

[Siswaniso se si fa likepe 24]

Sitopa Sa bu-112 Se Si Feza Sikolo sa Giliadi sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.