Mu Si Ke Mwa Pumiwa

BUPUMI bu bile teñi ibat’o ba ku zwa kwa simuluho ya batu. Ye ñwi ya likezahalo za pili za litaba za kwaikale ze ñozwi ki ya za bupumi, ili f’o Satani n’a pumile Eva mwa simu ya Edeni.—Genese 3:13; 1 Timotea 2:14.

Nihaike kuli ku zwa ona f’o, bupumi bu zwezipili ku ata mwa lifasi, kacenu le bu atile ni ku fita. Ka ku ama mwa miteñi ye, Bibele ne lemusa kuli: “Batu ba lunya, ba ba puma, ba ka zwelapili mwa bumaswe, inze ba puma batu, mi ba pumiwa ni bona.”—2 Timotea 3:13.

Batu ba pumiwa ka mabaka a mañata. Lipumi ni ba ba amuhanga ba bañwi lika ka sikupuki ba pumanga batu ni ku ba amuha mali a bona. Ba za bupolitiki ba pumanga batu ba mwa lilalo za bona, ka ku pihelela ku ba fa litulo za bona. Fokuñwi batu ba ipumanga ili bona. Mwa sibaka sa ku lwanisa litaba ze maswe, ba ikolwisa ili bona kuli ku latelela likezo ze lubeta ze cwale ka ku zuba, ku itusisa maswe milyani ye kola, kamba buhule ha ku tahisi kozi.

Ku tuha f’o ku na ni bupumi mwa litaba za bulapeli. Baeteleli ba bulapeli ba mwa miteñi ya Jesu ne ba puma batu. Ka za lipumi zeo, Jesu n’a ize: “Ki libofu ze zamaisa libofu; sibofu ha si zamaisa sibofu se siñwi, bubeli bwa zona li ka wela mwa mukoti.” (Mateu 15:14) Hape, batu ba ipumanga ka litaba za bulapeli. Liproverbia 14:12 ili: “Nzila ye ñwi i ka bonahala ku mutu inge i lukile, kanti mafelelezo a yona ki lifu.”

Ha ku komokisi kuli, sina mwa miteñi ya Jesu, buñata kacenu b’a pumiwa mwa litaba za bulapeli! Muapositola Paulusi n’a ize kuli Satani “u foufalize kutwisiso ya bona, kuli ba si ke ba bonisezwa liseli la Evangeli ya kanya ya Kreste ye li siswaniso sa Mulimu.”—2 Makorinte 4:4.

Haiba lu pumiwa ki mutu y’a amuha lika ka sikupuki, lwa latehelwa ki mali. Haiba lu pumiwa ki wa za bupolitiki, lu kana lwa latehelwa ki tukuluho ya luna ye ñwi. Kono haiba Satani a lu puma kuli mane lu hana niti ka za Jesu Kreste, lwa latehelwa ki bupilo bo bu sa feli! Kacwalo mu si ke mwa pumiwa. Mu kwalule munahano ni pilu ya mina kuli mu nyakisise simbule sa bulapeli bwa niti, yona Bibele. Haiba lu sa ezi cwalo lu ka yawa ze ñata.—Joani 17:3.