Piho ya Bashaeli ba Mubuso

‘Linzwi la Mulimu Li Na ni M’ata’

BATU ba bañata ba mwa sioli sa kambalala sa mwa Liwate la Caribbean, sona sa Jamaica, ba ziba Bibele. Mane Bibele ya King James Version, ya kona ku fumanwa ibat’o ba fa ndu ni ndu, mi batu ba bañwi ba iponezi kuli “Linzwi la Mulimu ki le li pila, mi li na ni mata.” (Maheberu 4:12) M’ata ao a kona ku cinca batu, sina mo ku boniselizwe ki kezahalo ye latelela.

Munna ya bizwa Cleveland a sa kuta fela kwa ndu ku zwa kwa mubeleko zazi le liñwi, a potelwa ki yo muñwi wa Lipaki za Jehova. Hamulaho wa ku buhisana lisupo ze ñwi mwa Mañolo, Paki y’o a mu siyela buka ya ku ituta ka yona Bibele, yona ya Zibo Ye Isa kwa Bupilo bo Bu Sa Feli. Cleveland n’a si ka lemuha kuli Linzwi la Mulimu ne li ka ba ni m’ata mwa bupilo bwa hae.

Cleveland n’a lapelanga halalu ka zazi, ili ku kupa Mulimu ku mu tusa ku fumana nzila ye lukile ya ku Mu lapela. Cleveland n’a kozwi kuli bashemi ba hae ne ba sa lapeli ka nzila ye lukile, kono hamulaho wa ku tatuba bulapeli bo buñwi a felelwa ki sepo. Nihaike na s’a utwile kale ka za Lipaki za Jehova, n’a kakanya ka za haiba ne ba luta niti. Ku si na taba ni ku kakanya kwa hae, Cleveland a lumela ku ituta Bibele ni Paki y’o ya n’a til’o mu potela. Libaka? N’a bata ku fumana mafosisa ku bona!

Hañihañi, Cleveland a ziba kuli buozwa bwa n’a eza ni basali ba babeli ne bu sa tabisi Mulimu. (1 Makorinte 6:9, 10) Hamulaho wa lituto ze peli fela, a ba ni bundume bwa ku feza silikani sa hae ni basali bao. Hape a kalisa ku yanga kwa mikopano ya Sikreste kwa Ndu ya Mubuso. Kono ku eza cwalo ne ku bile muliko o muñwi hape.

Cleveland n’a swalisana hahulu ni sikwata sa balahi ba mbola mwa silalanda sa habo, mi lipapali za sona ne li mu bisezanga t’ata ku ya kwa mikopano. N’a ka eza cwañi? Ku si na taba ni ku sineneketwa hahulu ki ba n’a li ni bona mwa sikwata, muzamaisi, ni balikani ba hae, Cleveland a zwa mwa sikwata seo sa mbola. Ee, Linzwi la Mulimu ne li sweli ku ba ni m’ata, ku mu susueza ku eza ze nde!

Hape m’ata a Linzwi la Mulimu a bonahala Cleveland ha n’a kalisize ku bulelela ba bañwi zibo ya hae ya za Bibele. (Likezo 1:8) Kabakaleo, ba babeli ku ba n’a banga ni bona mwa sikwata sa mbola ba kala ku yanga kwa mikopano ya Lipaki za Jehova. Cleveland ha s’a kwanisize za ku ba muhasanyi wa taba ye nde, a ba ni tabo ye tuna mwa bukombwa, ili ku tusa ba bañwi ka Linzwi la Mulimu.

Ka ku zwelapili ku susumezwa ki m’ata a Linzwi la Mulimu, hañihañi Cleveland a bonisa buineelo bwa hae ku Jehova ka kolobezo ya mwa mezi mi u na ni tohonolo ya ku sebeza sina sikombwa sa ka nako ye tezi ni sina mutang’a bukombwa mwa puteho ya habo.

Mwa Jamaica ni mwa lifasi kaufela, likiti-kiti za batu ba fitile fa ku ziba kuli, luli, Linzwi la Mulimu “ki le li pila, mi li na ni mata.”

[Mapa/Siswaniso se si fa likepe 8]

(Kuli mu bone mo i hatiselizwe luli, mu bone hatiso)

JAMAICA

[Manzwi a bañi ba siswaniso]

Mapa ni lifasi: Mountain High Maps® Copyright © 1997 Digital Wisdom, Inc.