Ku Zamaya mwa Linzila za Jehova ku Tahisa Mipuzo Ye Mituna

KANA mu kile mwa zamaya musipili o mutelele wa ku itabisa mwa malundu? Haiba mu kile mwa eza cwalo, mwendi ne mu ikutwile inge ba ba li fahalimw’a lifasi. Haki ku tabisa ni k’o ku akula kamoya ka kande, ku bona ze kwahule-hule, ni ku buha lifolofolo, limela ni ze ñwi cwalo ze kateleha! Mwendi lipilaelo ze ne mu siile ko mu zwa ne li bonahezi ku sa bilaeza hahulu.

Buñata bwa batu ki ka siwela ba tamanga tusipili to tu cwalo, kono haiba mu Bakreste ba ba ineezi, mwendi se mu pilile bupilo bo bu kona ku likanywa ni ku zamaya mwa naha ye lumbile. Sina walisamu wa kwaikale, ku si na ku kakanya mu lapezi kuli: “[Muñ’a] Bupilo, u ni bonise linzila za hao; u ni lemuse sikuka sa hao.” (Samu 25:4) Kana mwa hupula mo ne mu ikutwezi ha ne mu kambamile lwa pili fa lilundu la ndu ya Jehova ni ku kala ku hata mwa mabaka a’ lumbile? (Mika 4:2; Habakuki 3:19) Ku si na kuliñi, hañihañi ne mu lemuhile kuli ku zamaya mwa linzila ze lumbile zeo za bulapeli bo bu kenile ne ku mi file silelezo ni nyakalalo. Ne mu til’o ikutwa sina mwa n’a ikutwezi walisamu kuli: “Si fuyozwi sicaba se si ziba mulumo wa tolombita; ba zamaya mwa liseli la pata ya hao [Muñ’a] Bupilo.”—Samu 89:15.

Kono fokuñwi, ba ba zamayanga misipili ye mitelele ya ku itabisa mwa malundu ba na ni ku kopananga ni mingenyuko ye mitelele ili ye shetumukile hahulu. Mahutu a bona a kalanga ku opa, mi ba topwelanga. Ni luna lwa kona ku kopana ni butata ha lu nze lu sebeleza Mulimu. Mwendi cwanoñu fa se lu pashaezi fela. Lu kona ku kutisa cwañi m’ata ni tabo ya luna? Nto ya pili ki ku lemuha ku pahama kwa linzila za Jehova.

Milao Ye Pahami ya Jehova

Linzila za Jehova ‘li pahami fahalimu a linzila za batu,’ mi bulapeli bwa hae se bu ‘tomilwe fa ngo ya malundu ni ku umbuka tulundu.’ (Isaya 55:9; Mika 4:1) Butali bwa Jehova ki “butali bo bu zwa kwahalimu.” (Jakobo 3:17) Milao ya hae i fita ye miñwi kaufela. Ka mutala, ka nako yeo Makanana ne ba ezanga lunya lwa ku eza bana ba bona matabelo, Jehova n’a file Maisilaele milao ya muzamao o pahami ili y’e mufelañeke. A li ku bona: “Mu si ke mwa eza mubotana ka ketululo, mi mu si ke mwa olisa mutu yo mutuna. . . . Muzwahule . . . mu mu nge sina ya pepezwi habo mina; mi mu mu late mo mu itatela.”—Livitike 19:15, 34, NW.

Lilimo ze 1,500 ku tuha f’o, Jesu a fa mitala  ye miñwi ya ‘mulao o kutekiwa’ wa Jehova. (Isaya 42:21) Mwa Ngambolo ya fa Lilundu, n’a bulelezi balutiwa ba hae kuli: “Mu late be ili lila ku mina, . . . mi mu lapelele ba ba mi eza maswe, ba ba mi nyandisa; kuli mu be bana ba Ndat’a mina ya kwa lihalimu.” (Mateu 5:44, 45) N’a zwezipili kuli: “Cwale linto kamukana ze mu lata kuli batu ba mi ezeze, mu ba ezeze zona ni mina; kakuli ki ona Mulao ni Bapolofita.”—Mateu 7:12.

Milao ye pahami yeo i susumeza lipilu za ba ba i utwa, ili ku ba susueza ku likanyisa Mulimu ye ba lapela. (Maefese 5:1; 1 Matesalonika 2:13) Mu nahane mwa n’a fetuhezi Paulusi. Ha lu utwa ka za hae lwa pili, “n’a lumezi pulao ya Setefani” ni ku “sinya Keleke.” Kono lilimonyana hasamulaho, n’a eza ka musa Bakreste ba mwa Tesalonika sina “muanyisi mw’a babalelela bana ba hae ka lilato.” Tuto ya Mulimu ne i fetuzi Paulusi ya n’a li munyandisi ku ba Mukreste y’a lilato. (Likezo 8:1, 3; 1 Matesalonika 2:7) Kaniti luli n’a itebuhile butu bwa hae ha ne bu fetuzwi ka tuto ya Kreste. (1 Timotea 1:12, 13) Buitebuho bo bu swana bu kona ku lu tusa cwañi ku zwelapili ku hata mwa linzila ze pahami za Mulimu?

