Kanya ya Jehova I Benyeza fa Batu ba Hae
Kanya ya Jehova I Benyeza fa Batu ba Hae
“[Muñ’a] Bupilo ikaba liseli la hao la kamita.”—ISAYA 60:20.
1. Jehova u fuyola cwañi batu ba hae ba ba sepahala?
‘MUÑ’A Bupilo u tabela sicaba sa hae; ba ba ishuwile, u ba kabisa za ku ba pilisa.’ (Samu 149:4) Ki mwa n’a bulelezi walisamu kale-kale k’o, mi ze ezahezi li bonisa buniti bwa manzwi a hae. Batu ba Jehova ha ba sepahala, wa ba babalela, ku ba tusa ku beya miselo, ni ku ba sileleza. Kale-kale, n’a ba tusize ku tula lila za bona. Kacenu, u ba tiisa kwa moya ni ku ba kolwisa kuli u ka ba pilisa ka sitabelo sa Jesu. (Maroma 5:9) U eza cwalo kakuli ki ba bande ku yena.
2. Niha ba lwaniswa, batu ba Mulimu ba na ni buikolwiso mañi?
2 Ki niti kuli mwa lifasi le li kwahezwi ki lififi, ba ba “pila ka bulumeli” ba ka lwaniswa. (2 Timotea 3:12) Niteñi, Jehova wa lemuha balwanisi bao, mi u ba lemusa kuli: “Macaba ni mibuso ye ka hana ku ku sebeleza i ka feliswa, e, macaba ao a ka sinyiwa ku feleleza.” (Isaya 60:12) Kacenu, ba nyandiswa ka linzila ze shutana-shutana. Mwa linaha ze ñwi, balwanisi ba lika ku kwalela kamba ku felisa bulapeli b’o Bakreste ba ba sepahala ba bu fa ku Jehova. Ku ze ñwi, balwanisi ba muñañatoho ba lindaulanga balapeli ba Jehova ni ku tumbeka tutu ya bona mulilo. Kono mu si libali kuli Jehova u atuzi kale ze ka zwa mwa twaniso ifi kamba ifi ya ku tibela tato ya hae kuli i si ke ya petiwa. Balwanisi ha ba na ku kona. Ba ba lwanisa Sione, ya yemelwa ki bana ba hae ba ba fa lifasi, ha ba koni. B’o ki buikolwiso bo bu tiisa pilu luli bo bu zwa ku Mulimu wa luna yo mutuna, yena Jehova!
Ku Fuyolwa ka Mo Ne ku Si ka Libelelelwa
3. Bunde ni ku tahisa siselo kwa balapeli ba Jehova li swaniselizwe cwañi?
3 Niti kikuli ka nako ya mazazi a maungulo a muinelo w’o wa linto, Jehova u se a fuyozi batu ba hae ku fita mo ne ba libelelela. Sihulu, u zwezipili ku kabisa sibaka sa bulapeli ni ba ba ku sona ba ba bizwa ka libizo la hae. Ka mo bu boniseza bupolofita bwa Isaya, u bulelela Sione kuli: “Bunde bwa Lebanoni bu ka taha ku wena, kota ya kiprese ni ya paini ni ya bokisi, hamoho li ka kabisa Sibaka se si kenile sa ka; mi ni ka bubanisa sibaka sa mautu a ka.” (Isaya 60:13) Malundu a kwahezwi ki mishitu ya likota ze sa tutulehi matali a bonahala hande luli. Kacwalo, likota ze sa tutulehi matali ki lisupo ze swanela za bunde ni ku tahisa siselo kwa balapeli ba Jehova.—Isaya 41:19; 55:13.
4. “Sibaka se si kenile” ni “sibaka sa mautu a [Jehova]” ki lika mañi, mi zeo li kabisizwe cwañi?
