“Mu Tahe ku Na . . . , Mi ni Ka Mi Imulula”

“Lu Eze Batu Kaufela Hande”

MUSEBEZI o mutuna wa Jesu ne li ku kutaza ni ku luta taba ye nde ya Mubuso wa Mulimu. (Mareka 1:14; Luka 8:1) Bakeñisa kuli balateleli ba Kreste ba bata ku mu likanyisa, ba nga musebezi wa ku luta lushango lwa Mubuso wa Mulimu lo lu mwa Bibele ku ba ona musebezi wa pili mwa bupilo. (Luka 6:40) Lipaki za Jehova b’a tabiswa luli ki ku bona m’o lushango lwa Mubuso lu tahiseza kimululo ye inelela ku ba ba lu amuhela—sina mo ne ku ezahalezi Jesu inz’a sa li fa lifasi-mubu.—Mateu 11:28-30.

Kwand’a ku luta Linzwi la Mulimu, Jesu n’a ezize misebezi ye minde ye miñwi, ye cwale ka ku folisa bakuli ni ku fepa ba ba lapile. (Mateu 14:14-21) Ka ku swana, fahalimw’a musebezi wa bona wa ku luta Bibele, Lipaki za Jehova ba ekeza teñi likezo za ku tusa batu ba ba mwa butokwi. Mane, Mañolo a konisa Bakreste ku peta ‘misebezi kaufela ye minde’ ni ku ba susueza kuli ba ‘eze batu kaufela hande.’—2 Timotea 3:16, 17; Magalata 6:10.

“Mizwale Ba T’o Lu Tusa”

Mwa September ya 1999, naha ya Taiwan ne i lengilwe ki zikinyeho ye tuna. Hamulaho wa likweli li sikai, ñundupula ni litwa le li ñata-ñata le li topotokile za tahisa sinyeho ye tuna hahulu mwa Venezuela. Cwanoñu fa, munda o mutuna ne u shandauzi mwa naha ya Mozambique. Mwa likezahalo ze talu zeo kaufela, Lipaki za Jehova ne ba fitile kapili-pili kwa libaka zeo ba nze ba shimbezi batu ba ba mwa likozi zeo lico, mezi, milyani, liapalo, litende, ni liitusiso za ku apehela teñi. Baitateli be ne ba ziba za bualafi ba toma tupatela twa ka nakonyana, mi baitateli ba za buyahi ba yaha mandu a manca a be ne ba sinyehezwi ki mandu.

Be ne ba li mwa likozi zeo ne ba nyangumuzwi ki tuso ya ka nako ye swanela ye ne ba filwe. Malyori, ya n’a shandaulezwi ndu ki litwa le ne li tile li topotokile ka buñata mwa Venezuela, u bulela kuli: “Ha ne lu ziyelehile hahulu, mizwale ba t’o lu tusa.” Baitateli ha se ba felize ku yahela lubasi lwa hae ndu ye nca-nca, Malyori n’a bulezi kuli: “Lu itumela hahulu-hulu luli ku Jehova, ku z’a lu ezelize kamukana!” Mi bonalimai ba munda mwa Mozambique ha ne ba amuhezi linotolo za mandu e  ne ba sa z’o yahelwa, ba kalumuka hamoho ka sikwata ku opela pina ya Mubuso ye li “Jehova Maipato a Luna.” *

Ku tusa ba ba tokwile hape ne ku katulusize baitateli. Marcelo, ya n’a sebelize sina nasi mwa mafulo a babalehi mwa Mozambique, n’a ize: “Ne ni ikutwile hande kabakala ku tusa mizwale ba, be ne ba nyandile hahulu cwalo.” Huang, muitateli wa mwa Taiwan n’a ize: “Ne ku tabisa hakalo ku tusa mwa ku abela lico ni litende kwa mizwale be ne ba li mwa butokwi. Ne ku tiisa tumelo.”