Ku Zamaya ka Buitebuho

Ba ba zamayanga misipili ye mitelele ya ku itabisa ba ikolanga lika ze buheha ze banga mwa mabaka a’ lumbile. Hape ba itutanga ku ikola ku buha tuka to tunyinyani to tu tanakani kwatuko ni nzila, inge cwalo licwe le li ipitezi, palisa ye kateleha, kamba ku bona folofolo ya mwa naheñi ha i beluka. Kwa moya, lu tokwa ku lemuha mipuzo ye minyinyani ni ye mituna ye zwanga mwa ku zamaya ni Mulimu. Temuho ye cwalo i ka tahisa kuli lu hate hande mi hape ni kuli lu tuhele ku ndombyaela mi lu kale ku kilita. Lu ka lumelelana ni manzwi a Davida a’ li: “U ni utwise mukekecima wa hao isali kakusasa; kakuli ki Wena ye ni sepa. U ni bonise nzila ye ni swanezi ku ya ka yona.”—Samu 143:8.

Mary, ya zamaile ka lilimo ze ñata mwa linzila za Jehova, u li: “Ha ni buha pupo ya Jehova, ha ni boni fela mubupehelo wa teñi o tatezani, kono ni lemuhanga ni lilato la Mulimu. Ibe kuli ki folofolo, nyunywani, kamba kokwani, ye ñwi ni ye ñwi i ipitezi, ye tukula kwa bunde. Nyakalalo ye swana i kona ku tahiswa ki litaba za niti ya kwa moya ye ya inze i utwahala hahulu.”

Lu kona ku tungisa cwañi buitebuho bwa luna? Nto ye ñwi ki ku pima ku keshebisa z’a lu ezeza Jehova. Paulusi n’a ñozi kuli: “Mu lapele ka ku sa lisela. Mu itumele kwa linto kaufela.”—1 Matesalonika 5:17; Samu 119:62.

Tuto ya ka butu i lu tusa ku ba ni moya wa buitumelo. Paulusi n’a elelize Bakreste ba kwa Kolose kuli: “Mu zamaye cwalo ku [Jesu Kreste], . . . mu nze mu . . . tiya mwa tumelo, . . . mu nze mu tezi buitumelo.” (Makolose 2:6, 7) Ku bala Bibele ni ku yeya ze lu bala ku tiisa tumelo ya luna mi hape ku lu suteleza hahulu ku Musimululi wa Bibele. Mwa makepe a yona kaufela ku inzi litaba za butokwa hahulu ze kona ku lu susumeza ku ‘tala buitumelo.’

Ku sebeleza Jehova hamoho ni mizwale ba luna ni kona ku lu nolofaleza nzila. Walisamu n’a ipulezi kuli: “Be ni twaelani ni bona kamukana, ki ba ba ku saba.” (Samu 119:63) Ze ñwi za linako z’e lu tabisanga hahulu-hulu ki ha lu li ni mizwale ba luna kwa mikopano ya Sikreste kamba ko kuñwi. Lu lemuha kuli lubasi lwa luna lwa Sikreste lwa mwa lifasi lote ili lo lu butokwa hahulu lu teñi kabakala Jehova ni linzila za hae ze pahami.—Samu 144:15b.

 Kwand’a buitumelo, ku ikutwa ku ba ni buikalabelo ku ka lu fa m’ata a ku zwelapili ku zamaya mwa linzila za Jehova ze pahami.

Ku Zamaya ka ku Ziba Tukelo

Ba ba zamayanga misipili ye mitelele ya ku itabisa ili ba ba ziba tukelo ba lemuhanga butokwa bwa ku zamaya ka tokomelo kuli ba si ke ba lateha kamba ku bebulukela bukaufi hahulu ni mingenyuko ye shetumukile hahulu. Ka ku ba ba ba lukuluhile ku ipilela mo lu latela, Jehova u lu fa tikanyo ye utwahala ya tukuluho ni buikupuleli. Kono tukuluho ye cwalo i tokwa kuli lu zibe tukelo ha lu nze lu peta litamo za luna za Sikreste.