4 “Sibaka se si kenile” ni “sibaka sa mautu a [Jehova]” ze bulezwi kwa Isaya 60:13 ki lika mañi? Lipulelo zeo li talusa malapa a tempeletuna ya kwa moya ya Jehova, yona tukiso ya ku mu atumela mwa ku lapela ka Jesu Kreste. (Maheberu 8:1-5; 9:2-10, 23) Jehova u bulezi mulelo wa hae wa ku kabisa tempele yeo ya kwa moya ka ku tahisa batu ku zwa mwa macaba kaufela kuli ba tahe ba t’o lapelela teñi. (Hagai 2:7) Yena Isaya ka sibili kwamulaho n’a boni likwata za batu ba ba zwelela mwa macaba kaufela inze ba selehanela kwa lilundu la Jehova la bulapeli le li lumbile. (Isaya 2:1-4) Lilimo ze mianda-nda hasamulaho, muapositola Joani mwa pono n’a boni “buñata bo butuna bwa batu, ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela.” Bao ne ba yemi “fapil’a Lubona lwa Mulimu, mi ba mu sebeleza musihali ni busihu mwa Tempele ya hae.” (Sinulo 7:9, 15) Bupolofita b’o kaufela ha se bu talelelizwe mwa miteñi ya luna, se lu iponezi ndu ya Jehova i nze i kabiswa.
5. Ki cinceho mañi ye tuna ya ze nde yeo bana ba Sione ne ba bile ni yona?
5 Ku bile ni cinceho ye tuna ya ze nde ku Sione kabakala zeo kaufela! Jehova u li: “Kabakala kuli n’o tobohilwe, u toilwe, mi ne ku si na mutu ya fita ku wena, kabakaleo ni ka ku eza munzi wa bunde bo bu sa feli ni tabo ya masika a’ sa taha a mañata.” (Isaya 60:15) Kwa mafelelezo a ndwa ya lifasi ya pili, “Isilaele wa Mulimu” kaniti luli n’a sinyizwe. (Magalata 6:16) N’a ikutwile ‘ku tobohiwa,’ kakuli bana ba hae fa lifasi ne ba si ka lemuha hande za n’a tokwa Mulimu kuli ba li eze. Mi ka 1919, Jehova a yangwela batanga ba hae ba ba tozizwe, mi ku zwelela honaf’o, u ba fumisize kwa moya. Mi kana sepiso ye mwa timana yeo haki ye tabisa? Jehova u k’a nga Sione ku ba “munzi wa bunde.” Ee, bana ba Sione, mi ni yena Jehova ka sibili, ba ka tabela Sione. Sione u ka ba “tabo,” nyakalalo ye tuna. Mi yeo ha i na ku ba nyakalalo ya nako ye kuswani. Ku fuyolwa kwa Sione, ka mo ku bonisezwa ka bana ba hae ba fa lifasi, ku ka ba kwa “masika a’ sa taha a mañata.” Ha ku na ku fela ni kamuta.
6. Bakreste ba niti ba itusisa cwañi maluwo a macaba?
6 Ki ye sepiso ye ñwi y’a fa Mulimu. Ka ku bulela ku Sione, Jehova u li: “U ka anya mabisi a macaba, u anye mazwele a malena; u ka ziba kuli Na, [Muñ’a] Bupilo, ki Na Mupilisi ni Muliululi wa hao, Ya-Mata wa Jakobo.” (Isaya 60:16) Sione u anya cwañi “mabisi a macaba” ni ku anya “mazwele a malena”? Ki ka ku talusa kuli Bakreste ba ba tozizwe ni balikani ba bona ba “lingu ze ñwi” ba itusisa maluwo a macaba kwa ku zwisezapili bulapeli bwa niti. (Joani 10:16) Linubu ze fiwa ka ku itatela li tusa kwa ku konahalisa kuli ku eziwe musebezi o mutuna wa ku kutaza ni ku luta macaba kaufela. Ku itusisa hande mishini ya cwale ku konahalisa kuli Libibele ni lihatiso za Bibele li hatiswe mwa lipuo ze mianda-nda. Kacenu, litaba za mwa Bibele li fumaneha kwa batu ba bañata ku fita lili kaufela. Ba ba pila mwa linaha ze ñata-ñata ba sweli ku ituta kuli Jehova, y’a liuluzi batanga ba hae ba ba tozizwe mwa butanga bwa kwa moya, kaniti luli ki Mupilisi.
