Mikopano Ye Mituna ya Mwahal’a Macaba mwa 2003

LA Mukibelo, October 6, 2001, mukopano wa ka silimo wa lilama za Watch Tower Bible and Tract Society of Pennsylvania n’o ezizwe mwa tolopo ya Jersey City, ye mwa New Jersey, mwa United States of America. Hamulaho wa mukopano w’o, lilama zeo ni baeñi ba zona ba ikola tukiso ye ipitezi. Lizazi le li tatama, kwa mikopano ye miñwi ye n’e ezizwe mwa litolopo z’e ne za mwa Canada ni mwa United States, lilama za Sitopa Se Si Etelela sa Lipaki za Jehova ne ba file zibiso ye latelela kwa mafelelezo a ngambolo ya bona ya maungulo:

“Ha lu nze lu itukiseza za kwapili, ku butokwa hahulu kuli batu ba Mulimu kaufela ba si ke ba keshebisa ku kopana hamoho. Muapositola Paulusi n’a susuelize kuli ku eza cwalo, hamoho ni ku susuezana, ku eziwe sihulu ka ku bona kuli lizazi le lituna la Jehova ili le li sabisa li sutelezi fakaufi. (Maheberu 10:24, 25) Ka ku lumelelana ni taelo yeo ye tomile fa Mañolo, lu sepa kuli lu ka ba ni mikopano ya likiliti mwa likalulo kaufela za lifasi isaho [mwa 2002]. Mi mwa silimo sa 2003, haiba Jehova a lata, ku kana kwa konahala kuli ku eziwe mikopano ye mituna ya mwahal’a macaba mwa linaha ze ñwi za mwa lifasi. Cwale s’e li nako ya ku tona ni ku libelela, ili ku bona mo i sweli ku bela miinelo ya lifasi.”

Ku si na taba ni ku sa sepeha kwa miinelo ni ku ikalelwa ko ku sweli ku ekezeha muinelo wa linto w’o ha unze u ya kwa ku fela, musebezi wa batu ba Mulimu u lukela ku zwelapili. Taba ye nde ya Mubuso, ku kopanyeleza cwalo ni lushango lwa Bibele lwa temuso, i lukela ku shaelwa mwa masika kaufela, mishobo, lipuo, ni macaba, ili ku ba susueza ku ‘saba Mulimu ni ku mu lumbeka kakuli nako ya hae ya ku atula i tile.’ (Sinulo 14:6, 7) Kacwalo, ka mw’a latela ni mw’a tabelela Ndat’a luna wa kwa lihalimu, mikopano ye mituna ya mwahal’a macaba i leliwa ku eziwa mwa linaha ze sikai mwa lifasi mwa silimo sa 2003.

Sa pili, ku sepiwa kuli mikopano ye cwalo i ka tomahanyiwa mwa litolopo li sikai za mwa North America mi hamulahonyana ni mwa Yurope. Hasamulahonyana mwa 2003, ku ka eziwa litukiso kuli likwata za bayemeli li tame misipili ya ku ya kwa litolopo li sikai za mwa Asia; mi kwa mafelelezo a silimo, likwata ze ñwi li ka ya kwa Africa, South America, ni lioli za mwa Liwate la Pacific. Mitai ye miñwi i ka kupiwa ku luma bayemeli ba sikai kwa libaka ze ñwi za mikopano, kacwalo ha ku na ku konahala kuli mañi ni mañi a memiwe ku y’o fumaneha teñi. Niteñi, ku ka ba hande kuli bayemeli b’a sikai ba ba zwa mwa linaha ze shutana-shutana ba fumanehe kwa libaka ni libaka.

Liputeho za Lipaki za Jehova honafa li ka kalisa ku amuhela litaba ka za mikopano yeo. Litaba ka za mazazi luli ni litolopo tenyene k’o bayemeli ba kona ku fumaneha kwa mikopano li ka fiwa ki mitai ya zona. Kacwalo, ku kupiwa kuli mu si ke mwa ñola kamba ku buza ka za taba yeo ka nako ye.

Ba ba ka ketiwa sina bayemeli ikaba fela Lipaki ba ba ineezi ni ku kolobezwa ba ba ka ba mitala ye minde mi ba bonisa lilato la sizwale kwa mizwale ba kwa libaka zeo. Mi ni bona bao ba ka ba ni matohonolo a mande a ku fa bapoti kamuhelo ye nde ili ye buniti. (Maheberu 13:1, 2) Zeo li ka tahisa kuli ku be ni ku ‘kutazana.’ (Maroma 1:11, 12) Litaba ze ñwi ka za litukiso zeo li ka fiwa ki mitai ye memilwe ku luma bayemeli kwa naha kamba linaha ze ketilwe.

Mikopano ya sikiliti ya silimo sa 2003 i ka eziwa mwa linaha ze ñata sina kamita. Ka ku kopana hamoho, bote ba ka ba ni kolo ya ku ‘teeleza, ku ituta, ni ku kutazwa.’ (Deuteronoma 31:12; 1 Makorinte 14:31) Seo si ka fa batu ba Mulimu tohonolo ya kuli ba ‘lazwe ni ku bona kuli Muñ’a Bupilo u na ni sishemo.’ (Samu 34:8) Kwa mikopano ye mituna kaufela ya mwahal’a macaba, ni ku ye miñata ya sikiliti, balumiwa ba ka ba teñi, mi ba bañwi ku bona ba ka itusiswa fa tukiso.

Unomwaha, lu sweli ku ikola Mikopano ya Sikiliti ya “Bashaeli ba Mubuso Ba Ba Na ni Tukufalelo,” ye lu susumeza kuli lu fe bupaki bo butuna hahulu. Ha lu nze lu eza cwalo, kaniti luli lu kana lu libelela ka cisehelo z’a lelile ku lu ezeza Jehova mwa silimo se si taha. Seo si ka lu tusa ku ‘libelela ni ku itukiseza’ kabakala linako ze t’ata ze ili ze tuna.—Mateu 24:42-44.