Ka mutala, Jehova u sepile kuli batanga ba hae ba ka peta hande litamo za bona ka tukelo. H’a lu tomeli nako ya ku feleza mwa misebezi ya Sikreste kamba mo lu swanela ku ikataleza teñi kamba limpo za mali ni za mifuta ye miñwi ze lu swanela ku fa. Ku fita ku ba cwalo, kaufel’a luna lu amiwa ki manzwi a Paulusi kwa Makorinte, a’ li: “Mutu ni mutu a zwise mw’a hupulezi mwa pilu ya hae.”—2 Makorinte 9:7; Maheberu 13:15, 16.

Ku fana kwa ka tukelo kwa Sikreste ku ama hape ni ku taluseza ba bañwi taba ye nde. Hape lu bonisa kuli lu eza ka tukelo ka ku fa linubu za musebezi wa mwa lifasi kaufela wa za Mubuso. Gerhardt y’a li eluda, u talusa kuli yena ni musal’a hae ne ba ekelize hahulu kwa linubu ze ba sulanga hamulaho wa ku yo pota kwa mukopano kwa Eastern Europe. U li: “Ne lu lemuhile kuli mizwale ba luna teñi k’o ha ba na hande lika za kwa mubili; niteñi ba itebuha hahulu lihatiso za luna ka za Bibele, kacwalo lwa atula kuli lu likange ka mo lu konela ku tusa mizwale ba luna ba ba shebile ba mwa linaha li sili.”

Ku Ekeza kwa Buitiiso bwa Luna

Ku tokwahala m’ata ku zamaya mwa malundu. Ba ba zamayanga misipili ye mitelele ya ku itabisa ba itwaezanga fo ba konela kaufela, mi ba bañata ba zamayanga tusipili to tu kuswani kuli ba itukiseze misipili ye mitelele. Ka ku swana ni seo, Paulusi n’a elelize kuli lu tukufalelwe mwa misebezi ya Mubuso ilikuli lu zwelepili ku iketa hande kwa moya. Paulusi n’a ize ba ba lakaza kuli ba “zamaye ka mukwa o swanela Mulena” ni kuli ba be ‘ba ba tiile’ ba swanela ku ‘beya miselo mwa misebezi ye minde kaufela.’—Makolose 1:10, 11.

Mulelo u ekeza kwa buitiiso bwa ya zamaya musipili o mutelele wa ku itabisa. Kamukwaufi? Ku nahana hahulu za mulelo sakata, inge cwalo lilundu le li kwahule, kwa nyangumuna. Mi muzamai y’o h’a fita fa libaka ze ñwi z’a ziba, wa kona ku likanya musipili o s’o siyezi kuli a fite kw’a ya. H’a nze a iheta ku bona musipili wa s’a zamaile, u ikutwa kuli u petile se siñwi.

Ni luna, sepo ya luna ya ku pila ku ya ku ile ya lu tiisa ni ku lu susueza. (Maroma 12:12) Ka nako ya cwale, ha lu nze lu zamaya mwa linzila za Jehova, lu ikutwa kuli lu petile se siñwi ha lu lela za Sikreste za ku eza ni ku li peta. Mi ki tabo kwa butuna ye lu banga ni yona ha lu iheta kwa lilimo ze lu sebelize ka busepahali kamba ha lu lemuha mo lu cincelize butu bwa luna!—Samu 16:11.

Kuli ba zamaye misipili ye mitelele ba sa felelwi ki m’ata, bazamai ha ba cinca-cincangi matambo a bona. Ni luna, mikwa ye minde ye kopanyeleza ku kopana kamita ni ku zwela mwa sebelezo ya mwa simu i ka lu tusa ku zwelapili ku libisa tokomelo ko lu ya. Kacwalo, Paulusi n’a susuelize Bakreste sina yena kuli: “Lu zweleñipili ku zamaya hande ku yona nzila ye swana yeo.”—Mafilipi 3:16, NW.

Kono ha lu zamayi lu nosi mwa linzila za Jehova. Paulusi u ñola kuli: “A lu babalelane, kuli lu susumezane mwa lilato ni mwa misebezi ye minde.” (Maheberu 10:24) Sango se sinde sa Sikreste si ka bisa bunolo ku zamaya hamoho ni balumeli ba bañwi lu sa siyaleli.—Liproverbia 13:20.

Sa mafelelezo, mi ili sa butokwa ka ku fitisisa, kikuli lu si libali m’ata a’ fana Jehova. Ba ba fumana m’ata ku Jehova ba ka “zamaya ba ekelezwa kwa mata.” (Samu 84:5, 7) Nihaike kuli fokuñwi ha ku na mukwa kwand’a ku fita mwa butata, lu ka kona ka tuso ya Jehova.