Zwelopili ya Kopano
7. Bana ba Sione ba iponezi kulo mañi ye makaza?
7 Jehova u kabisize batu ba hae ka nzila ye ñwi. U ba fuyozi ka kulo ya kopano. Kwa Isaya 60:17, lu bala kuli: “Bakeñisa kopa ni ka tisa gauda, mi bakeñisa sipi ni ka tisa silivera, bakeñisa kota ni tise kopa, mi bakeñisa macwe ni tise sipi; mi hape ni ku fa babusisi kuli ba ku pilise mwa kozo, ni bazamaisi kuli ba ku zamaise ka ku luka.” Ku yolisa kopa ka gauda ki zwelopili, mi ku cwalo ni ka za ku yolisa linto ze ñwi ze bulelwa fa. Ka ku lumelelana ni seo, Isilaele wa Mulimu u iponezi zwelopili ya mwa kopano ye sa zwelapili ku ezahala mwa mazazi a maungulo a. Ki ye mitala i sikai.
8-10. Mu taluse licinceho ze nde ze ezahezi mwa kopano ku zwa ka 1919.
8 Silimo sa 1919 si si ka fita kale, liputeho za batu ba Mulimu ne li etelelwanga ki maeluda ni madikoni, mi bao kaufela ne ba ketiwanga ki lilama za puteho. Ku kala ka sona silimo seo, “mutanga ya sepahala, ya na ni kutwisiso” n’a ketanga muzamaisi wa sebelezo mwa puteho ni puteho kuli a okamele za sebelezo ya mwa simu. (Mateu 24:45-47) Kono mwa liputeho ze ñata, tukiso yeo ne i sa sebezi hande kakuli maeluda ba bañwi be ne ba ketiwa ne ba sa sehezangi hahulu musebezi wa ku kutaza. Kacwalo, ka 1932, liputeho za laelwa ku tuhela ku ketanga maeluda ni madikoni. Kono ne li na ni ku keta banna be ne ba ka sebeleza fa katengo ka sebelezo hamoho ni muzamaisi wa sebelezo. F’o ne ku swana ni ku yolisa “kopa” ka “kota”—zwelopili ye tuna luli!
9 Ka 1938, liputeho za mwa lifasi kaufela za ikatulela ku amuhela tukiso ye nde yeo, yona ye n’e lumelelana hahulu ni mulao wa mwa Mañolo. Tamaiso ya puteho ne i filwe ku mutang’a sitopa ni batanga ba bañwi, mi bao kaufela ne ba ketilwe ka ketelelo ya mutanga ya sepahala, ya na ni kutwisiso. Liketisa kaufela ne li felile! Kacwalo, ku ketiwa mwa puteho kaufela ne ku eziwa ka teokratiki. F’o ne ku swana ni ku yolisa “macwe” ka “sipi” kamba “kopa” ka “gauda.”
10 Haisali ku zwiwa f’o, zwelopili se i zwezipili ku ezahala. Ka mutala, ka 1972, ne ku bonwi kuli liputeho ha ne li ka okamelwa ki sitopa se si swalisana sa maeluda ba ba ketilwe ka teokratiki, seo ku sona ku si na eluda ya m’ata hahulu ku fita ba bañwi, ne ku ka swana hahulu ni m’o liputeho za Sikreste za mwa lilimo za mwanda wa pili ne li okamelelwa. Hape, ibat’o ba lilimo z’e peli kwamulaho, ne ku ngilwe muhato o muñwi. Ne ku ezizwe cinceho ka za muzamaisezo wa tutengo to tuñwi twa mulao, ili ku konisa ba Sitopa Se Si Etelela ku isa hahulu pilu ku za kwa moya za batu ba Mulimu ku fita ku hakanyehiswa ki litaba za mulao za ka zazi.
11. Ki mañi ya tahisize kuli ku be ni licinceho mwa kopano mwahal’a batu ba Jehova, mi ki lifi ze zwile mwa licinceho zeo?
