Lipuzo Ze Zwa kwa Babali

Ki mwa miinelo mañi m’o musali wa Sikreste a swanela ku itama taulo kwa toho ka mabaka a za bulapeli?

Muapositola Paulusi n’a ñozi kuli: “Musali kaufela h’a lapela kamba a polofita a si na s’a apezi kwa toho, u shubula toho ya hae.” Kabakalañi? Kabakala sikuka sa Mulimu sa butoho se si li: “Munna ki toho ya musali.” Hañata, ku lapela kamba ku kutaza mwa puteho ya Sikreste ki buikalabelo bwa munna. Kacwalo, musali wa Sikreste h’a eza lika za bulapeli zeo kamita li eziwanga ki munn’a hae kamba ki munna yo muñwi ya kolobelizwe, musali y’o u lukela ku itama taulo kwa toho.—1 Makorinte 11:3-10.

Miinelo m’o musali wa Sikreste a lukela ku itama taulo kwa toho i kana ya zuha mwa linyalo. Ka mutala, lubasi ha lu kopana ku eza tuto ya Bibele kamba ku ca lico, munna kamita ki yena ya zamaisanga tuto ni ku fa tapelo. Kono haiba munna haki mulumeli, buikalabelo b’o bu kana bwa ba bwa musal’a hae. Kacwalo, h’a lapela ka ku tumusa, ili ku yemela ba bañwi mwa tapelo kamba h’a eza tuto ni bana ba hae munn’a hae inz’a li teñi, kaizeli wa Sikreste u swanela ku itama taulo kwa toho. Haiba munn’a hae h’a yo, musali h’a tokwi ku itama taulo kwa toho, kakuli u na ni tumelezo ya Mulimu ya ku luta bana.—Liproverbia 1:8; 6:20.

Kono ku cwañi haiba mwa lubasi ku na ni mwanana wa mushimani ya  ineezi, ya li mutanga ya kolobelizwe wa Jehova Mulimu? Ka ku ba kuli mwana y’o ki silama sa puteho ya Sikreste, u swanela ku lutiwa ki banna mwa puteho. (1 Timotea 2:12) Haiba bondat’ahe ki balumeli, ki bona ba ba swanela ku mu luta. Kono haiba bondat’ahe ha ba yo, bom’ahe ba swanela ku itama taulo kwa toho ha ba eza tuto ni mwanana ya kolobelizwe y’o ni bana ba bañwi. Ku itingile ku bona haiba ba itakaleza ku fa mwana y’o ku lapela fa tuto yeo kamba ha ku ciwa lico. Ba kana ba ikutwa kuli mwana y’o ha si ka konelela kale ku lapela hande mi ba kana ba iketela ku lapela bona beñi. Haiba ba keta ku lapela bona beñi mwa muinelo o cwalo, ba swanela ku itama taulo kwa toho.

Basali ba Sikreste ba kana ba tokwa ku itama litaulo kwa toho ha ba eza lika ze ñwi za mwa puteho. Ka mutala, kwa mukopano wa mwahal’a viki wa ku zwela mwa sebelezo ya mwa simu, ku kana kwa ba fela ni likaizeli za Sikreste, ku si na banna ba ba kolobelizwe. Ku kana kwa ba ni linako ze ñwi ha ku si na banna ba ba kolobelizwe kwa mukopano wa puteho. Haiba kaizeli u na ni ku eza misebezi yeo kamita i eziwanga ki muzwale kwa mukopano wa puteho kamba kwa mukopano wa ku zwela mwa sebelezo ya mwa simu, u swanela ku itama taulo kwa toho.

Kana basali ba Sikreste ba swanela ku itama taulo kwa toho ha ba toloka lingambolo za Bibele ka ku bulela kamba ka ku li tolokela bosusu, kamba ha ba bala maparagilafu mwa hatiso ya ku ituta ka yona Bibele ye itusiswa kwa mukopano wa puteho? Kutokwa. Basali ba ba eza cwalo ha ba zamaisi kamba ku luta. Hape likaizeli ba ba abana mwa ku eza liponiso, ku bulela ze bonwi, kamba ku fa lingambolo za baituti mwa Sikolo sa Bukombwa sa Teokratiki ha ba tokwi ku itama taulo.

Hailif’o ku luta mwa puteho ku lukela ku eziwa ki banna ba ba kolobelizwe, banna hamoho ni basali ba na ni buikalabelo bwa ku luta ni ku kutaza kwande a puteho. (Mateu 24:14; 28:19, 20) Kacwalo, musali wa Sikreste h’a bulela Linzwi la Mulimu ku ba ba si Lipaki inz’a li ni Paki ya Jehova wa munna, h’a tokwi ku itama taulo kwa toho.

Kono kwa shutana haiba, ha ku zamaiswa tuto ya Bibele ya fa ndu ya kamita, ye tomilwe, ku na ni munna ya ineezi ya kolobelizwe. Yeo ki tukiso ye lukiselizwe cimo ili f’o ya zamaisa tuto a li yena muluti. Mwa muinelo o cwalo, tuto i swana ni ze eziwa mwa puteho. Paki wa musali haiba a zamaisa tuto ye cwalo inge ku na ni Paki wa munna ya kolobelizwe, musali y’o u swanela ku itama taulo kwa toho. Kono muzwale ya kolobelizwe ki yena ya swanela ku lapela. Kaizeli h’a koni ku lapela inge ku na ni muzwale ya ineezi konji haiba ku na ni libaka le lituna, inge cwalo kuli mwendi muzwale h’a buleli.

Kaizeli wa Sikreste fokuñwi a kana a sindeketwa kwa tuto ya Bibele ki munna ya li muhasanyi wa Mubuso ya si ka kolobezwa. Haiba a lata, kaizeli wa kona ku kupa muzwale y’o ku zamaisa tuto. Kono ka ku ba kuli h’a swaneli ku yemela kaizeli mwa tapelo ku Jehova, ne ku ka swanela kuli yena kaizeli a lapele kwa tuto. Haiba kaizeli ki yena ya zamaisa tuto ni ku lapela, u swanela ku itama taulo kwa toho. Muhasanyi wa munna y’o nih’a si ka kolobezwa kale, ba ba si Lipaki ba mu ziba kuli ki silama sa puteho kakuli w’a abana mwa musebezi wa ku kutaza.

Muapositola Paulusi n’a ñozi kuli: “Musali u swanezi ku ba ni sisupo kwa toho sa kuli wa buswa, kabakala mangeloi.” Ee, likaizeli za Sikreste ba na ni tohonolo ye tuna ya ku ba mitala ye minde kwa mangeloi a’ eza bolule-lule a’ zwelapili ku ipeya ku Jehova ka busepahali. Kwa swanela luli kuli basali ba Sikreste ba ise hahulu mamelelo ku za ku itama taulo kwa toho ha ku tokwahala cwalo!

[Maswaniso a fa likepe 26]

Ku itama taulo kwa toho ki ku bonisa likute kwa sikuka sa butoho