“U Musali Ya Na ni Mikwa Ye Minde”

Manzwi ao a tumbo n’a bulelezwi kalibe wa Mumoabi. N’a li mbelwa wa libizo la Ruti, mi n’a li mukwenyan’a Naomi, musali wa Muisilaele. Ruti n’a pilile mwa Isilaele lilimo ze 3000 kwamulaho k’o, ha ne ku sa busa baatuli, mi n’a bile ni libubo la ku ba ni mikwa ye minde. (Ruti 3:11) Ne ku tahile cwañi kuli a be ni lona libubo leo? Mutala wa hae u kona ku tusa bomañi?

Ka ku ba mutu ya n’a sa “ci buhobe bwa buzwa,” Ruti n’a sebezanga ka t’ata, ka lihora ze ñata sina mububuli wa makunka mwa masimu. Ku sebeza ka t’ata kwa hae ne ku tahisize kuli a lumbiwe. Niha n’a bulelezwi kuli n’a ka fukulezwa kwa musebezi, n’a zwezipili ku sebeza ka t’ata. N’a sebelize ku fita mwa n’a tokwelwa ku sebeleza. Ka nzila ye ipitezi, n’a swanezwi ki taluso ya mwa Bibele ya musali ya babazeha, ya sepahala, ya sebeza ka t’ata.—Liproverbia 31:10-31; Ruti 2:7, 15-17.

Ne li mikwa ya Ruti ya bulumeli—moya wa hae wa buikokobezo ni buitomboli ni lilato la hae—ze n’e tahisize kuli a lumbiwe cwalo ki batu. N’a siile bashemi ba hae ni naha ya habo, mi n’a si na hande sepo ya kuli n’a ka nyalwa hape. A latelela Naomi. Hape, Ruti n’a bonisize kuli n’a lakaza ku sebeleza Jehova, yena Mulimu wa mukwenyan’a hae. Taba ya mwa Mañolo i koñomeka butokwa bwa hae ka ku bulela kuli ku Naomi n’a “na ni tuso ku fita bana ba bashimani ba ba 7.”—Ruti 1:16, 17; 2:11, 12; 4:15.

Ruti niha n’a lumbiwa cwalo mwahal’a batu ba n’a pila ni bona, sa butokwa ni ku fita kikuli Mulimu n’a lumbile mikwa ya hae mi n’a mu file tohonolo ya ku ba kukululu wa Jesu Kreste. (Mateu 1:5; 1 Pitrosi 3:4) Ruti ki mutala o munde luli kwa basali ba Sikreste ni kwa batu kaufela ba ba ipala ku ba balapeli ba Jehova.