11 Ki mañi y’a sweli ku tahisa zona licinceho zeo? Ki yena Jehova Mulimu ka sibili. Ki yena ya bulela kuli: ‘Ni ka tisa gauda.’ Mi ki yena ya sa zwelapili ku bulela kuli: ‘Ni ku fa babusisi kuli ba ku pilise mwa kozo, ni bazamaisi kuli ba ku zamaise ka ku luka.’ Ee, Jehova ki yena ya talima za okamelo ya batu ba hae. Zwelopili ya kopano ye n’e polofitilwe ki nzila ye ñwi yeo ka yona a kabisa batu ba hae. Mi kabakaleo, Lipaki za Jehova se ba fuyozwi mwa linzila ze ñata. Kwa Isaya 60:18, lu bala kuli: “Butata ha bu sa na ku bulelwa mwa naha ya hao, nihaiba sinyehelo kamba matota mwa milulwani ya hao; kono u ka beya makwakwa a hao libizo la Bupilo, ni minyaka ya hao libizo la Nuneko.” Manzwi ao ki a mande luli! Kono s’a talelelizwe cwañi?
12. Ku tile cwañi kuli kozo i be kalulo ye tuna mwahal’a Bakreste ba niti?
12 Bakreste ba niti ba itinga hahulu ku Jehova kuli a ba laele ni ku ba etelela, mi kabakaleo, ku swana ni mwa n’a polofitezi Isaya, kuli: “Bana ba hao kaufela i ka ba ba ba lutilwe ki Mulena; mi kozo ye ba ka pila ku yona bana ba hao, i ka ba ye tuna.” (Isaya 54:13) Hape, moya wa Jehova u sebeza kwa batu ba hae, mi kalulo ye ñwi ya muselo wa moya w’o ki kozo. (Magalata 5:22, 23) Kacwalo, kozo ye ba ba ni yona batu ba Jehova i tahisa kuli ba be makundamo a mande mwa lifasi la mifilifili. Kozo ye ba na ni yona, ye tomile fa lilato leo Bakreste ba latana ka lona, i boniseza cimo mo ba ka pilela mwa lifasi le linca. (Joani 15:17; Makolose 3:14) Kaniti, kaufela luna lwa tabela ku ikola ni ku ekeza kwa kozo yeo, ye kutekehisa Mulimu wa luna ni ku mu tahiseza tumbo. Mi kozo yeo ki kalulo ye tuna ya paradaisi ya luna ya kwa moya!—Isaya 11:9.
Liseli la Jehova Li ka Zwelapili ku Benya
13. Ki kabakalañi ha lu kona ku kolwa kuli liseli la Jehova ni kamuta ha li na ku tuhela ku benyeza batu ba hae?
13 Kana liseli la Jehova li ka zwelapili ku benyeza batu ba hae? Ee! Kwa Isaya 60:19, 20, lu bala kuli: “Lizazi ha li sa na ku ba liseli la hao la musihali; mi ni kweli ha i sa na ku lila. Kono [Muñ’a] Bupilo ki Yena ya ka ba liseli la hao la kamita, Mulimu wa hao i be y’o ka itumba ka Yena. Lizazi la hao ha li sa na ku likela, ni kweli ya hao ha i sa na ku ya kwa lififi; kakuli [Muñ’a] Bupilo ikaba liseli la hao la kamita, mi mazazi a hao a ku itiulula a ka fela.” ‘Mazazi a ku itiulula’ a buhapiwa bwa kwa moya ha n’a felile ka 1919, liseli la Jehova ne li kalile ku ba benyeza. Lilimo ze fitelela 80 hasamulaho, ba sa zwelapili ku shemubiwa ki Jehova kakuli liseli la hae li sa zwelapili ku benya. Mi ha li na ku tuhela ku benya. Ka za balapeli ba hae, Mulimu wa luna h’a na ku “likela” inge lizazi kamba “ku ya kwa lififi” inge kweli. Kono u ka ba monyehela ka liseli mwa nako ya kwapili ya kamita-ni-mita. B’o ki buikolwiso bo butuna luli ku luna ba ba pila mwa mazazi a maungulelo a lifasi le li mwa lififi le!
14, 15. (a) Batu ba Mulimu kaufela ki ba ba “lukile” ka nzila ifi? (b) Ka za Isaya 60:21, ba lingu ze ñwi ba libelela talelezo mañi ya butokwa?