Tukiso ya Buitateli Ye Peta Se Siñwi

Misebezi ya ku itatela hape i imuluzi kwa moya batamiwa ba ba eza likiti ze mashumi-shumi mwa lifasi kamukana. Kamukwaufi? Mwa lilimo za cwanoñu fa, Lipaki za Jehova ba abezi libuka za Bibele kwa batamiwa ba ba fitelela 30,000 ba mwa litolongo ze bat’o ba 4,000 mwa United States fela. Ku zwa f’o, ha ku konahala, Lipaki ka butu ba potelanga litolongo kuli ba itute Bibele ni batamiwa ni ku zamaisa mikopano ya Sikreste. Kana batamiwa ba fumana tuso kwa tukiso yeo?

Batamiwa ba bañwi ba ba ituta Bibele ba kalanga ku buhisana ni batamiwa ba bañwi lituto ze wetulusa za Linzwi la Mulimu. Kacwalo, mwa litolongo ze ñata mwa lifasi kamukana se ku na ni likwata za batamiwa ba ba lapela Jehova hamoho. Ka 2001, mutamiwa yo muñwi wa mwa tolongo ya kwa Oregon mwa U.S.A. n’a bihile kuli: “Sikwata sa luna si eza hande. Lu na ni bahasanyi ba Mubuso ba 7 mi lu zamaisa lituto za Bibele ze 38. Batu ba ba fitelela 25 b’a fumanehanga kwa ngambolo ya nyangela ni Tuto ya Tora ya ku Libelela, mi fa Kupuzo [ya lifu la Kreste] ne lu kopani ba 39. Ba bañwi ba balalu ba ka tuha ba kolobezwa onafa!”

Lituso ni Tabo Ye Zwa Mwateñi

Babeleki ba kwa litolongo ba lemuhile kuli tukiso yeo ya buitateli ya tusa. Se si komokisa hahulu babeleki ba kwa litolongo kikuli lituso ze zwa mwa tukiso ya buitateli yeo ki ze inelela. Piho ye ñwi i li: “Mwa lilimo ze lishumi ze i sebelisizwe tukiso ye, ha ku si ka fumanwa mutamiwa ya n’a kolobelizwe mwa tolongo sina yo muñwi wa Lipaki za Jehova ili ya n’a kutezi mwa tolongo hamulaho wa ku lukululwa—ka ku fapahana ni palo ye eza licika ni ku fitelela ya ba likwata li sili ba ba kutelanga mwa tolongo.” Ka ku susumezwa ki ze zwile mwa musebezi wa Lipaki wa ku itatela, muluti wa lituto za bulapeli mwa tolongo ya mwa Idaho n’a ñolezi kwa sibaka se situna sa tamaiso ya mwa lifasi kamukana sa Lipaki za Jehova kuli: “Nihaike na ka sibili ha ni lumelelani ni litumelo za mina za bulapeli, ni tabisizwe hahulu ki kopano ya mina.”

Ku tusa ba ba mwa litolongo hape ku tahiseza baitateli mipuzo. Hamulaho wa ku zamaisa mukopano kwa sikwata sa batamiwa be ne ba opezi pina ya Mubuso lwa pili mwa bupilo bwa bona, muitateli yo muñwi n’a ñozi kuli: “Ne ku susueza luli ku bona banna ba 28 ha ba swalisana mwa ku opelela Jehova milumbeko. Mane ne ba opezi ka ku tiisa! Ne li tohonolo ye tuna ku fumaneha fa kezahalo ye cwalo!” Muitateli ya n’a potela litolongo mwa Arizona n’a ize: “Ku abana mwa musebezi wa butokwa wo ku bile mbuyoti ye tuna!”

Baitateli ba Lipaki mwa lifasi kamukana ba lumelelana fela ni Jesu, ya n’a ize: “Ku na ni mbuyoti mwa ku fana, ye fita ye mwa ku fiwa.” (Likezo 20:35) Hape ba paka kuli ku latelela kelezo ya Bibele ya ku eza batu kaufela hande kwa katulusa luli.—Liproverbia 11:25.

[Litaluso za kwatasi]

[Siswaniso se si fa likepe 8]

Venezuela

[Siswaniso se si fa likepe 8]

Taiwan

[Siswaniso se si fa likepe 8]

Mozambique