14 Ki ye sepiso ye ñwi y’a fa Jehova ka za bayemeli ba Sione ba fa lifasi, yena Isilaele wa Mulimu. Isaya 60:21 i li: “Sicaba sa hao ikaba sa ba ba lukile fela, ba ka luwa lifasi ku ya ku ile; ki mutai o ni calile isali Na, musebezi wa mazoho a ka, ilikuli ni lumbekwe.” Ka 1919, Bakreste ba ba tozizwe ha ne ba kutisizwe sinca kuli ba eze musebezi, ne ba li sikwata sa batu se si ipitezi. Mwa lifasi le li tezi buezalibi, ne ba ‘beilwe ba ba lukile’ kabakala tumelo ya bona ye tiile mwa sitabelo sa tiululo sa Kreste Jesu. (Maroma 3:24; 5:1) Mi sina Maisilaele be ne ba lukuluzwi ku zwa mwa buhapiwa bwa mwa Babilona, ba luwa “naha,” ili naha ya kwa moya, kamba sibaka sa musebezi, seo ku sona ne ba ka ikola paradaisi ya kwa moya. (Isaya 66:8) Bunde bwa naha yeo y’e li paradaisi ha bu na ku fela kakuli, ka ku sa swana ni Isilaele wa kwakale, Isilaele wa Mulimu ka sicaba h’a na ku tuhela ku sepahala. Tumelo ya bona, buitiiso bwa bona, ni cisehelo ya bona ya ku kutekehisa libizo la Mulimu ha li na ku fela ni kamuta.
15 Lilama kaufela za sicaba sa kwa moya seo se ba keni mwa bulikani bo bunca. Kaufel’a bona ba ñozwi mulao wa Jehova fa lipilu za bona, mi Jehova, ka sitabelo sa tiululo sa Jesu, u ba swalezi libi za bona. (Jeremia 31:31-34) U ba beya ba ba lukile ka ku ba “bana” mi u ba eza mane inge kuli ba petehile. (Maroma 8:15, 16, 29, 30) Balikani ba bona ba lingu ze ñwi ni bona ba swalezwi libi za bona ka sitabelo sa Jesu mi, sina Abrahama, ba beilwe ba ba lukile sina balikani ba Mulimu ka tumelo ya bona. “Ba tapisize liapalo za bona, ba li sweufalize mwa mali a Ngunyana.” Mi balikani bao ba lingu ze ñwi ba libelela ku fuyolwa hape ka nzila ye ñwi ye makaza. Ha se ba punyuhile “ñalelwa ye tuna” kamba ha se ba zusizwe kwa bafu, ba ka iponela talelezo ya luli ya manzwi a kwa Isaya 60:21 lifasi kaufela ha li ka ba paradaisi. (Sinulo 7:14; Maroma 4:1-3) Ka nako yeo, “ba ba ishuwa ba ka luwa naha, ba ka ikola kozo ye tuna.”—Samu 37:11, 29.
Kekezeho I Sa Zwelapili
16. Jehova n’a file sepiso mañi ye makaza, mi se i talelelizwe cwañi?
16 Mwa timana ya mafelelezo ya Isaya 60, lu bala sepiso ya mafelelezo ya Jehova mwa kauhanyo yeo. U bulela ku Sione kuli: “Mutu yo munyinyani u ka fetuha ba ba eza lule, ya nyazeha a be sicaba se si mata. Na [Muñ’a] Bupilo ni ka pakisa ku eza cwalo, mwa nako ya yona.” (Isaya 60:22) Mwa miteñi ya luna, Jehova u se a petile za n’a sepisize. Bakreste ba ba tozizwe ha ne ba kutisizwe sinca ka 1919 kuli ba eze musebezi, ne ba li ba banyinyani kwa buñata—kaniti, “mutu yo munyinyani.” Palo ya bona ya ekezeha Maisilaele ba kwa moya ba bañwi ha ne ba tahisizwe. Mi ba lingu ze ñwi ni bona kiha ba kalisa ku selehanela ku bona ka buñata bo bu zwelapili ku ekezeha. Kozo ya batu ba Mulimu, yona paradaisi ya kwa moya ya mwa “naha” ya bona, se i hohile batu ba bañata ba ba sepahala mane kuli “mutu yo munyinyani” luli s’a bile “sicaba se si mata.” Ka nako ya cwale, sona “sicaba” seo—yena Isilaele wa Mulimu ni “bana ba macaba” ba ba ineezi ba ba fitelela 6,000,000—ki ba bañata ku fita buñata bwa linaha za mwa lifasi. (Isaya 60:10) Kaufela ba ba yahile ku yona ba abana mwa ku bonisa liseli la Jehova, mi seo si tahisa kuli kaufel’a bona ba be ba bande ku yena.
17. Nyakisiso ye ya Isaya kauhanyo 60 i mi amile cwañi?
17 Ee, kwa tiisa tumelo ku nyakisisa lisupo ze tuna za Isaya kauhanyo 60. Kwa omba-omba ku bona kuli ku t’o fita cwale, Jehova n’a zibezi cimo kuli batu ba hae ne ba ka ya mwa buhapiwa bwa kwa moya mi ni ku kutiswa sinca. Kwa lu komokisa kuli ku t’o fita cwale, Jehova n’a bonezi cimo kekezeho-tuna ya palo ya balapeli ba niti mwa miteñi ya luna. Hape, kwa omba-omba luli ku ziba kuli Jehova h’a na ku lu siya! Kwa susueza ku kolwiswa kuli minyako ya “munzi” i ka zwelapili ku ba ye kwaluzwi kamita kuli ba ba “ketezwi bupilo bo bu sa feli” ba amuhelwe hande! (Likezo 13:48) Jehova u ka zwelapili ku monyehela batu ba hae liseli. Sione u ka zwelapili ku ba munzi wa bunde bana ba hae ha ba nze ba benyisa hahulu-hulu liseli la bona. (Mateu 5:16) Kaniti, lu ba ba tukufalezwi hahulu ku fita lili kaufela ku sutelela ku Isilaele wa Mulimu ni ku itebuha hahulu tohonolo ya luna ya ku bonisa liseli la Jehova!
Kana Mwa Kona ku Talusa?
• Ka za ku lwaniswa, ki bufi buikolwiso bo lu na ni bona?
• Bana ba Sione ba ‘anyize mabisi a macaba’ ka mukwa ufi?
• Jehova u ‘tisize kopa mwa sibaka sa kota’ ka linzila lifi?
• Ki ifi mikwa ye mibeli ye koñomekilwe kwa Isaya 60:17, 21?
• “Mutu yo munyinyani” u bile cwañi “sicaba se si mata”?
[Lipuzo za Tuto]
[Mbokisi/Maswaniso a fa likepe 18]
BUPOLOFITA BWA ISAYA—Liseli kwa Batu Kamukana
Litaba ze mwa lituto z’e peli ze ne li filwe mwa ngambolo ye ñwi ya Mikopano ya Likiliti ya “Baluti ba Linzwi la Mulimu” ya 2001/02. Kwa mafelelezo a ngambolo yeo, mwa libaka ze ñata, mubuleli n’a zwisize buka ye nca y’e li Bupolofita bwa Isaya—Liseli kwa Batu Kamukana, volyumu 2. Mwa 2000, ne ku zusizwe buka ya Bupolofita bwa Isaya—Liseli kwa Batu Kamukana, volyumu 1. Buka ye nca yeo ha se i zwisizwe, se ku bile ni nyakisiso ya cwale ya buñata bwa litimana za mwa buka ya Isaya. Libuka zeo li sweli za lu tusa hahulu ku tungisa kutwisiso ya luna ni buitebuho bwa luna bwa buka ya bupolofita ya Isaya ye tiisa tumelo.
[Maswaniso a fa likepe 15]
Niha ba lwaniswa, ‘Jehova u kabisa batu ba hae za ku ba pilisa’
[Maswaniso a fa likepe 16]
Batu ba Mulimu ba itusisa maluwo a ba macaba kuli ba zwisezepili bulapeli bwa niti
[Siswaniso se si fa likepe 17]
Jehova u fuyozi batu ba hae ka zwelopili ya kopano ni ka kozo